Malta shuti islabi Pablo gashkamunda
28
1 Tukiguna yakumunda kausuj llujshishami chi islaga Malta shutishkada yachi chayuganchi.
2 Chi islabi kausujkunaga ñukuchida llakisha alli japishami tamiabi chirin kindiyaguki ninada japichisha kunuchun kayugaguna.
3 Pablo chakishka mirga yantada tandusha ninabi churakimi shuj culebra nina calurda mitikusha llujshimusha paibuj makida kanisha chaririga.
4 Pabloj makibi culebra warkuriajta rikushami chibi kausujkunaga,
“Paiga wañuchijmishkanga.
Yakumunda kausuj llujshimukish ashtan ñukuchij diosmi na kausachun sakin,”
nisha ninukugaguna.
5 Pablo paibuj makimunda culebrada ninabi chaspishtasha imash na tukugachu.
6 ʻÑallami maki p'unguinga na gashaga wañungadikishchariʼ nisha chapariagaguna.
Unida chapashash imash na tukujta rikushami shuj yuyida japisha ʻPabloga diosmi gashkanchinʼ ninukungu kallarigaguna.
7 Ñukuchi kunugushka kuchubi sirij achpaga chi llaktada manduj Publio shutijmi gashkaga.
Paiga ñukuchida llakisha kinsa p'unllagama paibuj wasibi alli japiga.
8 Publioj wasibimi paibuj taita calenturan yaur kicha unguin k'awitubi sirishkaga.
Pablo chida rikungu risha Diosta mañushka k'ipa paibuj makida ungushkaj jawabi churusha alliyachiga.
9 Shina alliyachishkamundami chi islabi kausuj chaishuj ungushkagunash Pablojmu shamusha tukiguna alliyaga.
10 Paigunaga ñukuchida manchanaidi k'uyushkada rikuchiki ña ringu barcobi sikuki ñukuchij ima ministishkada kusha kachugaguna.
Romamu Pablo chayushkamunda
11 Kinsa killada chi islabi purishka k'ipami tamia killaguna pasungama chibi sakirij barcobi sikuganchi.
Alejandría pueblomunda barcoga Cástor nishka Pólux nishka dioskunaj musrhayujmi.a
12 Chibi rishami Siracusa pueblomu chayusha kinsa p'unllada chibi gaganchi.
13 Chimunda llujshish risha chi llakta ladu ladu rishami Regio pueblomu chayuganchi.
Kayundij p'unllaga washa ladumunda waira t'angakimi shuj p'unlla k'ipa Puteoli pueblomunga chayuganchi.
14 Chi pueblobimi shuj crijkunan tupusha kanchis p'unllada paigunan sakirichun niki sakirishka k'ipa rigushkan Roma pueblomunga chayuganchi.
15 Romabi crijkunaga ñukuchi chi llaktamu shamugushkada yachushami Apio pueblo lasabi Kinsa Pozada shuti pueblobish chapungu llujshishkagunaga.
Paigunada rikushami Pabloga Diosta ʻDiosolopaiʼ nisha ashtan kutin alli katina yuyida japisha kushiyaga.
16 Romamu chayushami shuj wasibi Pablodaga shuj soldadolla chapushka kausachun romanogunaga sakigaguna.
Pablo Romabi gashkamunda
17 Romamu chayushka kinsa p'unlla k'ipami Pabloga israelgunapuramunda pushujkunada kayachun kachuga.
Paiguna tandanukukimi kashna niga,
“Crijkuna,
ñukaga israelgunada imada na rurushkanichu.
Ñukuchij ñauba taitaguna imada ruraj gashkada ruranadash na sakiganichu.
Shinash Jerusalén pueblobimi ñukadaga israelguna prezu japishka,
romanogunamu kushkami.
18 Chi romanoguna ñukada alli tapik'ichushka k'ipa ima kauzadash na charishkamundaga na wañuchi pudisha kacharisha kachungu munagaguna.
19 Ashtan israelgunaga manchanai p'iñarigaguna.
Shinushami ʻÑukaga Cesarbuj ñaubukimi juchachishkamunda parlangu munaniʼ nisha mañanami gagani.
Shinash ñukaj llaktamundagunadaga ima juchachinadash na chariganichu.
20 Israelguna shuyagushkada crishkallamundami kaibi kashna cadenan watushka tiyaguni.
Kishna tukushkada kangunada rikusha ningullami kayugani,”
nisha niga.
21 Shina niki paigunaga,
“Ñukuchiga kanmunda imadash nisha Judea llaktamunda wauki panigunaj cartalladash na japishkanchichu.
Judeamunda shamuj ñukuchipuragunash maijinbish kanmunda ʻNa alli ruranchuʼ nishkalladash na uyashkanchichu.
22 Kan yachachishka mushuj yachanada tuki llaktagunabi na allibi churashka gashkada yachunchimi.
Chimunda kan ima yuyishkadami uyush ninchi,”
nigaguna.
23 Chimundami kayushka p'unllabi taugaguna tandanukusha ima nijta uyungu pai kausashka wasimu shamugaguna.
Chibimi Pabloga paiguna Jesusta crichun Moisés mandushkabi Dios nishkada parlujkuna escribishkabi rikuchish katishami Dios ima shina mandanashkadash tutamunda kallarisha tuki p'unlla parluga.
24 Pablo nishkada uyusha maijingunaga criga;
shujkunaga na crigachu.
25 Paigunapura na shuj yuyilla tukusha llujshisha ringu kallarikimi Pabloga kishna niga,
“Diosbuj Espíritu yuyachisha Dios nishkada parluj Isaiasta ñukuchij ñauba taitagunamu allimi kashna nisha parlachishka,
26 ‘Israelgunamu kashna ningu ri:
“Uyagushash na intindinguichichu.
Rikuriashash na rikuj shinami ganguichi.”
27 ¿Imamunda?
Israelgunaj shungugunaga rumi shina jinchiyashkami,
b rinringunash na laru uyanchu,
c ñawigunash ichkashkami.
Na shina gashkashaga ñawigunan rikunmumi,
rinringunan uyanmumi,
shungun intindinmumi,
Ñukajmu vueltunmumi,
shinaidi Ñuka alliyachinimumi,’
d nishkami.
28 “Kununmundaga kishpichinada na israelgunamu Dios kushkada yachichi.
Paigunaga uyingami,”
Pabloga niga.
29 Pablo shina nijta uyashka k'ipami israelgunapuraidi rimanukusha rigaguna.e
30 Pabloga ishki wata jundada pai arrendashka wasibi kausushami tuki rikungu shamujkunada alli japisha katijllamiga.
31 Shina shamukimi Dios ima laya mandana gashkada parlusha Manduj Jesucristomundash na manchusha yachachisha pish na imada nishka kausuga.