Jesusmi muśhü limanacuyta luläca
8
Canan,
má,
limaśhanchicpi mas puydïnin caycunam:
rasunpa puydï sasirdütinchic cayanmi.
Chaynütac Sumä Munayniyücäpa allï-lädunćhu täcuyanmi.
2 Jinaman Taytanchicpa lulaśhan rasun puydï chuyacäćhümi yanapaycamänanchicpä cayan;
rasun carpaćhümari,
manamá nunacunallap lulaśhan carpallaćhüñachu.
3 Llapa puydï sasirdüti ćhulaycuśha cayan imactapis yawartapis uycunanpämi.
Chaymi Jesuspis imallactapis uycunan cala.
4 Ñatac cay pachällaćhu quïdaculꞌa manaćh sasirdütichu canman.
Cayćhuꞌa camachicuymannuy ćhulaycuśhacunämi uycunanpä cayalcan.
5 Paycuna janay pachäćhu rasuncäpa ijuylu llantuyllan-yupayćhümi sirbipäcun.
Chaymari alawana carpacta lulananpäña cacuyaptin Moisesta ćhuncay-ćhuncay nila:
“Yanꞌal-lätac mana lulanquimanchu cay ulüćhu licachishäcätanülla”a nil.
6 Puydï Sasirdütinchicpa lulaynin mas allin chay unay limalicuyćhu lulä sasirdüticunapïtá mas allin limalicuytalä mas allincunawan tacyaycachimäśhanchicpïmari.
7 Rasunpa,
chay unay limanacuy allin captinꞌa,
manaćh cay juccäta limanacunan canmanchu cala.
8 Ñatac nunacunäćhu mana allincällacta talilmi Diosninchic nila:
“Juc muśhü limanacuyta Israelcunäwan,
Judäcunäwan limanacuná muyun śhayämunmi.
9 Egiptop maquinćhu cayalcaptin jululcul awquilluncunacta limanacuśhänüchu manaćh canꞌa.
Paycuna limanacuśhämannuy mana cawsapäcuptinmá yaꞌa caćhayculá.
10 Jinamanꞌa cay Israel nunacunäwan limanacuśhäca śhamü timpućhu caynümi canꞌa:
yaꞌami camachicuynïtapis tantiayninman ćhulaycuśhä,
śhunꞌunmanñatacmi isquirbiycuśha canꞌa.
Yaꞌami Tayta Diosnin caycuśhä;
paycunañatacmi malcá capäcunꞌa.
11 Chayurá manañam malca-masincunactapis nuna-masincunactapis yaćhachinan canꞌañachu ‘Taytanchicta lisilpuy’ nil.
Lluyñamari uchuchäcunällapi aśhta jatućhäcunäcama lisipämanꞌa.
12 Juchancunacta pampachaycul manañam imaypis yalpalcuśhächu”b nil.
13 Canan sumäta tantiaycäliy:
Cay limanacuyta “muśhü” niyalꞌa,
juccätá mawcapäñam licayan.
Chayurá lataśhcäwan mawcacá chincananpäñamari cayan.