Juchada rurungu ña wañushka gashkamunda
6
1 Shinakiga ¿imadadi nishun?
Dios k'uyagushka ashtandij mirarisha katichunga ¿juchada rurusha katigushunllachu?
2 ¡Nalladi shinaga ruranachu!
Ñukuchiga juchada rurungaj ña wañushkaguna gashadijkaa ¿ima layadi chillatijka rurusha kausagushunllari?
3 Cristo Jesusbi mashnalla bautizarishkaguna,
bautizarishkan Paiyundi wañushkadaga ¿nachu yachanguichi?
4 Bautizarishaga Criston tandanukushka gasha ñukuchikish wañusha Paiyun pambushkami gaganchi;
ima laya Taita Dios Paibuj k'uilla gashkada rikuchisha Jesusta kausachiga,
shinaidi ñukuchish mushuj kausibi purichunmi ruruga.
5 Pai wañushka layaidi wañusha Paiyun tandanukushkaguna gashadijka,
Cristo kausarishka layaidimi kausachishka gashun.
6 Ñukuchij ñauba kausiga Criston cruzbi chakatashka gashkadaga yachanchi.
Ñukuchida jucha mandashka shinab ama ashtan katichunmi juchasapa aicha chingachishtashka gachun rurushka gaga.
7 Maijinsh wañushaga ña na jucha mandushka kausanchu.
8 Criston ñukuchi wañushka gashadijka,
Paigunlladi kausana gashkada crinchimi.
9 Cristoga wañushkagunapuramunda kausarishka k'ipa kutinga ña na wañuna gashkada yachanchimi;
wañish Paida kutinga ña na mandungachu.
10 Ima ura Cristo wañushaga tukigunaj juchamunda tuki ratuj shuj kutinllami wañuga,
ashtanbish kausarishaga Diosbujllami kausagun.
11 Shina layaidi kangunash juchabujka wañushka shina gashkada yuyichi,
ashtanbish Jesucriston tandanukusha Diosbujta rurungu kausuj gashkada yuyichi.
12 Shina gakiga,
juchadaga kangunaj wañujlla cuerpobiga na alli munigunada rurachisha mandusha katichun ama sakinguichichu.
13 Kangunaj cuerpobi imalla charishkagunada millida rurachichunga juchamu ama kuichichu.
Chibuj randiga wañushash kutin kausachishka shina kikinlladadi Diosmu kurisha cuerpobi imalla charishkagunada Diosbuj ñaubuki kabishkada ruraj gachun sakichi.
14 Kununga Moisés mandashkagunaga ña na kangunaj jawabi ganchu,
ashtangarin Diosbuj k'uyibimi kausagunguichi.
Shinusha juchaga kangunabi imallada rurachina poderdaga ña na charingachu.
Kabishkada rurungu watashka gashkamunda
15 Shinadijka,
Moisés mandashkaga ña na ñukuchij jawabi gaki,
ashtangarin Diosbuj k'uyibi gashkamundaga ¿juchada ruragushunllachu?
¡Naidi shinadijka ruranachugun!
16 Alli yachushka shinaga kanguna sirvingaj shuj mandujmu k'aturishaga paida kazungajmi watushka shina tukunguichi;
wañimu apaj juchamu k'aturikish,
na gashaga ima juchachina illujta rurachun Diosta kazungu gakish shinaidimi tukun.
17 Shina gakish ñaubami kangunaga juchabuj watushka shina gashash,
Diosmunda ima laya crinada kangunamu yachachikimi tuki shungun kazushkanguichi.
Chimundami Diostaga ʻDiosolopaiʼ nini.
18 Juchada ruranamunda ña kacharichishka gashami,
kununga kabishkada ruranaj watushka shina tukushkanguichi.
19 Kanguna chairijtij narij ratu japijlla gakimi rijsishka shimigunan nini.
Sarun kangunaj cuerpo illujtada k'aturij shina millanaidi na alli tuki laya juchadash rurasha kazungaj kuganguichi.
Shina layaidi kununga kabishkada rurasha Diosbujlla pish na juchachibuj kausungau k'aturij shina kikinbuj cuerpo illujtada kuichi.
20 Kanguna chairijtij juchabuj watushka shina gashami,
kabishkada rurungujka na watashkaguna gaganguichichu.
21 Shinadijka,
kununga tuki chi rurushkagunamunda pinganachinguichimi;
¿ima allidadi japiganguichiri?
Tuki chigunaga wañimumi apan.
22 Shinaga juchada ruranamunda ña kacharichiki kununga Diosbujta rurungumi watushkaguna tukushkanguichi;
Diosbujlla pish na juchachibuj kausanamu apasha,
chibuj jawa,
na tukurij kausimu apakimi kaiga manchanaidi kangunaj allibuj gan.
23 Juchada rurushkamunda japinaga wañimi,
ashtanbish Dios kumbidashkaga ñukuchida Mandaj Cristo Jesusbi na tukurij kausimi gan.