Wayapapis walminwan rispitanaculcänanmi
3
1-2 Chaynütac amcunapis walmicuna,
wayapayquiman sujitaculcay.
Chayćha Diospa shiminman mana chalapacücunäpis mana imactapis nillaptiqui allin cawsayniquip allincäman filtacalcämunman,
tuqui allin cawsayniquita,
rispïtu caśhayquita lical.
3 Amcunap sumä tuqui chipyayniqui ama janällayquićhuꞌa caycuchunchu:
ñächapacuycunalla,
ürucunapi aläjacunalla,
nï allin ćhaniyu müdanacunallawanꞌa.
4 Aśhwanpa rasun mana camacä tuqui cawsayca śhunꞌuyqui lulićhu caycuchun,
llampu śhunꞌuwan jawca caycuycäpis.
Chayꞌa sumä-sumä ćhaniyümi Tayta Diospá.
5 Chaynümi unaypis Tayta Diosman manchacuywan chalapacü allin walmicunaca wayapanman sujitaculcäśhanpa chipyaycälila.
6 Chaynümi Sarapis wayapan Abrahamta cäsucul “taytalláy” nila.
Amcunapis allinpa cawsaycul imapïpis mana manchaculcalꞌa paypa wawinmi capäcunqui.
7 Chaynütac amcunapis wayapacuna,
walmiquiwan tuquip cawsaycäliy pishi śhunꞌu pishi callpa caycälishanpa jinaman Taytanchicpa llaquipayninpïta cawsayta pulayquipis ćhasquipäcuśhayquipa.
Chaynu-ari cawsaycäliy mañacuyta imapis mana mićhacuśhunayquipä.
Mana allincäwan ama-ari cutichicuyalcaychu
8 Má,
chayurá llapayquipis tuquip cawsapäcuy,
juc śhunꞌulla,
cuyanacul,
llaquipänacul,
mana nunatucullal ima.
9 Mana allincäta lulaśhuptiquipis mana allincäwan ama-ari cutichicuyalcaychu,
nï palaśhuptiquipis palaywan cutichicuyalcaychu,
aśhwanpari allincällawan.
Chay allincäta ćhasquiycälinayquipämari ayaśha amcunapis capäculanqui.
10 Chaymari niyan:
“¿Sumä cushicuy jawca bïda pasaytachun munanqui?
Chayurá mana allin limaycunäpi alluyquitari sujitacuy.
Shimiquipi casquicuna ama-ari imaypis yalaycamuchunchu.
11 Mana allincunäpïta japächacul allincällactari lulaycuchun.
Jawca cawsaycällacta ashiycul chaymannuy cawsaycuchun.
12 Taytanchicmari allincäćhu cä nunancunacta ñawillanćhu caycachin;
linlinpis uyat-uyatyayanmi ayacuynincunacta uyaliycunanpäpis.
Mana allin luläcunäpäñatacmi ichá cuntran cayan”a nil.
13 Amcuna allincäta lulayalcaptiquiꞌa ¿mayantan imanapäcuśhunquimanpis?
14 Masqui allin lulapäcuśhayquipïta ñacachipäcuśhuptiquipis ¡sumä allinpa licaśham capäcunqui!
Chayurá paycuna manchaculcäśhanta ama-ari manchaculcaychu,
nïtac jucmanyapäcuypischu.
15 Aśhwanpa Salbacü Jesusninchicta Duyñuyquitanuy śhunꞌuyquićhu uywaycäliy.
Chaynütac shimi puntallayquićhu caycuchun alcaycapäcuśhayquipi tapupäcuśhuptiqui ima niycunayquipäpis.
16 Ñatac niycälilꞌa llampu śhunꞌuyu,
chuya śhunꞌuyu,
tuqui allinpa niycäliy.
Chaynüpaćh Jesusćhu allin capäcuśhayquipi yanꞌal tumpäcunaca limaśhanpi uyshulapäcunꞌa.
17 Allin lulaśhanchicpi ñacanapä Tayta Diospa munaynin cayaptinꞌa,
mas allinmi chay mana allincäpi ñacanapïtá.
18 Quiquin Jesusninchicmari juc cutilla pasaypipab juchanchiccunapïta wañula;
Pay mana juchayu cayalpis jucha-sapacunäta Diosman puśhaycuyninwanmi wañula.
Nuna cayninćhuꞌa wañulam;
ispiritu cayninćhüñatacmi ichá cawsamula.
19 Chay Ispiritup munayninćhu cayalmi ćhänalä ispiritucunäman willaycü lila.
20 (Má,
chay ispiritucuna cala Noé timpućhu mana cäsucücunämi.
Aw-ari,
chay barcucta ishpichiy camacänancama Dios pasinsiawan alcaycuśhancamapis paycuna manamá uyaliculcälachu.
Chaymi pusä nunalla yacuwan wañunanpi salbaculcäla.
21 Chay cala bawtisacunapä tincuycachisha-yupaymi.
Chay bawtisacuywan Jesus śhalcamuyninpa wañuycäpi juluycuśha caśhanchictam camalaycachinchic.
Manamari yacuwan aychanchic chuyaman muyuśhanpachu,
sinuꞌa chuya śhunꞌuwan Tayta Diosman limalicuśhanchicpam.)
22 Cananñatacmi janay pachäćhu Tayta Diospa lädunćhu Jesus cayan.
Paymantacmi lluy anjilcunapis,
mandacücunapis,
llapa munayniyücunapis sujitaculcan.