Ishtiku rimarishkamunda
7
1 Jatun manduj curaga,
“Kanda juchachigushkaga ¿shinaidichu gan?”
nisha Ishtikuda tapukimi,
2 paiga kashna niga,
“Waukiguna taitaguna,
uyichi.
Ñukuchij jatun k'uilladi Diosmi ñauba taita Abraham narikish Harán pueblobi kausungu risha Mesopotamia llaktabi gajllabidi rikurishami
3 kashna niga ‘Kambuj achpada,
familiagunadash sakisha ʻÑuka rikuchishaʼ nishka achpamu ri.’
4 Chimundami Abrahamga Mesopotamiabi tiyashka Caldea llaktamunda llujshisha Haranbi kausungu riga.
Paibuj taita wañushka k'ipami Diosga Abrahamda kunun kanguna kausashka achpamu pushamuga.
5 Shina pushamushash achpadaga chaki sarunaidash na kugachu.
ʻKan wañushka k'ipa kambuj wawagunaj wawagunamumi kushaʼ niga.
(Chi p'unllagunaga Abrahamga narij marayujchuga.)
6 Diosga shinaidi ‘Kambuj wawagunaj wawagunaga na rijsishka karu llaktabi kaususha chusku patsuj (400) watagunada esclavogunada rurushkash jinchi rurachisha takusha llakichishkami kausunga.
7 Sirvijta rurusha llakichij llaktada Ñuka llakichishka k'ipami chimunda llujshisha Ñukada ʻAlli k'uillami ganguiʼ nisha kaibi kausunga,’
niga.
8 Diosga Abrahamdaga paigun ari ninukushkada p'aktachingajka ‘K'ari llullu marada circuncisión nishkada rurachun’ nishami manduga.
a Shinushami paibuj churi Isaac wacharishka pusuj p'unllabi Abrahamga paibuj marada aicha karada p'itiga.
Isaacbish paibuj churi Jacobda Jacob-bish paibuj churigunadash shinaidimi ruruga.
Jacob-buj churigunaga Israelmunda chunga ishki (12) ñukuchij ñauba taitagunamiga.
9 “Paigunaj wauki Jozida na rikunachishkamundab Egipto llaktamu pushuchun k'atusha kachugaguna.
Shinash Dios Jozin gashami
10 ima llakimundash llujshichisha Egipto llaktada manduj faraonmu alli rikurichun alli yuyigunada kuga.
Chimundami faraonga paidaga Egipto llaktada k'ipa manduj gachun shinaidi paibuj wasibish mandujta ruraga.
11 “Chi p'unllagunabi Egiptobi Canaanbishc yariji tukukimi manchanai llaki tukuga.
Ñukuchij ñauba taitagunash chi llaktabi ima mikunash illashkamunda mikunada na japigagunachu.
12 Chimundami Jacobga Egiptobi mikuna tiyajta yachi chayusha paibuj churigunadad kachuga.
Chimu paiguna rishkaga kallarillamiga.
13 Kutin k'ipamu rikimi Joziga paigunaj waukishkadaga niga.
Chibimi faraonga piguna Jozij waukigunadi gashkadash yachuga.
14 Chi k'ipami Joziga paibuj taita Jacobda familiagunadash Egiptomu pushamuchun kachuga.
Paigunaga kanchis chunga pichkapuramiga (75).
15 Shinakimi Jacobga Egiptobi kausungu riga.
Paish ñukuchij ñauba taitagunash chibi kausushka k'ipa wañugaguna.
16 Jacob tullugunadae Siquem shuti pueblomu apusha rishaga Abraham Hamorbuj churigunajta mirga kuchkin randishkaf ut'kubimi pambuga.
17 “Dios,
Abraham-mu ʻKai llaktada kushamiʼ nishka p'unllaguna p'aktamugukiga israelguna Egiptobi mirarisha taugagunami tukuga.
18 Chi p'unllagunabimi mushuj jatun manduj Egiptoda mandungu kallariga.
Paiga Jozidaga na rijsijchuga.
19 Chi mandujka ñukuchigunada ñukuchij ñauba taitagunadash engañasha llakichisha,
ʻWacharishkalla k'ari maragunada shitusha wañuchun sakinguichiʼ nisha manduga.
