Pedro ima laya rurashkada nishkamunda
11
1 Diosbuj Shimida na israelgunash crishkadami Jesusbuj agllashkaguna Judea llaktabi crijkunash yachi chayugaguna.
2 Jerusalén pueblomu Pedro ichiyamukiga circuncisión parti crijkunagaa paida rimagaguna.
3 “¿Imashti na israelgunaj wasimu risha paigunan mikugangui?”
b nisha tapugaguna.
4 Pedroga kallarimunda pacha ima tukushkada ningu kallarishami,
5 “Ñukaga Jope pueblobi kausagusha Diosta mañagukimi k'uilladi sueñobi laya shuj jatun linsu shina chusku puntabi watushka jawa pachamunda ñuka tiyashkamu uriyamujta rikugani.
6 Chida alli rikukimi chusku chakiyuj animalguna,
sachabi tiyuj p'iña animalguna,
llukusha purijkuna,
alisyujkunashmi rikuriga.
7 Shinalladi rimarisha,
‘Pedro,
jatarisha wañuchisha miki,’
nijta uyushami
8 ñukaga,
‘Mana,
Mandaj.
Mapayashka mikunaga shuj kutinllash na ñukaj shimimu waigugachu,’
nigani.
9 Shina nikimi jawa pachamunda kutin rimarishaga,
‘Dios ʻLinshushkami ganʼ nishkadaga ʻMapallami ganʼ ama nichu,’
niga.
10 Kinsa kutin shina tukushka k'ipami jawa pachamu kutin tukiguna ichiyashka gaga.
11 Shina tukunmi Cesarea pueblomunda ñukamu kachushka kinsa k'arigunaga ñuka tiyashka wasimu chayamuga.
12 Diosbuj Espiritumi ʻImadash na yuyarishalla paigunan ringuiʼ nisha manduga.
Shinami kai sujta waukigunandi chi kachuj k'aribujmu risha wasimu waiguganchi.
13 Paiga ima laya shuj ángel paibuj wasibi shayarisha,
‘Simón pailladi Pedro nishkada pushamuchun maijindash Jope pueblomu kachi.
14 Paimi ima laya kanda kambuj familiagunandij kishpichinashkadash ninga,’
nijta rikushkada ñukuchimu niga.
15 Ñuka rimaringu kallarikimi Diosbuj Espirituga ñukuchimu kallaribi shamuj layaidi paigunaj jawamush uriyamuga.
16 Chida rikushami,
‘Juanchuga yakullanmi bautizaga,
ashtan kangunaga Diosbuj Espiritunmi bautizashka ganguichi,’
nisha Mandaj nishkada yuyarigani.
17 Dioslladi ñukuchimu layaidi Manduj Jesucristoda crishkamunda na israelguna gakish paigunamush kushka.
Shinakimi ñukaga ʻDios,
ama kuichuʼ ningujka imash na ganiga.”
18 Chida uyashami crijkunaga upalla sakirisha kashna niga,
“Diosga na israelguna juchada sakisha Paimu vueltariki kausida charichun kushka,”
nisha Diosta ʻAllimi ganguiʼ nigaguna.
Antioquiabi crijkunamunda
19 Ishtikuda wañuchishka k'ipaga katik'ichushkamunda risha chingarishka crijkunamunda shujkunaga Fenicia llaktamu Chipre islamu Antioquía pueblomu risha israelgunallamu Diosbuj Shimida parlagugaguna.
20 Shina gakish Chipre islamunda Cirene pueblomundash maijin crij k'ariguna Antioquía pueblomu chayushami na israelgunamush Manduj Jesusmunda Alli Shimida parlagaguna.
21 Mandajbuj imadash rurajllan paigunan gakimi taugaguna crisha Mandajmu vueltariga.
22 Jerusalenmunda crijkuna kaida uyushami Bernabeda Antioquía pueblomu kachugaguna.
23 Chimu chayusha Dios alligunada kushkamunda ima rikuchishkagunada rikusha kushiyashami ʻMandajta na sakisha tuki shungun alli katinguichiʼ nisha tukigunamu yachachiga.
24 Bernabega alli k'ari Diosbuj Espíritu junda gasha tuki shungun crijmiga.
Shinushami taugaguna Mandajta criga.
25 Chi k'ipami Bernabega Tarso pueblomu Sauloda mashkungu riga.
26 Chibi japishami Antioquía pueblomu pushusha riga.
Wata jundadami shuj crijkunan taugagunamu yachachisha tandanukugaguna.
Antioquía pueblobimi yachagujkunadaga ʻCristoda crijkunamiʼ nisha shutichi kallarigaguna.
27 Chi p'unllagunami Dios nishkada maijin parlujkunaga Jerusalenmunda Antioquía pueblomu riga.
28 Paigunapuramunda Ágabo shuti Diosbuj Espíritu yuyida kuki shayarishaga ʻJatun yarijimi tuki kai pachabiga tiyangaʼ niga.
Shina nishkaga Roma llaktada jatun manduj Claudioj mandanabimi p'aktuga.
29 Shina tukukimi chi yachagujkuna ayudangu yuyarishaga paiguna pudishkan imalladash Judea llaktabi crijkunamu kachugaguna.
30 Shinada rurusha Bernaben Saulon yuyijkunamu kuchun kachuga.