Israel nunakunapa reynin yurikunanpaq ninqan
5
(4.14) Jerusalén nunakuna, defendikuyänëkipaq alistakuyë.Qamkunata atacayäshunëkipaq forastëru nunakunam chäyämunqa.
Pëkunam venciyäshurniki mandakuqnikikuna reyta qaqllanchö wilukïkuyanqa.
2 (1) Belén Efrata marka, Judáchö këkaq wakin markakunapita mas takshalla kaptikipis qamchömi Israel nunakunapa reynin yurikunqa.†
Pëqa unëpita patsam këkan.
3 (2) Llulluta warmi qeshpikushqanyaqran contrankunapa makinchö Israel nunakunata Teyta Dios jaqirinqa.
Wamra yurikuriptinnam Israel nunakuna witsikashqa këkäyashqanpita kutiyämunqa.
4 (3) Tsë wamra winarkurnam Teyta Dios yanapaptin üsha mitsiqnöpis kuyashqan nunakunata shumaq rikanqa.
Mëtsëchöpis nunakuna pëta adorayaptinmi Israel nunakuna pitapis mana mantsakushpa yamëna kawakuyanqa.
5 (4) Pëmi salvamäshun yamëna kawakunantsikpaq.
Tsë witsan Asiria nunakuna markantsikta atacar palaciuntsikkunaman yëkayämuptinpis pärapuyänanpaq atska capitankunatam kachashun.
6 (5) Tsë capitankunam espädankunawan Asiria nunakunata vencirir munëninchö katsiyanqa.
Tsënöpam Nimrodpaa markanpita salvamäshun.
Contrankunata Israel nunakuna venciyänanpaq ninqan
7 (6) Jacobpita miraqkunata wakinta wanuratsiyaptinpis kawëkar quedaqkunaqa mëtsë markakunachöpis respetashqam kayanqa.
Shullapisb tamyapis Teyta Diospa bendicionnin kashqannömi pëkunaqa llapan marka nunakunapaq bendición kayanqa.
8 (7) Mëqan markapis contran shärir atacayaptinqa chucaru animalkunata león atacaqnömi Israel nunakuna atacayanqa.
Imëka mallwa león üshakuna kashqanman yëkïkur wanutsir ushashqannömi pëkunapis contrankunata wanutsir ushayanqa.
Kawëkaqtaqa manam jukllëllatapis jaqiyanqatsu.
9 (8) Teyta Dios, tsënömi Israel nunakunapa llapan contrankunata ushakäratsinki.
10 (9) Tsë contran nunakunatam Teyta Dios kënö nin:
“Tsë junaqmi cawallïkikunatapis chipyëpa wanuratsishaq.
Guërra carrëtëkikunatapis llapantam ushakätsishaq.
11 (10) Markëkikunatapis y ratakuyänëkipaq shäritsiyashqëki següru wayikunatapis llapantam juchutsir ushakätsishaq.
12 (11) “Brüjukunatapis llapantam ushakätsishaq.
Suerti rikaqkunapis qamkunachö manam kanqanatsu.
13 (12) Adorayashqëki ïdulukunatapis y wanka rumikunatapis ushakätsiptï kikikikuna rurayashqëki dioskunata manam imëpis adorayankinatsu.
14 (13) Asera diösapaq jawiyashqëki titaq qerukunatapis llapantam ushakätsishaq.
Markëkikunatapis llapantam juchutsir ushakätsishaq.
15 (14) Alläpa piñakurmi mana cäsumaq nunakunataqa më markachö täräyaptinpis castigashaq”.