GLOSARIO
A
Abba ʻAbbaʼ nishkaga arameo shimimunda gan; yayunda k'uyushami shina nijkunaga. Jesús Taita Diosta k'uyusha Paidaga shinami niga.
agllashkaguna (agllusha kachashkaguna) Diosbuj shimida tuki gentegunamu parlachun Jesusbuj p'unllagunabimi gentegunamunda chunga ishkigunada Paidi agllushaga kachuga. Jesusbuj agllashkagunaga kai versogunabi tiyan: Mateo 10.2-4; Marcos 3.12-19; Lucas 6.12-16. Judas Iscariote wañurishka k'ipaga Matiku agllashka gaga. apóstoles
Aichayuj Tukushka Churi Jesús Diosbuj Churi gashash María miruki wacharishkamunda paibuj churi gashami aichayuj tukushkada nin. Ñauba Testamentobi Aichayuj Tukushka Churi nishaga Dios kachana gashka Cristoda nishami shina nin (Dn 7.13-14). Hijo del Hombre
Aleluya Diosta jatunyachingu kaida nin.
alfa Kaida nishaga griego shimibi kallarina letradami nin.
alma Ñukuchij cuerpoga wañungallami. Ñukuchij almaga espíritu gasha naidi wañungachu.
Alli Shimiguna Jesús k'uyasha maijinsh Paida crijta kishpichingu shamuga. Chimundami kushiyanchi. Buenas Nuevas, Evangelio
Allimu Pushaj Allimu Pushaj Espíritu nishaga Diosbuj Espiritumunda parlan. Diosga ñukuchin gachun kachan; Paiga yachachij, kushichij, Dioskun allichichijmi ganga. Consolador
ángel Dios nishkada shujmu parlajmi gan. Jawa pachabi Diosta kazusha Paida sirvingu gajkunami.
arameo Jesús kai pachabi kausagushka wataguna israelgunaj parlana shimidami nin. Marcos 15.34bi Jesusga arameo shimin parlaga. Maijingunaga ishki shutigunada chariga: arameobi, griegobish. Arameobi Cefas nishaga griegobi Pedro nin; Tabita nishaga Dorcas nin.
ari ninukushka Diosbuj Shimibiga ishki laya ari ninukushkagunada parlan. Taita Diosga ñauba Abrahamgun ari ninukusha paida, paibuj wawagunaj wawagunada, tuki kai pachabi kausujkunadash bendiciangu ari nishka (Hch 3.25). Shinash genteguna ari ninukushkadaga na p'aktachikiga k'ipa p'unllaguna mushujta Diosga ruraga, “Ñukami paigunaj Dios gasha. Paigunaga Ñukaj gentemi ganga,” nisha (Heb 8.6-10). Mushuj ari ninukushkadaga Jesusga ñukuchij juchagunada chingachingajka Paibuj yaurda jichusha p'aktachiga (Lc 22.20). pacto
ayaguna Kaigunaga gentegunada llagmuj, unguchij, chugrichij espiritugunami. Maijinguna ayaguna katishka tukushaga libri muspayashka tukun. Satanasbuj rurasha pai nishkada parlajkunami shinaidi rurujkunami. Shinakish Jesusbuj shutibi ñukuchikish ayagunada mandi llujshichi pudijmi ganchi. espíritus malignos, espíritus impuros, demonios
ayunana Diosta yuyaringajmi gentegunaga na mikushalla kainan. Diosta mañash nishkamundaga Paida crishkamundash shuj, ishki na gashaga asha p'unllan na mikushalla kaini pudinchi.
B
Baal Shutigunamunda p'angabi rikubai.
bautizana Maijin gente tuki shungun Jesusta kazusha katingu kallarishaga tuki gentej ñaubuki divirti crij tukushkada yachi chayachun yakubi armashka tukun.
Beelzebú Shutigunamunda p'angabi rikubai.
bronce Cobren estañonbish rurashka metalmi. Juanchuga Aichayuj Tukushka Churij chakigunada llambushkama laya p'alaniguj broncemu rijchajtami rikuga (Ap 1.15).
