Bautizaj Juanchuda wañuchishkamunda
14
1 Chi p'unllagunalladimi Galileada manduj Herodesga Jesusmunda ima nisha parlajta uyusha,
2 paibuj sirvijkunamu niga,
“Paiga Bautizaj Juanchumi;
wañushkamunda kausarishkanchin.
Shinushami pish na ruri pudishkagunada ruragun.”
3-4 Juanchu Herodesta,
“Kambuj wauki Felipej warmi Herodiastaga kambuj warmida laya charinaga na kabichugun,”
a nishkamundami Herodesga Juanchuda japichiga.
Chimundami watusha pushush risha carcelbi churugaguna.
5 Chi llaktabi kausujkunaga,
“Juanchuga Dios nishkada parlujmigun,”
nisha crishkamunda Herodes paida wañuchingu munushash manchuga.
6 Herodes watagunada p'aktachisha pishtada rurakimi tuki chi pishtabi tiyujkunaj ñaubuki Herodiasbuj ushi llujshisha dansakimi Herodes manchanaidi munushaga,
7 “Kan ima mañushkadash kushaidimi,”
nisha juraga.
8 Shinushami chi solterada mamun yachachiki,
“Bautizaj Juanchuj umada shuj ichibi kui,”
nisha Herodesta mañuga.
9 Shina mañuki Manduj Herodesga llakiriga.
Shina gashash tuki chi pishtabi gajkunaj ñaubuki ʻChi soltera ima mañushkada kushaidimiʼ nisha jurashkamundaga kuchun mandusha,
10 paibuj soldadogunada Bautizaj Juanchuj kungada p'itingu richun carcelmu kachuga.
11 Chi k'ipami Juanchuj umada shuj ichibi apamusha chi solteramu kuga.
Solteraga paibuj mamunmu kuga.
12 Juanchubuj yachagujkuna chayushaga Juanchu wañushkada apush risha pambuga.
Chi k'ipami Jesusmu parlungu rigaguna.
Pichka warangagunamu karushkamunda
13 Shina tukushkada yachusha Jesús barcabi sikusha shitushka pushtumu Pailla chibi gangu chimunda riga.
Taugalladiguna shina rigushkada yachusha chi pueblogunamunda llujshishami chakinlla Jesusta katisha rigaguna.
14 Jesusga barcomunda uriyasha taugalladigunada rikusha paigunamunda shungundijta llakirisha tuki ungushkagunadami alliyachiga.
15 Ña tutayagukimi Paibuj yachagujkuna kuchuyashaga,
“Ña tutayagunmi.
Kai pushtuga shitushkaidimigun.
Shinusha gentegunada kachabai,
paiguna risha pueblogunabi mikunada randisha mikuchunguna,”
nigaguna.
16 Shina niki Jesusga,
“Na ministingunachu ringujka;
kangunaidi karichiri,”
niga.
17 Paida katijkunaga,
“Pichka tanda ishki chaulaidami charinchi;
ashtanga illujminchi,”
niga.
18 Shina niki Jesusga,
“Apamichi kaimu,”
niga.
19 Chimunda tukigunada kanis jawabi tiyarichun manduga.
Chi k'ipa Jesusga pichka tandada ishki chaulada japisha jawa pachada rikusha Diosta ʻDiosolopaiʼ nisha tandada chaubisha Paibuj yachagujkunamu kuki chi tukigunamu karuga.
20 Tukiguna sajsungamami mikugaguna.
Shinash chi p'akishka tandaguna puchushkada tandachikiga chunga ishki canasta jundami gaga.
21 Chi mikujkunamunda k'arigunalla pichka warangagunamamishkanga (5.000),
warmigunadash maragunadash na cuentujllabidi.
Yaku jawada Jesús purishkamunda
22 Chi ratuidimi Jesusga Paibuj yachagujkunada ʻBarcabi sikusha yaku kucha ch'imbamu Ñukada ñaubusha richiʼ nisha kachuga.
ʻÑukaga kaibi gentegunada ʻShuj p'unllagamachiʼ ningumi sakirini.ʼ
23 Shina kachushka k'ipaga Jesusga Pailla Diosta mañungu shuj urkumu ichiyaga.
Ña tutayaki Paillami chibi gaga.
24 Achpamunda yakubi barca ña milgada karuyasha riguki,
ñaubujmunda manchanai waira t'anguki yaku kaimu chaimu apik'ichuga.
25 Narikish p'unllayajllabidimi Jesusga Paibuj yachagujkunaj kuchumu yaku jawada purisha riguga.
26 Shina yaku jawada purijta rikusha Jesusbuj yachagujkunaga pachunlladi mancharisha,
“¡Kukuminchin!”
nisha mancharisha kaparigaguna.
27 Shina kaparinmi Jesús parlarishaga,
“¡Jinchi gaichiri!
¡Ñukaidimi gani;
ama manchichichu!”
niga.
28 Shina nikimi Pedroga,
“Manduj,
Kandij gashaga yaku jawada Kambuj kuchumu ñukash ringu mandabai,”
niga.
29 Jesús,
“Shamilla,”
niki Pedroga barcamunda uriyasha yaku jawada purisha Jesusbujmu riguga.
30 Ashtanbish pachunlladi wairada rikusha manchuga.
Yakubi millpuringu kallarishaga,
“Manduj,
kishpichibai,”
nisha kapariga.
31 Shina kaparinmi Jesusga Pedroda makimunda charirishaga,
“Ashallada crij k'ari,
¿imashti na crigangui?”
niga.
32 Paiguna barcabi sikukiga wairash chi pushtubimi chulunlla sakiriga.
33 Chida rikusha mashnalla barcabi gajkuna Jesusbuj ñaubuki kungurisha,
“Kanga Diosbuj Churidimishkangui,”
nigaguna.
Genesaretbi Jesús alliyachishkamunda
34 Yaku kuchada ch'imbushami Genesaret llaktamu chayugaguna.
35 Chibi kausujkuna Jesusta rijsishaga tuki chi muyundij llaktabimi shimi shimi parlusha yachi chayachigaguna.
Shinushami tuki ungushkagunada pushusha rishaga,
36 “Kan churarishka churana manyawaidash tupachun sakibai,”
nisha Jesusta mañagaguna.
Mashnalla tupujkunaga tukigunami alliyachishkagunaga.