25
“Pipis kikikikunapura liryarqa autoridäman ishkan liryaq ëwayätsun. Autoridäkunanam jutsannaq kaqta libri kacharinqa y jutsayuq kaqtanam sentenciayanqa. 2 Sitsun jutsayuq kaqta sentenciayanqa astayänanpaq, urkunpis patsaman chanqanyaq qonqurïkatsirmi jutsa rurashqanmannö juez astatsinqa. 3 Ima kaptinpis chusku chunka (40) kuti mastaqa ama astayankitsu.† Alläpa astayaptikiqa tsë marka mayiki penqakunqam.4 “Ërachö trïguta jalutsir töruman ama bozalnin churayankitsu.†
5 “Sitsun tsë wayillachö ishkaq wawqikuna täräyanqa y juknin kaq tsurinnaqlla wanukunqa, pajun manam juntakanmantsu juk casta nunawanqa. Qowanpa wawqinmi tsë pajuwan juntakanqa. Tsënöpam cumplinqa wawqinpa pajunwan täränanpaq këkaq leyta. 6 Tsë pajuchö punta kaq tsurinmi wanuq wawqinpa shutinta aparanqa. Tsënöpam difuntupa shutin Israelchö ushakanqatsu.†
7 “Sitsun tsë nuna wawqinpa pajunwan juntakëta munanqatsu, tsë paju ëwar quejakunqa markaman yëkunachö këkaq anciänukunamanmi. Tsëchömi kënö ninqa: ‘Cuñädü manam munantsu wawqinpa shutin Israel nacionchö ëwaränanta. Manam munantsu ley ninqannö noqawan juntakëta’. 8 Tsënam anciänukuna cuñädunta qayëkatsir parlapäyanqa llumtsïnin pajuwan juntakänanpaq. Sitsun pëkuna parlapäyaptinpis juntakëta mana munanqatsu, 9 llumtsïnin pajum anciänukunapa nöpanchö cuñädunpa llanqinta qochirkur qaqllanchö toqapïkur ninqa: ‘Kënömi rurantsik pï nunatapis wawqinpa shutin ëwaränanta mana munaq kaqtaqa’. 10 Tsëpita patsam tsë nunata y pëpita miraqkunatapis ‘qala chakikuna’ nishpa reqiyanqa.
11 “Ishkaq ollqukuna pelyëkäyaptin jukninpa warmin chëkur qowanta washanqanta qowan maqaqta rurunpita aptakurkuptinqa 12 tsë warmipa makinta mana ankupashpa roquriyanki.
13 “Imata rantirpis o imata rantikurpis balanzëkiwan ama engañayankitsu. 14 Tsënölla tupïkikunapis cabal kaqlla katsun. 15 Balanzëki y tupïkipis complëtu kaptinmi Teyta Dios qoykushunëkipaq këkaq nacionchö atska wata alli kawayanki. 16 Balanzawan y tupukunawan suwakuyaptikiqa Teyta Dios alläpam piñakun.†
Amalecita nunakunata ushakätsiyänanpaq ninqan
17 “Ama qonqayëtsu Egiptupita shamïkäyaptiki amalecita nunakuna contrëki kayanqanta. 18 Yarpäyë utikashqa këkäyaptiki taripëkuyäshurniki qepatsashqa këkaq nunakunata maqayanqanta. Amalecita nunakunaqa Teyta Diosta mana mantsakurmi tsënö atacayäshurqëki. 19 Tsëmi qoykushunëkipaq këkaq nacionchö contrëkikunata ushakätsiyänëkipaq Teyta Dios yanaparkuyäshuptiki amalecita nunakunatapis mana qonqëta ushakätsiyanki.†