C
cárcel Mandashkagunada na kazujkunada puebloda mandujkuna carcelbi churan.
censo Shuj llaktabi tuki gajkunada cuentanadami nin. Jesús narij wachariki Augusto Cesarga pai mandashka kausajkunada paigunaj shutida apuntachichun manduga.
chakatana Cruzbi lavun churusha wañuchinami. Romanogunaga shina laya Jesusta ruruga. crucificar
circuncisión Abrahambuj p'unllamunda pacha kunungama pusuj p'unllayuj k'aridami israelguna circuncisionda ruranguna. Circuncisión nishkaga ullu umaj aicha karada p'itichishkadami parlan. Kallarishkabi ñauba ari ninukushkabiga tuki israel k'arigunamu, ruku gakish, circuncisión nishkada rurachiga. Dioskun ari ninukushkada rikuchingu israelgunaj ñauba taita Abrahamga chashnada ruraga.
crijkunada rikusha pushuj Chunga ishki agllushkagunaj p'unllagunabiga tauga crijkuna mirarishaga kaibi chaibi tauga iglillaguna tukungu kallariga. Chimundami paigunaga iglillaguna ima laya katigushkada rikusha ayudachunmi Diosbujta rurachun mingashka pushujkunada aglluga. obispo
Cristo ʻDios agllasha kachashkaʼ pushtuda rikubai.
Cristoda p'iñaj Cristoda na kazusha na uyujkunamunda shuj millida ruruj, Cristoj munushkada naidi munuj, Paida vincish nisha takujmi (1Jn 2.18). anticristo
curaguna Curagunaga juchayujkunabujka Diosta mañasha shinaidi sacrificiogunada Diosmu kujkunaga. sacerdotes
curagunada mandujkuna ʻManduj curagunaʼ pushtuda rikubai.
D
Dios agllasha kachashka Taita Diosga Jesusta agllusha Pai kishpichisha mandachun kachashka. Israelgunaga jatun manduj gachun Paida chapaga (Jn 1.41). Cristo (griego), Mesías (hebreo)
Dios escribichishka Kaida nishaga Ñauba Testamentoda Mushuj Testamentodash nin (Jn 10.35; 2Ti 3.16; 2Pe 1.20). escrituras
Dios nishkada parluj Gentegunamu parlachun Diosmunda parlashkada japisha parlujmi. Diosmunda yachasha ima tukunadash parlujmi gan. Jesús narij wachariki taugagunami tiyaj gashka. profeta
Dios randisha kishpichina (Diosbuj gachun randina) Tuki genteguna Dios mandashkada na p'aktachi pudishkamundaga llakichishkaguna gangaj gaganchi. Dios kushka alligunamunda kai pachamu Cristo shamushaga Paidij jichushka yaurgun randisha tuki genteda kishpichiga. redimir
Diosbuj Espíritu Shujlla Dios gashash kai pacha narij rurashaidi kinsaguna layami tiyaga: Taita Dios, Paibuj Churish, Diosbuj Espiritush. Diosbuj Espirituga Pentecostés p'unllabi Jesusbuj agllushkagunaj jawabi uriyasha podergun shamuga (Hch 2). Crijkunaj shungubi yuyibi gasha ayudajmi. ʻAllimu Pushajʼ pushtuda rikubai. Espíritu Santo
Diosbuj Malta Oveja Ñauba israelgunaga Diosbuj kishpichishkaguna gangajka ovejada wañuchisha rupachisha Diosmu kumbidasha kujkunaga. Kununga Diosga, gentegunada kishpichingajka Jesús wañusha kausarishkamundaga chiyunmi gentedaga linshugunada ruran. Cordero de Dios
Diosbuj mandana Diosbuj mandanaga kai pachabi Jesús alliyachisha yachachisha purishka urasbi kallariga. Jesusta tuki crijkunaga maibi gashash Diosbuj mandanabimi gan. Reino de Dios
Diosbujlla gachun rurana (linshuyachina) Diosbuj Espirituga crijkunaj shungu mapa illuj gachun linshuyachin. santificar
Diosmu kusha rupachina Israelgunaga Diosta yuyarijkish Pai munushkada tukibi p'aktachijkish gashkada rikuchingu kai rupachinadami ruraga. Altarbiga Diosmu ofrendada rurusha animalgunada japisha rupachishami Diosmu kuga. Altarbi animalgunadash granogunadash rupachiki k'uilla ashnarikimi Diosga kushiyaga. holocausto
Diosmunda yachana wasi Israelgunaga chibi tandanukusha Diosta jatunyachisha Paida mañusha Paimunda yachagugaguna. sinagoga
E
Emanuel Jesusbuj shutigunamunda kaiga “Diosga ñukuchinmi,” nin.
eunuco Kapashka k'aridami nin. Ñaubamunda pacha jatun mandujbuj warmida sirvijkunaga kapashka gagaguna.
