Tesalonicabi bulla rurushkamunda
17
1 Pabloga Silaskun Anfípolis Apolonia pueblogunada rigusha Tesalónica pueblomu chayugaguna.
Chibimi israelgunaj Diosmunda yachana wasiga tiyaga.
2 Pabloga maibi gashash Diosmunda yachana wasigunamu chayuj gashkamunda kinsa semanada samana p'unllagunabi chimu risha Dios escribichishkagunabi rikusha paigunan parlanukushaga
3 Cristo llakichishka wañushash kausarina ministirishkadami rikuchiguga.
“Kai ñuka kangunamu nigushka Jesuslladi Cristomi gan,”
niga.
4 Shuj israelguna crishaga Pablon Silaskun tandanukuga.
Tauga Diosta yuyarij griegogunash tauga alli nishka warmigunashmi criga.
5 Shina taugaguna crishkada rikushami israelguna p'iñarisha ñanbi purijlla killa milli k'arigunada tandachisha chi pueblobi bulla rurungu kallarisha Pabloda Silastash japish nisha tukigunaj ñaubujmu pushungu nisha Jasonbuj wasimu p'iñalla waigusha mashkugaguna.
6 Ashtan paigunada na japishami Jasonda chaishuj crijkunadash chi puebloda mandujkunaj ñaubujmu aisusha kaparishaga,
“¡Maibish na allida rurusha shujta yachachisha purijkunami kaimush shamushka!
7 Jasonga paibuj wasibimi paigunada japishka.
¡Paigunami shuj jatun manduj Jesús nishka tiyashkada yuyasha Cesarbuj mandushkagunada na kazush nisha puringuna!”
8 Kaida uyushami taugagunash jatun mandujkunash manchanaidi kaparigaguna.
9 Shinash kacharichun kuchkida kunashkaiti kukimi Jasonda chaishujkunadash kacharigaguna.
Pablo Silasbish Bereabimishkamunda
10 Ña tuta gakimi crijkunaga Pablodash Silastash Berea pueblomu richun kachugaguna.
Ishkindij chimu chayushaga Diosmunda yachana wasimu rigaguna.
11 Chi israelgunaga Pablo nigushkada uyungu alli munusha shinashkada na shinashkada yachungu nisha Dios escribichishkadash p'unllandijta alli liyusha yachagushkamunda Tesalónica pueblobi kausujkunadash yalli valichishkagunamiga.
12 Paigunapuramunda tauga israelgunaga criga.
Griegomundash alli nishka charij warmigunaga tauga k'arigunashmi crigaguna.
13 Berea pueblobi Diosbuj Shimida Pablo yachachigujta yachushami Tesalónica pueblomunda israelguna risha bulla rurusha chibi taugalladijkunada jatarichigaguna.
14 Shina tukunmi crijkuna ut'kada jatun yaku kucha ladumu Pabloda kachuki ashtan Silasga Timoteon Berea pueblobi sakirigaguna.
15 Pablon Atenas pueblogama rijkuna kutin shamushaga Silasbish Timoteosh ut'kalladi Pablojmu richun nisha kachugaguna.
Pablo Atenasbi gashkamunda
16 Atenas pueblobi Silasta Timoteodash Pablo shuyagushami chi pueblobi rurushka dioskuna jundaidi tiyajta rikusha shungu raurajta llakiriga.
17 Shinushami Diosmunda yachana wasibi israelgunan Diosta yuyarij na israelgunanbish parlanukusha jatun lasabi tandanukujkunan p'unllandijta crichingu yuyachiga.
18 Shinaidi alli yachuj epicureoguna estoicogunash paigun rimanukungu kallariki shujkunaga,
“Kai maidash nisha purijllaga ¿imada ninshi?”
nikimi chaishujkunaga,
“Karu llaktamunda dioskunada parlujmishkanchin,”
nigaguna.
Pablo Jesusmunda Alli Shimida parlushkamunda wañushka k'ipa kausarina gashkada nishkamundashmi shina nigaguna.
19 Chimunda Areópago nishka tandanukushkamu pushusha risha,
“Kan mushuj yachachishkadaga ¿chi ima gashkada yachi pudinchichu?
20 Ñukuchi na yachushkagunada kan nijta uyishami imamunda shina nishkada yachush ninchi,”
nigaguna.
21 Atenas pueblomundagunash chibi kausuj karumundagunash tukigunami tandanukusha imalla mushuj uyarishkagunada parlanukusha kausujkunamiga.
22 Chimundami Areópago nishka tandanukushkagunaj chaubibi Pablo shayarisha kashna niga,
“Atenas pueblobi kausajkuna,
kangunaj dioskunada alli yuyarijkunashkadami ñukaga rikuni.
23 Kai pueblobi purigusha kangunaj dioskunada yuyarina wasigunada rikushami altarbish ʻNa rijsishka Diosta yuyarinamiʼ nisha escribishkada rikugani.
Chi Diostami na rijsishash yuyarijkuna gashkanguichi.
Chi Dioslladadimi kangunamunga niguni.
24 “Diosmi kai pachada kaibi ima tiyashkadash ruruga.
Pailladi jawa pachadash kai pachadash Mandujmi.
Makin rurushka diosta yuyarina wasigunabiga na kausunchu.
25 Pailladi na ministij gasha tukigunamu kausida samida tuki imagunada kuj gashkamundaga ñukuchij makigunan Paimun imada rurachunga na ministinchu.
26 “Diosmi shuj k'arillamunda tuki llaktagunada rurasha tuki kai achpabi kausachun nisha maibi tiyanada maijin watagunabi kausanadash churuga.
27 Kikin kausagushaidi Diosta mashkusha ima layash Paiyun tupanukuchun nishami shina ruruga.
Shina gakish Diosga na ñukuchimunda karubi tiyunchu.
28 Diosllamundami kausanchi,
kuyurinchi,
purinchi.
Kangunapuramunda alli yachuj escribijkunash,
‘Ñukuchiga Diosbuj wawaminchi,’
nishkagunami.
29 Diosbuj wawagunadij gashami kurin kuchkin rumin genteguna yuyushkada makin k'uilla rurushka dioskunada na Diosta shina yuyanachunchi.
30 Ñauba kausujkuna Diosta na rijsisha paigunaj munida rurusha kausukish Diosga imadash na nigachu.
Kununga tuki maibi kausujkuna juchagunada sakisha Diosmu vueltarichunmi mandun.
31 Dios yuyashka p'unllabi Pai agllushka Jesusmi kabishkada llakichisha tuki kai pachabi kausujkunada juchachichun kachunga.
Wañushkagunaj chaubimunda Paida kausachishami shina juchachichun kachanadaga tukigunamu alli rikuchiga,”
niga.
32 Shina wañushka k'ipa kausarishkada parlujta uyisha maijinguna na crisha asiki shujkunaga,
“Kutinmi kan parlushkada uyash ninchi,”
nigaguna.
33 Shinushami Pabloga paigunaj chaubimunda llujshisha riga.
34 Shina gakish maijingunaga katish risha crigaguna.
Areópago nishka tandanukujkunamunda Dionisiosh Dámaris warmish shujkunash chigunapurabimi gaga.