Abrahamga alli crij gashkamunda
4
1 Shinadijka ¿imada nishun?
Aichamunda rikukiga ñukuchij ñauba taita Abrahamga ¿imadadi japiga?
2 Abrahamga ima rurashkamunda juchachinash illuj gakiga ʻAlliminiʼ ninaga kabinlladimumiga.
Shinash Diosbuj ñaubukiga na shinachu.
3 Shinaidi Dios escribichishkabiga ¿imada nin?
“Abrahamga Diostami criga,
shinushami Diosga ima juchachinash illujmada shina japiga,”
a ninmi.
4 Kununga shinakiga,
maijin trabajajmunga pagana gashkadaga kumbidagushkama shinaga na yuyanachu,
ashtangarin dibishkama layami gan.
5 Shina gakish,
juchayujkunada ima juchachinash illujta ruruj Diosta maijin crijtaga,
ima allidash na ruruj gakish,
Paida crikimi Diosga ima juchachinash illujmada shina japin.
6 Diosga maijingunadaga ima rurashkagunadash na rurushkama layada japisha juchachinash illujta rurusha kushiyachishkadaga Rey Davidlladikish parlugami,
7 kashna nisha:
“Milli rurashkagunada Dios perdonasha juchagunadash tapachishkagunadijka ¡pachun kushiyarinami!
8 Maijinbuj juchagunadaga,
Manduj na juchachishka gashadijka ¡pachun kushiyachishkami gan!”b
9 Kai shina kushiyarinaga ¿circuncidashkagunajllachu ganga?
Na gashaga ¿na shina rurarishkagunakishchu ganga?
Diosga Abrahamdaga crishkallamundami ima juchachinash illujta japishkadaga ña nishkanchimi.
10 Shina gakidijka ¿ima uradi shina rurushka?
¿Abraham aicha karada p'itishka k'ipachu,
na gashaga ñaubarijtadichu?
Ñaubarijtadimiga;
na k'ipachuga.
11 Crishkallamunda paidaga ima juchachinash illujmada shina Diosga ñami japishkaga;
chida rikuchingajmi selloda churashka shina Abrahamga k'ipamu aicha kara p'itishka gaga.
Shina rurushami aichada na p'itichishka gakish Abrahamga tuki crijkunaj taita tukushka,
shinami paigunadash ima juchachinash illujmada shina Diosga japin.
12 Shinaidi Abrahamga tuki mashnalla,
aichada p'itichishka gashka jawash,
pai crishka shinada rikusha katijkunaj taitami;
chi crinadaga narikish aichada p'itishka gashaidimi ñukuchij ñauba taitaga ña chariga.
Crishkan ʻKushamiʼ nishkada japinamunda
13 Diosga Abraham-mush wawagunaj wawagunamush ʻKai pachada japij gachun kushamiʼ nishka.
Shinash kai japina gashkaga na mandushkada p'aktachishkamundachuga;
ashtangarin criki juchachinash illuj shinada rurashami ʻKushamiʼ nishkaga.
14 Shinakiga mandashkada p'aktachijkunalla ʻKushamiʼ nishkada japina gakidijka,
crishkash yangami,
shinaidi Dios ʻKushamiʼ nishkash,
imakish na vali shinami tukunmu.
15 Mandashkagunaga Dios p'iñarishkadami apamun.
Shina gakish maibimi mandashka na tiyan,
mandashkada p'akinamash na tiyanmuchu.
16 Shinushaga Abraham-mu ʻKushamiʼ nishkaga,
tuki paibuj wawagunaj wawagunamu,
rurarishkaidi gachunga crishkallamundami gan;
shinami Diosga na kuna gakish k'uyushkallamunda kumbidan.
Kai ʻKushamiʼ nishkaga mandashkada charijkunajllaga na ganchu,
ashtangarin Abraham laya crijkunamushmi gan;
shina rurukimi tuki ñukuchibujka paiga taita gan.
17 Dios escribichishkabi nishka shinaga,
“Kandami tuki laya llaktagunamunda gentegunaj taita gachunmi churashkani,”
c ninmi.
Abrahamga Diosbuj ñaubuki shina nikiga wañushkagunada kausachij shinaidi ima narij tiyashkagunadash tiyachun nij Diostami criga.
18 Tuki laya llaktagunamunda gentegunaj taita gangujka,
tuki shuyagushkash naidi p'aktana laya gakishmi Abrahamga ashtan crish katisha shuyaga,
Dios ña kashna nishka shinaga,
“Kambuj wawagunaj wawagunaga taugalladijkunami ganga.”d
19 Abrahamga ña patsuj (100) watada p'aktachimuguj gashkada,
yuyijyasha ña wañunalla gashkadash cuenta kusha,
shinaidi Sarash marada na chari pudij gaki,
paibuj crishkaga jawayaj shina na tukugachu.
20 Shinaidi Dios ʻKushamiʼ nishkada ʻ¿Kungachu?
¿nachu kunga,
imashi?
ʼ nishamash na crishkama layaga na yuyugachu.
Ashtangarin Diosta ʻK'uillami ganguiʼ nisha ashtandi jinchi crina yuyidami japiga.
21 “ ʻKushamiʼ nishkadaga p'aktachingajka ruri pudijmigun,”
nisha chi yuyillan criga.
22 Shina crishkamundami Diosga ima juchachinash illujmada shina japiga.
23 ʻJuchachinash illujmada shina japigaʼ nishaga na Abrahamllamundash escribigachu;
24 ñukuchimundashmi chibi escribiga.
Ñukuchida Mandaj Jesusta wañushkagunapuramunda kausachij Diosta crikiga,
ñukuchidash shina layalladadimi japinga.
25 Jesustaga ñukuchij juchagunamunda wañuchunmi Diosga kuga,
shinaidi ñukuchida ima juchachinash illujta rurangaumi kausachiga.