F
fariseoguna Paigunaga israelpuralladimi. Moisés mandashkagunada, ñauba taitaguna yuyashka yachachishkadash p'aktachichingu gajkunamishka. Jesusbuj p'unllabiga Pai ima na allida na rurakish fariseogunaga kaida chaida llagmusha juchachijkunaga.
G
griego Grecia llaktabi wacharisha kausajkunaga shinadami parlujkunaga. Jesús purishka p'unllagunabiga tauga llaktagunabimi griegoda parlujkuna tiyaga. Mushuj Testamentobiga escribijkuna griegobi escribiga.
H
Hades Wañushkagunaga Dios juchachingagama chibimi chapan. Hadesga paibi tiyaj wañushkagunada vueltachingami. Juchachishka k'ipa Jesusta na crijkunada uku pachamunga shinaidi Hadestaga nina kuchamunga Dios kachanga.
hebreo [1] Ñauba taita Abrahambuj churij churigunamunda hebreodami nin; maijin israelgunamunda paida hebreodash nin.
[2] Israelgunaj shimimi. Ñauba Testamentoda hebreobi escribiga.
hosana Hebreo shimibi Diosta jatunyachingu shinami nin. Sarunga ʻKishpichibaiʼ nisha niga.
I
iglilla Mushuj Testamentobi ʻiglillaʼ nishaga tandanukuna wasidaga na ninchu, ashtan Jesucristobi tuki crijkunadami nin. ʻTandanukushka crijkunaʼ pushtuda rikubai.
iglillabi ayudaj Pabloga iglillabi ayudajkuna ima laya ganada yachachisha pish na juchachibuj gachun niga (1Ti 3.8-13). diácono
ima juchash illuj Ima juchash illujka Diosllami. Paida na kazujkuna gashkamundaga Pai juchachishkaguna ganchi. Shinakish Diosga Paida kazusha Jesucristobi crijkunada ima juchash illuj tukuchun perdonasha kishpichinmi. Ña kishpichishkagunamunga Diosbuj Espíritu ima juchash illuj kausana poderda kun. santo, sin pecado
ima mapa illuj Diosbuj ñaubuki juchayujkuna gashkamundaga mapayashka shinaguna ganchi. Diosga Jesusta crijkunadaga Pai linshuyachishkadami rikun. puro, sin mancha
impuesto Jesusbuj tiempobi imada randishkamundash k'atushkamundash kausashkamundash israelgunaga impuestoda paganamiga. Israelgunapuramunda impuestoda cobrujkunaga Roma llaktada jatun mandajmumi kuna gaga. Chida cobrujkunaga mandujmunga na illujta kusha yalli japishkadaga paigunami japijkuna gashka.
incienso Kai especiagunada rupachisha k'uilla ashnariguj kushni jawa pachamu Diosmu kuj shina ichiyachijkunaga. Dios jatun gashkada rikuchingu inciensoda rupachin.
israelguna
[1] Ñauba taita Isaacbuj churiga Jacob shutimi gaga. K'ipami Diosga Jacobda Israel nisha shutichishka. Jacob-buj wawagunaj wawagunaga Israel nishkagunami gan.
[2] Judá shinaidi Benjamín nishka tribuguna llujshishka k'ipa nortebi tiyaj chunga tribugunada Israeldami nishka.
