Diosga kabishka juchachij gashkamunda
2
1 Shinusha,
kan pi gashash shujkunada juchachigushtijka ʻJucha illujmi ganiʼ ningujka naidij pudinguichu.
Ima layami chaishujkuna ruran shinaidimi kambish rurangui.
Chimundami shujkunada juchachishaga kanlladi juchachishka gangujmi shinaga rurangui.
2 Ashtangarin shina rurasha kausujkunadaga Dios kabishkadadi juchachij gashkadami yachanchi.
3 ¿Shujkunada juchachigushash kambish paiguna rurushkalladadi ruragushaga ʻDios juchachinamundaga mitikushamiʼ yuyanguichu?
4 Dios manchanai alli shunguyuj gashkada,
shinaidi na ut'kada p'iñarishalla shuyagushkadaga ¿yangabichu churangui?
Juchada sakisha Paimu kuchuyachun nisha kangunga alli shungu gashkadaga ¿nachu yachunguiri?
5 Kangarin ima rurashkamunda na llakirij jinchi shungu gashami,
Dios p'iñarishkash shinaidi kabishka juchachinash rikurina p'unllagama kanllamundi Pai p'iñarishkada mirachisha tandachigungui.
6 Tukigunamumi imalla rurashkamunda Diosga kuna gashkalladadi kunga.
7 Dios ʻAlliʼ nishka gangu,
allibi churashka gangu shinaidi naidi wañunada mashkusha allida ruragujllagunamunga na tukurij kausidami kunga.
8 Shina gakish maijinbish kikinbuj munushkaida rurusha,
kabishkada kazuna randi na alli ruranallada kazujkunamunga,
Pai colerasha p'iñarishkanmi llakichinga.
9 Tuki na allida rurujkunadaga israelgunadadij chi k'ipa na israelgunadashmi manchanaidi llakish mancharinash japinga.
10 Shinash ashtangarin allida rurujkunamunga israelgunamundij chi k'ipa na israelgunamushmi Dios ʻAlliʼ nishka ganada,
allibi churashka ganada shinaidi k'uilla kausidash kunga.
11 Diosmunga yalli alli nishkagunamaga pish na tiyanchu.
12 Moisés mandushkada na yachusha juchada rurajkunaga chi mandashka illukishmi tukiguna juchachishka chingangaguna;
shinaidi mandashkada charishka jawash juchada rurujka chi mandashkallandimi juchachishka ganga.
13 Mandushkada uyushkallanga Diosbuj ñaubuki ʻAlliʼ nishkaga na gai pudinchu,
ashtangarin chida kazujkunallami ima juchachinash illujkuna ganga.
14 Mandashkagunada na charij na israelgunaga munashkamundadi mandashkabi nishka shina rurashaga mandashkagunada na charishash paigunalladimi mandashkagunama laya tukun.
15 Paiguna rurushkanga chi mandashkaguna shungubi escribishka tiyashkadami rikuchinguna;
a shungubi ima yuyashkami chidaga yachi chayachin;
chilladimi wakinbiga ʻNa alli ruranguiʼ nisha juchachinga,
shuj kutingunaga ʻAlli ruranguiʼ nishami ninga;
16 kashna nishkagunan juchachina p'unllabiga Diosga tukigunaj pakashka yuyigunada Jesucristomundami juchachinga;
Alli Shimida ñuka parlushka shinami ganga.
Israelgunamundash Moisesbuj mandushkamundash
17 Kan ʻIsraelmi ganiʼ nishami ʻMoisés mandashkadash charinimi,
Dioskunbish allimi ganiʼ nisha jatun tukusha puringui.
18 Pai munashkadash yachunguimi,
Moisés mandashkada yachushkamunda allida ruranadash agllungakish yachanguimi.
19 Na rikujkunadash shinaidi yanamangabi gajkunadash p'unllayachij shina kanlladi pushuj gashkadami yuyangui.
20 ʻMandashkabiga imalla yachanagunadash kabishka parlushkagunadash illujtami chariniʼ nishami imadash na yachujkunadash mara shinagunadash yachachij gashkada cringui.
21 Shina gakish kan shujkunamu yachachishaga ¿nachu kanllamundikish yachachingui?
ʻNa shuwanachugunʼ nigushtijka ¿imasha shuwangui?
22 ʻNa wainayanachuʼ nigushtijka ¿imasha wainayangui?
Musrhagunada p'iñaj gashadijka ¿imashti chi musrhagunada ʻAlliʼ nina wasigunamunda shuwangui?
23 Mandashkada charishkamunda jatun tukushtijka ¿imashadi mandashkada na kazusha Diostaga rimachingui?
24 Diosbuj Shimibi nishka shinaga,
“Na israelgunaga kangunaj kauzamundami Diosbuj shutida imakish na valichisha rimanguna,”
nin.b
Circuncidashka gashash mandashkagunada kazunamunda
25 Mandashkada kazuj gashtijka,
aicha karada p'itichishkagac valingaidimi;
ashtanbish ima urami mandashkada kan na kazushaga kikinbuj aicha karada p'itichishkash na p'itichishkama layami tukungui.
26 Ashtangarin aicha karada na p'itichishka gashash mandushkabi kabishka ruranagunada kazujtaga ¿nachu Diosga aicha karada p'itichishka shinalladadi japinga?
27 Aicha karada p'itichishka gashash mandashka escribishkagunada charishka jawash kan na p'aktachikiga cuerpobi karada na p'itichishka gashash mandashkada p'aktachijmi kanda juchachinga.
28 Israelguna kausashka shina rikuchishkallan,
shinaidi aicha karada p'itichishkallanga na israeldijka gai pudinchu.
29 Israel ganagarin kikinbuj uku shungumundami gana gan,
aicha karada p'itichishkash shungumundami gana gan;
na mandusha escribishkallamundachu,
chidaga Diosbuj Espiritumi shina rurun.
Maijin shina gajka,
na genteguna ʻAlliʼ nishka ganchu,
ashtan Diosmi ʻAlliʼ nishka gan.