Kazarashkagunan ch'imbapurushkamunda
7
1 Wauki paniguna,
Moisés mandashkagunada yachunguichimi;
shinushaga chi mandushkagunaga kausujkunallada mandi pudij gashkadaga ¿nachu yachunguichi?
2 Kazarashka warmiga mandushkabi nishka shina kusa kausushkagama paillamu watushka shinami gan,
shinash wañukiga kusan watushka shina gachun mandashkamundaga ña kachachirishkami sakirin.
3 Shinushaga kusa kausagujllabidi shuj k'arin gashaga,
wainayaj nishkami ganmu.
Shina gakish kusa wañukiga,
warmiga mandushkabi nishka shinaga ña na kusabuj ganchu,
shinusha shuj k'arin kazarashash na wainayaj ganchu.
4 Shinaidi k'uyashka wauki paniguna,
ima urami Cristoj cuerpo wañukiga kangunash mandashkabujka wañushka shina gaganguichi;
wañushka k'ipa kausachishka gajkun tandachishka gangabujmi shina rurushka.
Shina gashami Diosmunga alli granuda tandachisha kuj shina kushun.
5 Ima urami ñukuchij aicha munushkabi kausaguganchi,
mandashkabi nishkagunaga ñukuchibi tiyaj na alli munigunadami rijchachijkunaga,
chida kazushaga wañilladami japiganchi.
6 Shina gakish mandashkabi watashka shina gasha wañushami kununga mandushkamunda kacharichishka ganchi;
shina kacharichikimi ña na ñauba mandushkagunallabidijka ashtanbish Diosbuj Espiritumunda mushuj kausibi Paida sirvinchi.
Ñukabi tiyaj juchamunda
7 ¿Imada nishun shinadijka?
ʻMandashkaga juchamigunʼ ¿nishunchu?
¡Nalladi shinachugun!
Shinash mandashka na tiyashkakiga juchaga ima gashkadash na yachanimuchuga;
mandashkabi nishka layaga,
“Shujbujta ama munangui,”
a na nishkakiga,
shujbujta muniidash na munanimuchuga.
8 Shina gakish juchami paibuj alli ganaj mandashkaguna tiyashkan ñukamunga tuki laya milli munanagunada rijchachisha munachiga;
mandashkaguna illukiga juchash wañushka shinami ganmu.
9 Ñauba p'unllaguna ñukaga mandashkaguna illuj kausuganillami;
shinash mandushka shamuki juchaga kausarigallami,
ñukaga wañugani.b
10 Shinami,
kausimu pushanabuj gashash chibuj randiga chi mandushkaguna ñukadaga wañimu pushaj gashkada yachi chayagani.
11 Juchami paibuj alli ganaj mandashkaguna tiyashkan pandachisha chigunallandi ñukada wañuchiga.
12 Alli alli yuyarikiga,
Moisés mandashkash tuki mandushkagunash ima juchash illujmi,
kabishkashmi shinaidi allishmi gan.
13 Shina gakidijka ¿kai alli gashkachu wañimu ñukada pushuga?
¡Nalladij shinachugun!
Ashtangarin juchami juchadi gashkada rikuchingau alli mandashkan wañimu pushaga;
kununga mandashkaguna tiyashkamunda juchaga yallimanaidi milli gashkadami rikuchishka gaga.
14 Kai mandashkaga Espiritumunda gashkadaga yachanchimi,
shinash ñuka aicha munida ruruj gashkamundaga juchada ruranaj k'atushka shinami gani.
15 Ñuka imamunda shina rurushkadash na yachanichu;
ima rurungu munushkadaga na ruranichu,
shinash ashtangarin naidi rurungu munushkadami rurani.
16 Ñuka,
na rurungu munushkadadi ruragushaga,
mandashkadaga ʻAllimi gashkaʼ ninimi.
17 Shinakiga,
na allidaga ña na ñukaga ruranichu;
ashtangarin ñukabi tiyaj juchami chidaga rurachin.
18 Allida ruranaga ñukabi,
ñukaj aichabiga na tiyashkadaga allimi yachani;
allida rurana muniguna ñukabi tiyakish rurungujka na pudinichu.
19 Allida rurungu munushkadaga na ruranichu,
ashtangarin na rurungu munushka na allidaga chidadimi rurani.
20 Na rurungu munushkadadi rurushtijka,
ña na ñukaga ruranichu;
ashtangarin ñukabi tiyuj juchami chidaga rurachin.
21 Kununmi kashna tukushkada yachi chayani:
allida rurungu munuj gakish na allida rurana munigunashmi ñukabiga tiyan.
22 Ñukaj shungu ukubiga Diosbuj mandashkagunanmi kushiyani;
23 shinash ñukaj cuerpobi charishkagunabiga shujtij mandagushkadami rikuni;
ñukaj yuyibi alli mandashkagunan takanukusha ñukaj aicha ukubi gaj juchada rurachij mandashkaga ñukada prezu charij shinami charigun.
24 ¡Shinapadijka imachari tukusha!
Wañimu apaguj ñukaj cuerpomundaga ¿pidij kacharichingari?
25 Ñukuchida Manduj Jesucristomundami Diosta ʻDiosolopaiʼ niguni.
Shinusha alli alli yuyarikiga,
Dios mandushkadaga ñukaj yuyinga kazujmi gani;
ashtanbish ñuka cuerponga jucha rurachun mandashkadami kazuni.