Maijin israelgunallada kishpichinamunda
11
1 Shinushaga kutin tapuni:
¿Diosga Paibujti puebloda shitashkachu ganga?
¡Naidi shinaga ganchu!
Ñukaidikish israelmi gani;
Abrahambuj wawagunaj wawa,
Benjaminbuj tribumundashmi gani.a
2 Ñaubamu agllashka Paibujti pueblodaga Diosga na shitashkachu.
Dios escribichishkabi Eliasmunda ima nishkadaga ¿nachu yachunguichi?
Paiga Diosta mañagusha israelgunada juchachishaga,
3 “Mandajlla,
Kan ima nishkada parlujkunadash wañuchishkagunami;
Kanmu kusha rupachina altargunadash p'akishtashkagunami.
Ñukallami kausin sakirini,
ñukadash wañuchisha nigungunami,”
b niga.
4 Ashtanbish shina niki Diosga ¿imadadi nin?
“Baalc shuti diosbuj ñaubuki na kungurij kanchis waranga (7.000) gentegunadami Ñukamu ch'ikunyachisha wakichishkani,”
d niga.
5 Shina layaidi kununbish Pai alligunada kusha agllashkagunaga p'ichillagunami tiyan.
6 Na kuna gakish alligunada kusha paigunada agllukidijka,
imada rurashkamundaga ña na ganchu;
allida rurashkamunda gakiga ña na Dios alligunada kumbidashkamunda tukunchu.
7 Kununga ¿imada ni pudinchi?
Israelgunaga japingu munushkada na japigagunachu;
shinash Dios agllashkagunaga japigagunami.
Ashtanbish chaishujkunadaga jinchi shungudami ruruga.
8 Dios escribichishkabi nishka shinaga,
“Diosga paigunamu muspayachij espirituda kushami kunun p'unllagama ñawigunada na rikujta,
rinringunada na uyajta ruruga.”e
9 Rey Davidbish kashnami nin,
“Paigunaj ima jatun mikigunabiga tsagnarisha tugllabif japi tukusha urmushaga llakichishka gachun.
10 Paiguna ama rikuchun ñawigunash ansayachun,
shinaidi tuki ratugama paigunaj lomogunash tursirichun.”g
Na israelgunash kishpichishka gashkamunda
11 Kununga tapuni:
¿israelguna trankarishaga ña na jataringauchu urmushkanga?
¡Nalladi shinaga ganchu!
Ashtangarin,
munachisha p'iñachingajmi israelguna Diosta na kazushkamundaga na israelgunamu kishpichishka gana shamuga.
12 Shinaidi paiguna na kazushkamundaga kai pachamundagunabuj manchanaidi allibujmi gashka,
paiguna pandarishkaga na israelgunabuj manchanaidi allibujmi gashka;
shinakidijka israelgunada illujta kishpichikigarin ¿nachu ashtandij yalli allibuj ganmuri?
13 Kununga kanguna na israelgunamu nisha nini:
ñukaga na israelgunamumi Diosmunda parlachun agllusha kachushka gani;
chimundami ñuka Diosbujta ruranadaga manchanaidi allibi churani.
14 Shina rurushkanga ñukajti llaktallamundadigunada ima layash munachisha maijingunalladash kishpichichingu pudishachari.
15 Kai pachabi kausujkuna Dioskun alli tukuchun israelgunada llujshichishtashka gakidijka Dios paigunada japishagarin wañushkagunada kausachishka shinami ganga.
16 Kallarimu llujshishka tanda Diosmu ch'ikunyachishka gakiga illujta chapushkashmi Diosbujlladi ganga;
shinaidi yura sapi Diosmu ch'ikunyachishka gakiga tuki ramagunashmi Diosbujlladi ganga.h
17 Olivo yuramunda maijin ramagunada rauchushtashka shinami gaga;
kangunagarin,
sachabi iñashka olivo yuramunda ramada p'itisha chaishujkunaj randi llutachish churashka shinallami ganguichi.