[3] Ñauba Testamentobiga Israel llaktamunda gentegunaga Diosbuj agllashkagunamiga. Abrahambuj wawagunaj wawagunamiga.
israelgunada mandujkunapura tandanukushka Israel gentegunami shuj shinalla mandungaj tandanukushka. Paigunaga israelgunada kanchis chunga (70) mandujkunamishka. Curagunada jatun manduj curaga chi kanchis chungagunada pushaga. Maijinsh juchachishka tukukiga paigunami alli na alli gashkada yachungu tandanukushka. Jesusbuj p'unllabiga Conciliobi gajkuna Jesús wañuchun juchachishash na paigunalla wañuchi pudiga; Roma llaktada mandusha gobernadorga wañuchichun mandi pudiga. Concilio, Junta Suprema, Tribunal
J
jatun manduj Maijin llaktabi tukida mandujmi. Jesusga mandujkunadash yalli Jatun Mandujmi. rey
jatun manduj cura Moisesbuj kausi p'unllagunabimi Diosga kallaribi Aaronda Paimu sirvisha cura gachun aglluga. Shinushami ñaubamunda pacha Israel llaktabiga Aaronbuj churigunaj churiguna jatun manduj curagunami tukumushka. Paigunami watabi shuj p'unllalla Diosbujti ukumu waigushaga tuki israelgunaj shinaidi kikinlladikish juchagunamunda Dios kishpichichun sacrificioda rurujkuna gashka. Sumo Sacerdote
jatundi ut'ku ʻJatundi ut'kuʼ nishaga manchanaidi jundu yanamanga ut'kudami nin. Milli espirituguna chibi ichkushka tiyashka shinaidi mancharibujti animalga chimunda llujshinga. Jesusga Paida na kazujkunadaga chi ukumu shitungu ganga. Satanasbish chimunga shitushka ganga. abismo
jawa cielo Indi, luna, luzeroguna, p'uyugunash maibi purishka pushtumi. cielo físico y visible
jawa pacha Taita Dios kausashka pushtumi. Jesusbish chimundami kai pachamu uriyaga. cielo; morada de Dios y ángeles
Jerusalén Jerusalenga ñaubamunda Israel llaktabi gaj jatun pueblomi gan. Sarungunabiga Salem shutida nigaguna (Gn 14.18). Chibiga Rey David kausaga shinaidi paibuj churi Salomón chillabidi k'uilla jatun wasida Diosmu ruraga. Chimunda k'ipa watagunabiga Diosbujlla gaj pueblo nisha shina niga (Ap 11.2).
Jesús wañushkada yuyarisha mikuna Jesusga wañuna uras kuchuyamuguki yachagujkunan mizabi tiyarisha, Paibuj cuerpomunda yaurmundash parlasha, tandada mikuchun vinoda ubiachunbish paigunamu kuga (Mt 26.17-29; Mc 14.12-25; Lc 22.7-23; Jn 13.21-30). Kunun p'unllagunaga kikin ima laya gashkadash, Jesús ñukuchimunda wañushkadash alli yuyarishami chi tandada mikusha copamunda ubiashash Diosta kazunchi. Santa Cena
juchagunada p'ichushtaj Cristo Paibuj cuerpoda kurisha cruzbi wañusha ñukuchij juchagunada anchuchijmi; Pailladi juchagunada perdonashka gachun p'ichushtajmi tukuga. propiciación, sacrificador para perdon de pecados
juchagunada sakisha Diosmu kuchuyana Juchagunada Dios perdonachun nishaga maijin gentesh kikinlladi na alliguna rurushkada yuyarisha llakirisha, tuki shungun Diosmu kuchuyasha, “Kutin na rurashachu; Diosta kazushami,” nisha p'aktachish nina. arrepentirse
Juez Cristoj ñaubuki Chibi maijin na allida rurajta llakichina, allida rurajtaga ʻAlliʼ nina pushtumi. Jesucristo Juez gashkada yachusha ñukuchi kabishkada rurasha Pai mandashkada kazusha Paida kushiyachina munilla kausanchi. tribunal de Cristo
K
kushka alliguna Diosmi tuki gentegunada k'uyasha llakishaga alliguna tukuchun, na wañibuj tukuchun na kuna gakish manchanaidi kumbidashka. Dios ñukuchida kishpichishkamunda Pai kushka alligunada rikuchingu gentegunada ima ministishkabi Dios munushka shina kushilladi ayudi pudinchi. gracia
kutin wacharina Jesucristoda maijin crijka wacharij shina Diosmunda mushuj kausida japinami. Diosbuj Espiritumunda wacharijkunaga Diosbuj mandanamunga waigui pudingami (Jn 3.1-21). nacer de nuevo
k'uilla kausi Jesusga tuki ñukuchi genteguna Paida crishaga Dioskun alli tukusha kausachun cruzbi chakatashka wañuga. Diosga kai k'uilla kausida kunmi. paz
L
levadura Tandada rurungu asha levadurada kutabi churusha chapuki masada p'unguichin. Jesús yachachishaga, Diosbuj mandanadash (Lc 13.21) fariseogunaj na alli rurashkagunadash (Lc 12.1) levaduran ch'imbapurusha yachachin. Ashalla gashash milgadi mirari pudin. Ñauba tiempobi kununbish “Pascua” p'unllamunda kanchis p'unllagama, israelgunaga levadura illij tandada mikujkunami gan.
