Jesus uycuśhancá wiñaypämi
10
Chay camachicuy quiquin Dios janay pachäćhu rasun lulaycunanpä llantuynin-yupayllam;
manamari quiquin rasuncäćhu.
Chaymi imaypis jinalla watan-watan Diosninchicman uycunanpä aśhuycücunäta mana chuyanchaycunchu.
2 Atipaptinꞌa manañaćh jucha-sapactañachu licaculcanman,
nïtac yawarcunactapis uycuyalcanmanñachu.
3 Aśhwanpa cay lulaycuśhancunaca watan-watan yalpalcachin śhunꞌunćhu juchancuna jinalla caśhantam.
4 Cay capishcunap türucunap yawarnincuna śhunꞌunchicćhu cä juchacunäta manamá chincachiyta atipanmanchu.
5 Chaymi cay pachäman Jesus śhamul Diosta nila:
“Yawarcunactapis nï uycunactapis mana munalmi aychäta lulaycamälanqui.
6 Manamari juchancunapi uywacuna cañaycuśhanpis imaymana uycuśhuśhayquicunäpis śhunꞌuyquipächu cala.
7 Chaymi nilá:
‘Tayta Diosní,
yaꞌapi isquirbishayqui limaśhanmannümi cayćhu cayá ampa munaśhayquita lulaycunäpä’ ”a nil.
8 Canan,
má,
tantiaycäliy cay punta nishanta:
“Yawarcunacta nï uycunacta nïtac juchancunapi imaymana uycuśhuśhayquicunätapis mana munalmari śhunꞌuyquipächu nï cala” nil.
Caytam nin masqui caycunacta lulaycälinanpä quiquin camachicuy niyaptinpis.
9 Chaypïtá:
“Cayćhümi cayá munaśhayquita lulanäpä” nilam.
Cay nishanwan punta limanacuycäta jululculmi juc muśhüta ćhulaycun.
10 Chay munaśhanmannuy Jesusninchic quiquinpa aychanta juc cutilla wiña-wiñaypä uycuśhanpam canan mana juchayüña chuyanchäśha caycunchic.
11 Rasunpa,
cay pachäćhu puydï sasirdüticunaca watalcul watalcul chay lulaycunacta jinallam lulayalcan juchacunacta mana imaypis chincachiy atipayaptinpis.
12 Jesusmi ichá juchanchic-laycu juc cutilla yawarninta wiñay simpripä uycul Tayta Diospa allïnin-lädunćhu quïdacula.
13 Chayćhümi alcayan ćhïnïnincunacta ćhaquinman uyshuycachimunancama.
14 Caynu juc cutilla uycuśhanwanmi Dios japächaycuśhancunäta wiña-wiñaypä chuyanchäla.
15 Caynu caśhanta Chuya Ispiritupis tantialpachimanchicmi cay nishanwan:
16 “Tayta Dios caynütam niyan:
‘Chay muyun nunäcunamanmi limalicuśhä caypi:
camachicuynïta umanmanmi ćhulaycuśhä;
śhunꞌunmanpis isquirbiycuśhämi’ nil”.
17 Jinaman nilpunmi:
“Juchancunapïpis mana allin lulaynincunapïpis manañam imaypis yalpalcuśhäñachu”b nil.
18 Chayurá juchacunaca pampachäśha cayaptinꞌa manañam juchacunapi imallacta uycunanchicpis canñachu.
Sasachacuycunaćhüpis tacyaycäliy
19 Chaymi,
chalapacü-masïcuna,
rasun Sumä Chuya Sityuman,
quiquin Diosninchic caśhanman,
Jesuspa yawarninpa sumä chalapacüśhaña canan yaycuchwan.