20 “Chi p'unllagunami Moisesga wachariga.
Diosta kushiyachij mara gakimi paibuj taita mamaga kinsa killagama pakushami paigunaj wasibi iñachiga.
21 Ashtan yakubi wambuchun sakiki Faraonbuj ushi japisha paibuj churida laya iñachiga.
22 Chimundami Moisesga egiptoguna yachachishka iñusha imadash rurajllan gasha rimarinabish ruranabish alli alli tukuga.
23 “Chusku chunga watada p'aktachishami Moisesga paigunapura wauki pani israelgunada rikungu munusha riga.
24 Egiptomunda shujka israelda takujta rikusha Moisesga jarkungu risha takushkamunda p'iñarisha egiptoda wañuchiga.
25 Moisesga ʻÑukaj wauki pani israelgunaga ʻDiosmi paidaga llakimunda llujshichichun kachushkaʼ nisha yuyangagunamiʼ nisha yuyaga.
Shinash israelgunaga na yachagagunachu.
26 Kayundikish Moisesga kutin ishki israelgunapura takanukujta japiga.
Chigunadash jarkungu munasha kashna niga,
‘Kangunaga waukindijminguichi.
¿Imasha kangunapura takanukunguichi?’
27 “Shina nikimi takagujka Moisesta t'angushtasha,
‘¿Pidij kandaga ñukuchida mandusha juez tukuchun churuga?
28 ¿Egiptoda kaina wañuchishka layaidichu,
ñukadash wañuchisha ningui?’
niga.
29 Shina nijta uyushami Moisesga mitikusha Madián llaktamu riga.
Chibimi karu llaktamunda chayuj shinalla kaususha kazarasha ishki marada chariga.
30 “Chusku chunga wata k'ipami Sinaí urku kuchu shitushka pushtubi zarza yura rupashkabi shuj ángel rikuriga.
31 Shina rikuriki Moisesga mancharisha kushiyashash ashtan alli rikungu nisha kuchuyashami Manduj rimarijta uyuga,
32 ‘Ñukaga kambuj ñauba taitagunaj,
Abrahambuj,
Isaacbuj,
Jacob-buj Diosmi gani.’
Shina niki Moisesga rikunadash mancharisha ch'ujchuringu kallariga.
33 Shinushami Mandujka ‘Kambuj chakimunda pargatida surki.
Kan sarushka achpaga Diosbujlla gashkamunda ima mapash illujmi gan’ niga.
34 ‘Egiptobi tiyaj Ñuka agllashkaguna llaki apagushkada rikugani.
Jiguigujtash uyuganimi.
Shinusha llakimunda llujshichingajmi shamugani.
Shami kandaga Egiptomumi kachasha.’
35 “Moisesta na uyanachisha israelguna ‘¿Pidij kandaga ñukuchida mandusha juez tukuchun churuga?’
nishka jawash Diosmi rupaguj zarzabi rikurij angelda kai Moisesga mandujkish llujshichijkish tukuchun kachaga.
36 Shinushami Moisesga ñukuchij ñauba taitagunada Egiptomunda llujshichiga.
Shina llujshichishami pi na ruri pudishkagunada na rikushkagunadash Egiptollabidi Jatun Puka Yakubi chusku chunga (40) watada shitushka pushtubish rurusha rikuchiga.
37 “Kai Moiseslladimi israelgunadaga niga ‘Dioslladimi kangunamunda ñuka layaidi Pai nishkada parlujta agllunga.’
38 Moisesga shitushka pushtubi ñukuchij ñauba taitaguna tandanukushkan gashami Sinaí urkubi paiyun rimarij angelgun tupasha na tukurij kausida kuj shimigunada ñukuchimu yachachichun ángel kuga.
39 “Shinash ñukuchij taitagunaga na kazush nisha Moisesta shitusha Egiptomu kutin ringu munagaguna.
40 Aaronda kashna nigaguna ‘Ñukuchida pushachun dioskunada ruri.
Egiptomunda llujshichimuj Moisésg ima tukushkadash na yachunchichu.’