levita Levitagunaga Leví shuti tribumunda gasha Diosbuj wasibi sirvisha israel curagunada ayudajkunallami gaga. Aaronbuj churigunaj churigunadaga Leví tribumunda gakish jatun manduj curaguna tukushkamundaga, ña na ʻLevitaʼ nishkagunachuga.
ligítimu Israelgunaj ligítimu churiga taita wañuki familiada pushuj tukuga. Wañushka taita kushkamunda chi ligítimu churiga waukigunaj vali ishki kutin valida japiga.
linshuyachishkaguna Ñaubamunda pacha juchayuj genteguna gashkamundaga mapayashkaguna ganchi. Jesús Paida maijin crijkunadaga Diosbujlla gachun chi juchayujkunadaga mapayashkada mailluj shinami linshuyachin. purificados, santificados, santos
luz Ñukuchi rikuchun indimundama imallamundash Dios rurashka p'unllayachij energiami. Jesusbish “Ñukami kai pachaj Luz gani; maijin Ñukada katijka yanamangabiga nalladi puringachu,” niga (Jn 8.12).
M
Malta Oveja Diosmu kuna animalgunamundaga malta ovejadami yalli kujkunaga. Jesusga Diosmu kuna sacrificio gashkamunda Diosbuj Malta Oveja nishkami gan. Cordero
Malta Ovejaj warmi Jesucristoda katijkuna shinaidi tuki pushtubi gaj iglillagunamunda crijkunami. Kai warmij Kusaga kausarishka Jesuslladimi gan. Malta Ovejan kazarana p'unlla ñalla chayamugushkamundaga k'uilladi churarij shina parijaringu ministinchi. esposa del Cordero
manduj curaguna Israel curagunapuralla tandanushkabi mandajkunami. Jesusbuj tiempobi Israel llaktabi gaj Diosbuj wasibi sirvisha curagunami. principales sacerdotes, jefes de los sacerdotes
Mesías ʻDios agllasha kachashkaʼ pushtuda rikubai.
michij Bibliabi wakinllabi michijta nishaga crijkunada llakisha pushajta michijtami nin. pastor
O
omega Kaida nishaga griego shimibi tukurina letradami nin.
P
Pascua p'unlla Israelgunaga kai pishtadaga watabi shuj kutin ruran. Dios Egiptobi llakigunamunda Dios llujshichishkadami rikuchin. Moisés kausashka p'unllagunabi israelgunaj wasi pungugunada animalbuj yaurgun señalashkamunda, Diosga paigunaj ligítimu churigunada na wañuchiga; egipciogunaj ligítimu churigunallada wañuchiga.
Pentecostés p'unlla Pascua p'unllamunda pichka chunga p'unllaguna k'ipa Pentecostés nishka pishtada yuyarijkunaga. Jesús jawa pachamu rishka k'ipaga Pentecostés p'unlla chayuki Jesusbuj yachagujkunaga Diosbuj Espíritu parlachiki shuj shimigunabi rimaringu kallarigaguna. Kinsa waranga gentegunaga crijkunami tukuga (Hch 2.1-42). Chimunda kunun p'unlla iglillaga Pentecostés p'unllabi kallariga.
pi k'arin na purij Pi k'arin na purij tuki warmigunada yalli rijsishka warmiga Mariami. Diosbuj Espirituga podergun Mariaj jawamu shamuga. Chimunda paibuj mara Jesusga Diosbuj Churimiga. virgen
piyunbish siririna Diosbuj Shimibiga laruidimi gan: Kusa warmindij sirinukunaga allimi. Piyunbish sirinukunaga na allichu. fornicación, inmoralidad sexual
R
randisha kishpichina Millimunda llujshichisha randinami (Gl 3.13); kikinbujta kutin randina. redimir
Roma llaktada jatun manduj Shutigunamunda p'angabi César pushtubi rikubai.