20 Rasun curtïna cä quiquin aychanpam cawsayta uycü muśhü caminucta quićhaycapamanchic yaycunanchicpä.
21 Paymari Diospa lluy nunancunaćhu sumä puydï sasirdütinchic cayan.
22 Chaymi Tayta Diosman aśhuycunanchic llapan śhunꞌunchicwan,
masïsu chalapacuyninchicwan,
tantiayninchicpis śhunꞌunchicpis aychanchicpis chuya yacuwan-yupay lluy jinantin sumä chuyanchäśhaña.
23 Ñatac “Diosta alcaycümi” niyanquimari.
Chayurá payman jinallari masïsu chalapaculcay;
payꞌa chalapacunam;
limalicamäśhanchicta lulaycunꞌamá.
24 Chaynütac llapanchic cuyanacuytawan allin lulaycäta lulaycuypïta afanacuśhun.
25 Amatac amcuna juntunacuyta caćhaycapäcuychu waquincuna chaynu yaćhacäśha cayalcaptinpis.
Aśhwanpa Jesusninchicpa cutimunan cayllaćhüña cacuyaptinꞌa callpanchanacuycuśhun mastalä canpis.
26 Ñatac rasuncäta tuquicta yaćhayal juchacta pursïpa jinalla luläcunäpá manañam juc canchu juchan-laycu ima uycunanpäpis.
27 Aśhwanpa manchanaśh cäraycunan muyuncäwan,
Diospa llapa ćhïnïnincunacta camacaycunanpä wiñay simpri nina walä ñacaycällañam alcayan.
28 Ñatac ¿manachun Moisespa camachicuyninta jalutacücunäpä ishcay quimsa licänin captinꞌa mana llaquipaycul wañuchina cala?
29 Chayurá ¿manachun mas-mas mućhuycuytalä ćhasquiycunan Diospi śhamü chulinta jalutacücá,
chay limalicamäśhanchic yawarninpa chuyaman muyuycachimäśhanchiccäta yanꞌal anlapä licäcá,
jinaman llaquipaycü Chuya Ispiritucta paläcá?
30 Lisinchicmari chay “Yaꞌapam cutichiycuycá,
tincüninmanmi pägunta uycuśhä” nïcäta.
Chaynütacmi nila:
“Taytanchicmi malcanta cäraycunꞌa”c nil.
31 Rasunpa ¡maynu llaquim cawsä Diospa maquinman palpuyꞌa!
32 Má,
yalpapäcuy rasuncäta unay ćhasquipäcuptiqui ¿manachun imaymana sasachacuycuna talcamuptinpis pasinsiawan tacyaycälilanqui?
33 Waquinćhuꞌa lluypa puntanćhümi palaśha,
maꞌaśha capäculanqui.
Juccunaćhuꞌa chaynu pasäcunäta ñacawshipäculanquim.
34 Carsilćhu wićhaläcunätapis ñacayta pasawshilanquimari.
Janay pachäćhu sumä ćhaniyu cäniquicuna wiñaypä uywaśhayquita yaćhapäculmá sumä cushicuywanlä llapa ima cäniquicunactapis waycachiculcälanqui.
35 Chayurá caynu chalapaculcäśhayquita mana caśhanman ama cutichipäcuychu;
sumä-sumä jatun allintamari apaycamunꞌa.
36 Ñacaycunaćhu masïsu śhaycapäcunayquim Dios munaśhanta lulaycul limalicuśhanta ćhasquipäcunayquipä.
37 Isquirbishaćhu niyanmari:
“Cayllaćhüñam cacuyan;
śhamüca ñam ćhämunꞌaña;
manam dimuramunꞌachu.
38 Ñatac allinpa yaꞌa licaśhäcunämi chalapacuyninpa cawsanꞌa;
sïchuśh ipaman cutïluptinꞌa manaćh śhunꞌüpäñachu canꞌa”d nil.
39 Ñatac yaꞌanchic chay ipaman cutiyninwan wañuycäman liyäcänüchu manam cayanchic.
Aśhwanpa chalapacuyninpa wiñay cawsayta ćhasquïcunämari.