Bernabeda Saulodash kachashkamunda
13
1 Antioquía pueblobi gaj iglillabimi Dios nishkada parlujkuna yachachijkunash tiyaga.
Paigunaga kaigunamiga:
Bernabé,
Yana nishka Simón,
Cirene pueblomunda Lucio,
Galilea llaktada manduj Herodeskun pariju iñuj Manaén,
Saulosh.
2 Shuj p'unlla paiguna na mikusha Mandajta ʻAlliʼ nigukimi Diosbuj Espirituga,
“Ñuka agllusha kayashkada rurachunmi Bernabedash,
Saulodash anchuchibaichi,”
niga.
3 Shina nikimi na mikusha Diosta mañushka k'ipaga paigunaj jawabi makida churusha kachugaguna.
Bernabé Saulosh Chiprebi gashkamunda
4 Diosbuj Espíritu kachukimi Bernabesh Saulosh Seleucia pueblomu riga.
Chimundami barcobi sikusha Chipre islamu rigaguna.
5 Salamina pueblomu chayushami israelgunaj Diosmunda yachana wasibi Diosbuj Shimida parlugaguna.
Juanchu paigunada ayudashami puriga.
6 Tuki islada purishami Pafos pueblomu chayugaguna.
Chibimi Israelmunda yumbu Barjesuskun tupanukugaguna.
Paiga ʻDiosmunda parlujminiʼ nisha llullashami puriga.
7 Barjesusga Chipre islada manduj Sergio Paulon apanukujmiga.
Chi mandujka alli yachuj gashami Diosbuj Shimida uyungu nisha Bernabeda Saulondijta pushachun kachuga.
8 Yumbuga griego shimibiga Elimas shutimiga.
Paiga ama crichun nishami mandujtaga jarkungu munuga.
9 Shinushami Saulo pailladi Pabloga Diosbuj Espíritu junda gasha Elimasta rikuriashaga
10 kashna niga,
“¡Diabloj churi,
tuki allida na rikunachij!
¡Tuki llullashkan tuki milli ruranagunan jundashkangui!
¿Imashti Mandujbuj dirichu ñanda ishtuyachinadaga na sakingui?
11 Manduj llakichiki kunun na rikuj tukusha tauga p'unllagunadami indida na rikungui.”
Shina ninmi Elimasbuj jawabi yanamanga ansan uriyaki makimunda pushachun nisha maijindash mashkaga.
12 Shina tukujta rikusha Sergio Pauloga Mandujmunda yachachiki kushilla mancharishami criga.
Pablo Antioquiabi parlushkamunda
13 Pabloga paigun purijkunandi Pafos pueblomunda barcobi sikushami Panfilia llaktabi gaj Perge pueblomu chayuga.
Chibi paigunada sakishami Juanchu pailladi Marcos nishkaga Jerusalén pueblomu kutin shamuga.
14 Perge pueblomundaga Pisidia llaktabi gaj Antioquía pueblomu rigaguna.
Chibimi samana p'unlla Diosmunda yachana wasimu waigusha tiyarigaguna.
15 Moisés mandashka escribishkagunadash Dios nishkada parlujkuna escribishkadash liyushka k'ipami Diosmunda yachana wasibi pushujkuna parlachun kachashaga kashna niga,
“Waukiguna,
imaidash kushiyachina shimigunada charishaga kunundi tukigunamu parlabaichi.”
16 Shina nikimi Pabloga jatarisha makin upayachun rikuchishaga kashna niga,
“Israelgunash Diosta manchuj na israelgunash,
uyichi.
17 Israelgunaj Diosmi ñukuchij ñauba taitagunada agllushka.
Paigunadaga na Egiptomunda gakish Diosmi Egiptobi taugagunada mirachishka.
Chi k'ipami Paibuj ruri pudijllan chimunda llujshichisha
18 shitushka pushtubi chusku chunga (40) watada paiguna ima na alligunada rurakish Diosga aguantashami
19 Canaán llaktamunda kanchis llaktada chingachishtasha ñukuchij ñauba taitagunamu chi achpada kuga.
20 Chigunaga chusku patsuj pichka chunga (450) shina watabimi p'aktuga.
“Chi k'ipaga Dios nishkada parluj Samuelbuj p'unllagama mandachun nishami juezkunada churuga.
21 Chimunda shuj jatun manduj paigunada mandachun nisha Diosta mañukimi Benjamín nishka tribumunda Cisbuj churi Saulda churaki chusku chunga (40) watada mandaga.
22 Diosga Saúl mandashkada kichushka k'ipaga David-da mandachun churushami,
‘Isaíbuj churi David Ñukaj shunguda kushiyachijta tuki Ñuka munushka shinada rurujta yachashkani,’
niga.
23 Davidbuj wawagunaj wawagunallamundadimi Kishpichij Jesusta israelgunamu Diosga Pai nishka layadi kachushka.
24 Jesús narij shamujllabidimi Juanchuga tuki israelgunamu ʻJuchagunada sakisha Diosmu vueltarisha bautizarichiʼ niga.
25 Juanchuga paibuj rurana tukurigukimi,
‘Ñukadaga ¿pidi gani,
yuyanguichi?
Na chichuni,
a ashtan ñukaj k'ipami shuj shamunga.