S
sacrificio Sacrificio nishaga juchagunamunda animalgunada Diosmu kunadami nisha nin. Israelgunaga Abraham-munda pacha, Dios linshuyachichunga malta ovejada wañuchisha rupachisha rurujkunakishka. Mushuj ari ninukushkabiga Jesusga Kikinlladi kurishami shuj kutinlla sacrificio gashka. Jesucristoj sacrificiomunda yachash nishaga Hebreos 5; 7—10da liyabai. Kunun p'unllagunaga Diosmu sacrificioda kungajka Dios munushka shina allida rurasha kausana ganchi.
saduceoguna Paigunaga Israelpuralladimi; taugagunaga curagunami. Fariseoguna layaga Jesusta na rikunachijkuna. Wañushkaguna kausarinamundaga fariseoguna crij gakish saduceogunaga na crijkunachuga.
salmoskuna Diosta jatunyachina poemaskunami.
samana p'unlla Semanabi tukurij p'unllabi israelgunaga samasha Diosta adorajkunamiga. Viernes indi waiguna urasmunda sábado indi waiguna urasgamami gaga. sábado, día del reposo
samariamundaguna Israel llaktada kinsada chaubisha Samariaga chaubibi tiyajmi. Samariamundaguna na israelgunan chagrushka yaurda charishkamundaga linshu yauryuj israelgunaga Galileabi kausashash Judeabi kausashash, Samariamundagunada na rikunachiga. Chimunda na Samaria llaktada chimbush nigaguna. samaritanos
Satanás Shutigunamunda p'angabi rikubai.
sello
[1] Apocalipsis 5—6biga kururashka papelda kanchis sellogunan churashkadami parlan. Chi kanchisgunaga kai pachamu kachana llaquigunadami parlan.
[2] Kausuj Diosbuj sellomi; chi selloga Diosbujlla gajkunaki churashka gana gaga (Ap 7; 9.4; 14.1).
[3] Mancharibuj animalbuj sellomi; mancharibuj animalda ʻAlliʼ nijkunaga frentebi na gashaga makibi paibuj selloda churachishkadami parlan. Chi selloga número 666mi gan (Ap 13.16-18; 14.9-11; 16.2, 20).
T
tandanukushka crijkuna Mashna Jesucristobi crijkunaga Paibuj cuerpomi. iglesia
tribu Ñauba taita Jacob-buj chunga ishki churigunamunda cada churij wawagunaj wawaguna shuj tribu nishka tukuga.
W
wainayaj Kazadu gashash shujkun siririjkunadami nin. Ama shina llaki tukuchunga Marcos 10.11bi Jesusmi parlan. adúltero
wañushkaguna kausarina Jesusga wañushkagunada kausachijmi. Juan 5.29bi Paiga, “Tuki allida rurujkunami kausida charingu kausaringaguna, ashtanbish na allida rurujkunaga llakichishka gangajmi kausaringaguna,” nisha nin. resurrección de los muertos
watushka shina (sirvichun randishka) Gentegunaga Dios mandashkada na kazujkuna gashkamundaga juchada rurungu watushka shina ganchi. Shinash Jesús kai pachabi gente tukushaga, “…kabishkada rijsinguichimi, chi kabishkami kangunadaga kacharichinga,” niga (Jn 8.32). esclavo
Y
yachaguj Pushujbuj yachachishkada crisha paida katigujmi. Jesusbuj yachagujkunaga Paida crisha, uyasha, kazunmi. discípulo
yachuj tukushkaguna Arabia llaktabi Persia llaktabi luzerogunada rikujkunamiga. Gentegunaga maijin suñuki suñi rikuchishkada yachujkuna yachi pudishkada criga. magos
yanaguna “Ayaguna” pushtuda rikubai. espíritus malignos, espíritus malos, demonios
yuyijkuna Iglillabi sinagogabish pushujkunami. Dios mingushka ovejaguna layada michin; maijinbish ungushka gaki Manduj Jesusbuj shutibi aceiteda k'akusha Diosta mañan. Tuki crijkunada ima laya ruragushkada rikusha chapariagujllagunamigun. ancianos