Festoj ñaubuki Pablo parlashkamunda
25
1 Cesarea pueblobi mandangu chayushka kinsa p'unlla k'ipami Festoga Jerusalén pueblomu ichiyaga.
2 Chimu chayukimi manduj curaguna israelgunada shuj pushujkunash Festojmu risha Pabloda juchachigaguna.
3 Paigunaga ñanllabidi wañuchichun mandangu yuyarinukushami ʻÑukuchij allida rurusha Pabloda Jerusalenmu kachachun mandabaiʼ nisha mañagugaguna.
4 Shina nikimi Festoga,
“Pablodaga Cesareabimi prezu charigunguna.
Ñukaidi ñallami chimu risha.
5 Chimundaga kangunada pushujkunash Pablo ima na allida rurashkakiga chibi juchachingu ñukan Cesareamu richun,”
niga.
6 Festoga pusuj p'unlla na gashaga chunga p'unlla shinaida Jerusalenbi gashka k'ipami Cesareamu kutin riga.
Kayundij p'unllaga juchachishka gachun mandanabi tiyarisha Pabloda pushamuchun kachuga.
7 Pablo waigukiga Jerusalenmunda shamuj israelguna paibuj muyundiki ʻPaiga manchanai na allida rurajmiʼ nisha kaida chaida juchachigushash shinashkada na rikuchi pudigagunachu.
8 Shinakimi yanga juchachishkada rikuchish nisha Pabloga,
“Israelgunaj mandushkada Diosbuj wasida Cesardasha ima na allidaga na rurashkanichu,”
niga.
9 Israelgunaj ñaubuki alli rikuringu nishami Festoga Pabloda,
“¿Kai juchachishkagunamunda Jerusalenbi tapik'ichusha alli yachachun ringuimuchu?”
nisha tapuga.
10 Shina tapukimi Pabloga,
“César churashka juezkunaj ñaubukimi gani.
Kaillabidi juchachishkami ganani.
Israelgunada ima na allida na rurushkadaga kanlladi yachunguimi.
11 Ñuka ima na alli rurushkada japisha wañuchina gakiga wañuchichunlla na manchanichu.
Ima na allida paiguna juchachishkada ima shinashkada na rikuchikiga pish na ñukada paigunamu kui pudinchu.
Shinusha Cesarbuj ñaubukimi juchachishkamunda parlangu munani,”
nisha niga.
12 Festoga paida yuyachijkunada tapushka k'ipa kashna niga,
“Kanlladi Cesarbuj ñaubuki parlangu mañuki paibujmumi ringui.”
Agripaj ñaubuki Pablo gashkamunda
13 Shuj p'unllaguna k'ipa jatun manduj Agripaga paibuj pani Berenicen Cesareamu Festoda ʻ¿Allillachu gangui?
ʼ ningu rigaguna.
14 Tauga p'unllagunada chibi gakimi Festoga jatun mandujmu Pablomunda parlungu kallarishaga,
“Manduj Felix sakish rishka k'arimi kaibi prezu tiyan.
Paidaga
15 Jerusalenbi gakimi manduj curaguna israel yuyijkunandij ʻJuchachisha wañuchichun nibaiʼ nisha ñukada mañugaguna.
16 Ñukaga kashna nigani ‘Juchachijkunan narij ch'imbapura imamunda na alli juchachishkada rikuchingu ñukuchij ñaubuki ninukujllabidijka Roma llaktamunda mandujkunaga na wañuchichun mandanchichu.’
17 Paiguna tandanukusha kaimu shamukimi na shuyushalla kayundijti juchachishka gachun mandanabi tiyarisha Pabloda pushamuchun kachugani.
18 Paida juchachisha nijkuna shayarishash na ima milligunada rurashkadash na ñuka yuyashka layadash nigagunachu.
19 Ashtangarin Pabloda juchachisha paibuj crinagunallamunda wañushka Jesusmundash rimagaguna.
Shinash Pabloga ʻJesusga kausagunmiʼ niki
20 ñukaga imadash na ruri pudishami Pablodaga ʻ¿Kai juchachishkagunamunda Jerusalenbi tapik'ichusha alli yachachun ringuimuchu?
ʼ nisha tapukiga
21 ʻCesarmi tapuchun mañaniʼ nikimi ñuka Cesarmu kachi pudingama prezu charichun nisha mandugani,”
niga.
22 Agripaga Festoda,
“Ñukash Pablo ima nijta uyush ninimi,”
nikimi,
Festoga,
“Kayaidimi uyangui,”
niga.
23 Kayundij p'unlla jatun manduj Agripaga paibuj pani Berenicendij k'uilla churanada churarishka soldadoda mandujkunandij chi puebloda manduj k'arigunanbish Festoj mandana jatun wasi ukumu waiguki Festoga Pabloda pushamuchun kachusha
24 kishna niga “Jatun manduj Agripa,
mashnalla ñukuchin kaibi tandanukushka gajkunash Jerusalenbi kai Cesareabish tauga israelguna juchachisha wañuchichun nisha kaparigushkaga kaibimi gan.
25 Ñuka rikibiga wañuchichun kachungukish pai ima na allidaga na rurashkachu.
Shina gashash pailladi Cesarmu kachachun nisha mañukimi chimu kachush niguni.
26 Ñukaga Roma llaktada Jatun Mandujmu paimunda imadash na escribish kachi pudishami kaibi gajkunamush tukigunamunda yalliga kan jatun manduj Agripaj ñaubujmumi pushamushkani.
ʻTapik'ichushka k'ipaga imalladash escribish kachi pudishamiʼ yuyusha kaidaga rurashkani.
27 Ñuka rikibiga shuj prezuda imamunda juchachigushkada na parlushalla kachanaga na allichu.”