41 Shina nishami billi musrha diosta rurushaga animalgunada wañuchisha rupachisha paigunaj maki rurashka diosmu pishtada rurusha kushiyagaguna.
42 Shinushami Diosga paigunamunda laduyasha jawa cielobi tiyaj luzerogunada ʻAlliminguichiʼ nichun sakiga.
Shinami Dios nishkada parlujkunaj escribishkabish tiyan
‘Israelguna,
chusku chunga (40) watada
shitushka pushtubi gashash
¿Ñukamunchu animalgunada wañuchisha
kuganguichi?
Mana.
43 Ashtangarin Moloc nishka dios tiyana carpada,
dios Refanbuj luzerogunada,
kangunaidi ʻAlliminguichiʼ
ningu nisha rurushka musrhagunadash apariganguichi.
¡Chimundami kangunadaga kaimunda llujshichisha,
Babilonia llaktada pasusha ashtan karumumi kachusha!’h
44 “Ñukuchij ñauba taitaguna shitashka pushtubi gasha tuldushka wasidamii chariga.
Chi wasiga Moisesmu rikuchishkada Dios rurachun mandushka shinaidimi rurushkaga.
45 Chi wasida japishka k'ipaga ñukuchij ñauba taitagunaga Josué mandaki apusha shamuga.
Dios paigunada ñaubusha na israelgunada llujshichikiga israelgunaga waigusha paigunamunda achpada japiga.
Rey David kausi p'unllagunagama chi wasida kaibi chariga.
46 Davidga Diosbuj alligunada japishami paiga ʻÑauba taita Jacob-buj Dioslla,
Kan chibi kausachun ñuka wasichichun sakibaiʼ nisha mañaga.
47 Shinakish Diosbuj wasidaga Davidbuj churi Salomonmi ruruga.
48 Shina gakish jawa pachabi gaj Jatun Mandaj Diosga makin rurushka wasibi na kausunchu.
Dios nishkada parluj nishka shinaga,
49 ‘Jawa pachaga Ñuka mandungu tiyarinami.
Kai pachaga Ñuka chaki sarunami gan.
¿Ima laya wasida Ñukamunga rurunguichi?
¿Ñuka samanaga maibidi ganga?’
nishami Mandujka nin.
50 ‘¿Nachu Ñukaidi tuki kaibi tiyajkunada rurugani?’j
51 “Kangunaga upa shina jinchi shunguk imadash na uyush nijkunami ganguichi.
Kangunaj ñauba taitaguna layami Diosbuj Espiritudash nalladi valichinguichichu,”
nisha katiga Ishtikuga.
52 “Kangunaj taitagunaj taitagunaga Dios nishkada parlujkuna ʻKabishkada Rurujka shamungamiʼ nisha ñaubamunda pacha yachachijkunada katik'ichusha wañuchigaguna.
Shinalladimi kangunash Paidaga na alligunamu japichisha wañuchichij ganguichi.
53 Dios mandushkada angelguna kangunamu kuki japishash na kazuganguichichu.”
Ishtikuda wañuchishkamunda
54 Tandanukushkaguna shina nijta uyushami kiru kanirisha karrusk'ichisha Ishtikun manchanai p'iñarigaguna.
55 Shinash Ishtikuga Diosbuj Espíritu junda gasha jawa pachada rikusha Diosbuj k'uilla p'alanigushkada Jesustash Diosbuj alli ladubi shayagujta rikuga.
56 “¡Rikichi!
Jawa pacha paskarishkadami rikuni.
Aichayuj tukushka Churishl Diosbuj alli ladubi shayajtashmi rikuni,”
niga.
57 Ishtikuda paigunaj rinrinda tapusha tukiguna ut'ka kuchuyashami jinchida kaparisha
58 chi pueblomunda llujshichisha rumida pigugaguna.
Chi juchachijkunaga paigunaj churanagunada Saulo musumumi mingugaguna.
59 Rumigunan pigagukimi Ishtikuga Diosta mañusha,
“¡Mandaj Jesús,
ñukaj espirituda japibai!”
niga.
60 Chi k'ipa kungurishaga,
“¡Mandajlla,
paigunaj juchada ama rikunguichu!”
nisha jinchida kaparishaga wañugallami.