Hebreocunaman Cartacuśhan
Anjilcunäpïtapis Jesusꞌa mas-maslämi
1
Tayta Diosmi unay timpućhu awquillunchiccunacta puydï willacünincunawan imaymanap imaymanawan limapäla.
2 Canan lluy lulacacalpunan timpucunañatacmi ichá paypa quiquin chulin śhamücäwan limapaycamanchic.
Paypam lluy-lluy jinantin pachäta camaycula.
Paymantacmi lluy jinantinta tücaycachila.
3 Cay chulinmi Tayta Diospa sumä-sumä allin cayninta camalaycachïnin;
imanuy caśhanpis quiqui-quiquin caśhannüllamari.
Paytacmi lluy imactapis sumä munayniyu limayninwan cällanćhu caycachin.
Lluy nunap juchancunacta chuyanchaycachilmi janay pachäćhu Sumä Munayniyücäpa allï-lädunman taycucuycula.
4 Chayurá caynu sumä allinninpälä ćhulaycuśha cayalꞌa ima cayninpis mas-maslämi anjilcunäpïtá.
Nipäcuśhan śhutinpis mas-maslätacmi.
5 Má ¿pï anjiltatan Dios:
“Anmi chulí canqui;
cananñatacmi yaꞌa taytayqui cá”a nila?
Manatacmi pï anjiltapis:
“Yaꞌami taytan caśhä.
Paytacmi chulí canꞌa”b nil nilachu.
6 Ñatac wamä chulinta cay pachäman caćhamulmi ichá niyan:
“Tayta Diospa lluy anjilnincuna alawapäcuchun”c
7 Anjilcunapïtam nin:
“Uywaynin anjilcunaca waywa-yupayllañam,
ninap walayninnuy-camallam”d nil.
8 Chulinpïtañatacmi ichá nin:
“Diosnilláy,
gubirnanqui wiña-wiñaypämi.
Allin tincüllanmantacmi gubirnaycunquipis.
9 Allincätam imaypis ama-pacha niycunqui;
mana allincätañatacmi ćhïnicunqui.
Chaymi Tayta Diosniqui lluy cusca cä masanniquicunapïtapis mas jatun cushicuytalä uycul altuman juluycuśhulanqui”e nil.
10 Chaynütacmi niyan:
“Taytay,
allaycuycäćhu anmi allpäta camalanqui;
janay pachäpis lulayniquim.
11 Lluy caycuna camacällamari.
Amñatacmi ichá wiñaypä caycunqui.
Chaycuna müdananümi lluy mawcälunꞌa.
12 Müdanactanümi lluy pitwïlunquipis,
cambiälunquipis.
Amñatacmi ichá mana imaypis cambiä canqui;
mana camacä watayümi cayanquipis”f nil.
13 Ñatac,
má ¿pï anjilllactá Diosninchic:
“Cay allïnï-läduman taycacamuy ćhïnïniquicunacta ćhaquiquiman uyshuycachimunäcama”g nil nilatan?
14 Cay anjilcunacá Tayta Dios salbanancunäta sirbiyta yanapänanpä caćhamuśhan ispiritucunallamari.