Chimundami kangunaga alli olivo yura sapibuj k'uilla ikillamunda kausida charinguichi.
18 Shina gakish chaishuj ramagunada ʻYallimi ganiʼ nisha ama yuyanguichichu.
Shina nigushamaga kaida yuyari:
yura sapidaga na charirijchungui,
ashtangarin sapimi kandaga charirigun.
19 “Ñukada chi yurabi llutachisha churungajllami ramagunadaga rauchushtashka,”
ninguimachari.
20 Shinaidimi gan.
Paiguna na crishkamundami rauchushtashka shina gagaguna;
ashtangarin kangunaga crishkallamundami chi yurabi alli tiyarishkanguichi.
Shinushaga ʻYallimi ganiʼ nisha ama nichu,
ashtangarin manchuj gai.
21 Diosga chi yurallabidi iñushka ramagunadash na perdonajtijka kandagarin na perdonangachu.
22 Shinakiga,
Diosga allida ruruj shinaidi jinchi gashkadash yuyarichi;
na allibi urmujkunadash llakichingaj jinchimi,
shinash kangunanga alligunaida rurujmi gashka.
Kanguna Paibuj alli rurigunamunda na karuyashalla kausagüichilla;
karuyashaga p'itishtashkami ganguichi.
23 Israelgunash na crishkada sakikigarin,
Diosga tukida ruri pudij gashkamundaga kutin chillabidi llutachisha churungallami.
24 Kangunaga sachabi iñashka olivo yuramunda p'itishka,
naidi chimunda gakish alli olivo yurabi llutachisha iñachishka shinami ganguichi;
shinakidijka alli olivo yurabujti ramagunadaga kikinbuj yurallabidimi Diosga llutachisha kutin churangallami.
Israelgunada kutin mushujyachisha kishpichinamunda
25 Wauki paniguna,
kanguna yachuj tukushkaidi ama gachunmi kai pakalla tiyashkada yachachun munani:
crij tukuna gaj na israelguna tukiguna crij tukungamallami maijin israelgunaga llumiyashka shungu tukushkagunaga.
26 Chi k'ipaga,
tuki israelgunadami Diosga kishpichinga,
Dios escribichishkabi nishka shinaga,
“Sionmundami Kishpichijka shamunga;
Paimi Jacob-buj na alli rurashkagunadai anchuchinga.j
27 Ñuka paigunan ari ninukushkadaga paigunaj jucha rurushkagunada chingachishami p'aktachisha.”k
28 Kangunaj allibujlladimi israelgunaga Alli Shimida na japishkamunda Dioskun p'iñanukushka shina ganguna,
shinash paigunaj ñauba taitagunada agllushkamundaga chairitij Dios k'uyashkagunamigun.
29 Diosga imada kushash na kichunchu,
agllushkadash naidi anchuchinchu.
30 Ñaubamunga Diosta na kazujkunami gaganguichi,
shinash israelguna na kazush nishkamundami kanguna kununga Dios llakishka tukushkanguichi.
31 Kanguna layaidimi paigunash kunun na kazushkaguna;
kanguna Dios llakishka tukushkamunda paigunash chi llakishkalladadi japichunmi shina tukushka.
32 Illujta yuyarikiga Diosga tukigunada llakisha igulda k'uyangajmi na kazujkuna gachun tukigunada chibi chaririaga.
33 ¡Diosga yuyisapa tukida manchanaidi yachujmi!
Pai imada yuyashkadash pish na rijsi pudinchu,
ruragushkadash pish na yachi tukunchu.
34 “Manduj Diosbuj yuyidaga ¿pidij rijsishkari?
na gashaga alli yuyigunada kujka ¿pidij tiyagari?l
35 ¿Pidij ñaubushadi Paimu imadash kushkanga,
chimunda randi Pai vueltachichunga?”m
36 Tuki ima tiyashkagunash Paimundami shamun,
Paimundami tiyan,
Paimumi tiyan;
shinushaga ¡Diostaga ima urash na tukuringama ʻK'uillami ganguiʼ nishka gachun!
Shina gachun.