Macedoniamu Greciamush Pablo rishkamunda
20
1 P'iñarinukusha tukurishka k'ipa Pabloga yachagujkunada kayusha alli katina yuyida kushaga paigunada ʻShuj p'unllagamachiʼ nisha Macedonia llaktamu riga.
2 Chi llaktabi crijkunamu ñaubujmu katina yuyida kusha katisha chi llaktagunada risha Grecia llaktamu chayuga.
3 Chibi kinsa killada gashami Siria llaktamu rij barcoda japingu purishaidi israelguna paida wañuchingu yuyagushkada yachi chayushaga Macedonia llaktalladadi kutin chakillan ringu yuyariga.
4 Berea pueblomunda Pirroj churi Sópater Tesalónica pueblomunda Aristarcosh Segundosh Derbe pueblomunda Gayo Timoteo Asia llaktamunda Tiquicosh Trofimosh paiyun rigaguna.
5 Kai waukigunami Troas pueblobi ñukuchida shuyungaj ñaubugaguna.
6 Ñukuchiga levadura illuj tandada mikuna pishta k'ipaga Filipos pueblomunda barcobi llujshisha rishami pichka p'unlla k'ipaga Troas pueblobi paigunan tupanukusha kanchis p'unllada chibi sakiriganchi.
Euticoda kausachishkamunda
7 Semana kallari domingo p'unlla tandada chaubingu tandanukuganchi.
Pablo kayundij p'unlla ña llujshina gashami chaubi tutagama crijkunamu parlusha yachachiga.
8 Ñukuchij tandanukushka altibajo ukubiga tauga lamparagunabimi nina katiriaga.
9 Chi ukubimi Eutico musu ventanabi tiyarishkaga.
Pablo unida rimariki paida puñunai japiki linshu puñurishaga kinsa jawa altomunda pambamu urmukimi ña wañushkada jatarichigaguna.
10 Chimunda Pablo uriyasha musuda japin ugllarisha,
“Ama mancharichichu.
Kausujmigun,”
niga.
11 Kutin jawa altomu sikusha tandada chaubisha mikushaga p'unllayangama yachachiga.
Chi k'ipaga Pabloga rigallami.
12 Jawa altomunda urmuj musuda kausujta pushusha risha ashtan kushiyagaguna.
Troasmunda Miletogama rishkamunda
13 Pablo ʻAsón pueblomu chakillanmi rish niniʼ nikimi ña yuyarinukushka shinaga paida chi pueblobi japingu ñukuchiga barcobi ñaubushadi riganchi.
14 Asonbi ñukuchin tupanukusha barcobi sikuki Mitilene pueblomu riganchi.
15 Chimunda llujshishka kayundij p'unllaga Quío llakta ch'imbapurada pasusha shuj p'unlla k'ipaga barco tiyarina Samos islamu chayuganchi.
Kutin shuj p'unllada rigushkanmi Mileto pueblomu chayuganchi.
16 Ima layash Pentecostés pishta p'unllaj Jerusalén pueblomu chayush nishami Pabloga Asia llaktabi na unida sakirisha nisha Éfeso pueblomu na chayashalla riga.
Efesomunda yuyijkunamu Pablo yachachishkamunda
17 Pablo Mileto pueblobi gashami Éfeso pueblomunda crijkunada pushaj yuyijkunada kayachun kachuga.
18 Paiguna chayamukimi Pablo kashna niga,
“Asia llaktamu chayamushkamunda pacha ñuka kangunan ima laya gashkada yachunguichimi.
19 Ñukaga israelguna imadash rurusha llakichikish manchanai wakasha na jatun tukushallami kangunan Mandujbujllada rurasha purigani.
20 Tukigunaj ñaubukish kangunaj wasigunabish Alli Shimida kangunaj allijlladi na sakishalla yachachishkada yachanguichimi.
21 Chimundami israelgunada na israelgunadash ʻJuchagunada sakisha Diosmu vueltarisha Manduj Jesusta crina ganguichiʼ nishkani.
22 Kununga Jerusalenbi ima tukunadash na yachushallami Diosbuj Espíritu kachushkada kazusha chimu rina gani.
23 Ashtan ʻCarcelbi churusha llakichishkami ganguiʼ nisha mai pueblomu chayukish Diosbuj Espíritu nishkalladami yachani.
24 Shina gakish ñukaj kausilladadi na llakirinichu,
ashtangarin Dios alligunada kushkamunda Paibuj Alli Shimida parlachun Manduj Jesús Paibujta rurachun mingashkadaga mishanukibi vincij shina kushilla p'aktachinadijmi gani.
25 “Ñuka Dios ima shina mandanada parlaki kangunaga ñukan puriganguichimi.
Kununmundaga kangunapuramunda pish ñukada kutin na rikunadaga ña yachanimi.
26 Shinushaga kununbish nisha nini,
kangunamunda maijin chingarikish pish ñukadaga na juchachi pudinguichichu.
27 Dios imalla munushkadaga imadash na pakushallami kangunamu nishkani.
28 Diosbuj Espiritumi michijkuna laya rikuchun churushka.
Kangunaga tuki crijkunadash kangunadash alli rikusha yuyin chapanguichi.
Mandujbuj yaurgun randishka Diosbuj iglillada michinguichi.
29 Ñuka rishka k'ipaga p'iña lobo layaguna shamusha tandanukushka crijkunada tukuchingu munanada yachanimi.
30 Shinalladi kangunapurallamundadimi paigunada katichun nisha maijingunaga yachagujkunamu llullusha yachachijkuna tukungaguna.
31 ¡Shinami rijcharij gaichi!
Kinsa watada tuti p'unlla kangunamu wakusha ima laya ñuka purinada yachachishkada yuyaringuichi.
32 “Wauki paniguna,
Diosmunbish Pai alligunada kushkamunda Shimimunbishmi kangunada mingani.
Kai shimiga kangunada jinchiyachi pudin;
Dios linshuyachishkagunapura japinada kui tukun.
33 Ñukaga pibuj kuchkidash kuridash churanadash na munashkanichu.
34 Ashtangarin ñukamush ñukan purijkunamush ima ministishkada charingujka ñukaj makillandij trabajashkadaga kangunaidi yachunguichimi.
35 Ñuka tuki rurashkabi jinchi trabajasha shujkunadash ima ministishkabi ayudanada yachachishkani.
Manduj Jesús nishka shina,
‘Shujkunamu kushaga japijta yalli kushiyanguichi,’
nisha yuyachishkada yuyaringuichi.”
36 Shina nishka k'ipami Pabloga kungurisha paigunandij Diosta mañaga.
37 Tukiguna manchanaidi wakusha ugllarisha Pabloda ñawi ichibi muchugaguna.
38 Tauga nishkamunda llakirishaga ʻÑukadaga kutinga na rikunguichichuʼ nisha kai nishkamunda manchanai llakirigaguna.
Chi k'ipaga barcogama paigun rigaguna.