Paibuj chakimunda pargati watashkalladash paskungu na kabinichu,’
niga.
26 “Uyichi,
Abrahambuj wawaguna ñukaj waukiguna Diosta manchuj na israelgunagunash.
Kai kishpichij shimigunaga ñukuchimumi gan.
27 Jerusalenbi kausujkuna paigunada mandujkunash Jesusta pi gashkadash Dios nishkada ñauba parlujkuna escribishkada samana p'unllandi liyashkadash na yachugagunachu.
Shinakish paigunalladi Jesusta wañuchichun kachasha Dios nichishkada p'aktachigaguna.
28 Jesusta wañuchingaj ima na alli rurushkada na japishash Pilatodaga Jesusta wañuchichun nisha mañagaguna.
29 Diosbuj Shimibi Paimunda tuki nishkada p'aktachishka k'ipa cruzmunda uriyachisha ut'kubi pambugaguna.
30 Shina gakish Diosga wañushkagunapuramunda kausachigami.
31 Jesusga Galilea llaktamunda Jerusalenmu Paiyun rigujkunallamumi tauga p'unllagunada rikuriga.
Paida rikujkunami kununga Paimunda israelgunamu parlujkuna gan.
32 “Shinushami Alli Shimida kangunamu parlagunchi:
Diosga ñukuchij ñauba taitagunamu ʻKushaʼ nishkada
33 Jesusta kausachishalla paigunaj wawashkamundaga ñukuchimu p'aktachishkami.
Salmos capítulo dosbi nishka laya ‘Kanmi Ñukaj Churi gangui.
Kununga Ñuka Kambuj Taita tukugani’b niga.
34 Diosga wañushkagunaj chaubimunda Jesusbuj aicha ama ismuchun kausachiga.
Kai nishka tiyan:
‘David-da mingushash p'aktachinash alligunada kusha nishkadaga kangunamumi kusha,’
c nishkami.
35 Shinushami shuj Salmobish,
‘Kambuj Jucha Illujbujta ama ismuchun sakinguichu,’
d nishka tiyan.
36 “Davidga pai kausi p'unllagunabi kausujkunada Dios munashka shina mandashka k'ipa wañuki paibuj ñauba taitagunaj kuchubi pambuga;
paibuj aichaga ismugami.
37 Ashtan Dios Kausachijbuj cuerpoga na ismugachu.
38-39 Shinusha waukiguna,
Moisés mandashkada katinaga ima juchachinash illuj tukuchun na pudinchu,
ashtanbish Jesús kangunaj juchagunada perdoni pudishkada yachichi.
Mashnalla Jesusta crijkuna Paimundami ima juchachinash illuj tukun.
40 Yuyin ganguichi.
P'akta Dios nishkada parlujkunaj escribishka kangunabi p'aktanmu:
41 ‘Rikichi,
Ñuka nishkada na valichisha rimujkuna,
mancharisha chingarichi.
Chi p'unllagunaga Ñuka rurashkada shujkuna intindichikish kangunaga na cringuichichu,’
e niga.”
42 Pablo Bernabendij Diosmunda yachana wasimunda llujshiki chibi gajkunaga shamuj samana p'unllash chigunalladadi nisha katichun mañugaguna.
43 Diosmunda yachana wasibi parlanuki tukuriki tauga israelguna Dios yuyilla gaj israel tukushkagunash Pabloda Bernabedash katisha rigaguna.
Paigunaga ʻDios kushka alligunada na kungarisha ñaubujmu katinguichiʼ nisha yachachigaguna.
44 Chi katij samana p'unllabi kazi tuki chi pueblobi kausujkuna Mandajbuj shimida uyungu tandanukugaguna.
45 Israelgunaga taugalladijkuna tandanukujta rikusha ama crichun munasha p'iñarisha Pabloj parluda jarkungu nisha rimugaguna.
46 Chimundami Pabloga Bernabendij na manchushalla jinchi shayarisha kashna nigaguna,
“Kanguna israelgunamundimi kallaribiga Diosbuj Shimida yachi chayachishkaga ministiriga.
Kanguna na uyanachisha na tukurij kausida na valichikimi na israelgunajmu rishun.
47 Mandujka ñukuchidaga
‘Kandaga na israelgunaj luz laya gachunmi churushkani,
pish na chayushka karubi kausujkunamu Ñukaj kishpichinada apachun’f nisha manduga.”
48 Kishna nijta uyushami na israelgunaga kushiyasha ʻMandajbuj nishkaga allimishkaʼ nigaguna.
Mashnalla Dios na tukurij kausida japichun agllashkagunaga criga.
49 Shinami tuki llaktabi tiyajkuna Mandujbuj shimida yachi chayaga.
50 Kashna nigukish israelgunaga paigunaj Diosta yuyarij ʻAlliʼ nishka charij warmigunan shinaidi chi puebloda pushuj k'arigunamushmi na alli yuyigunada kugaguna.
Pabloda Bernabedash katik'ichushka gachun jatarichisha kai llaktamunda llujshichiga.
51 Chimundami Pablosh Bernabesh chakimunda achpada chaspisha chiguna na alli gashkada rikuchisha Iconio pueblomu rigaguna.
52 Shinash yachagujkunamig Diosbuj Espíritu jundashka gasha kushilla kausugaguna.