Filemonman Pablo Cartacuśhan
1
1-2 Jesusninchic-laycu wićhalä yaꞌa Pablom chalapacü-masinchic Timoteowan cay cartacta isquirbiycälimuc am cuyaśhá lulawshï-masí Filemonman jinaman paninchic Apiapäpis,
allin willacuyćhu cä cachacu-masinchic Arquipopäpis,
jinaman wasiquićhu lluy juntunacü chalapacü-masinchiccunapäpis.
3 Quiquin Tayta Diosninchicwan Duyñunchic Jesuspa llaquipayninpïta jawca cawsay amcunaćhu caycuchun.
Filemonpa cuyacuyninpïta Pablom sulpäta ucun
4-5 Am Jesusninchicman sumä chalapacuyniquitawan llapa chalapacü-masinchiccunacta maynu cuyaśhayquitapis uyalilmari imaypis Tayta Diosninchicta mañacuynïćhu sulpäta uycú.
6 Chaynütacmi mañacuyá chalapacuyninchicćhu juclla caśhanchicꞌa Jesusninchic maynu allin uycamäśhanchicta sumä tantialpachishunayquipä.
7 Rasunpa sumä cuyacü caśhayquim cushiycachiman jawcayaycachiman.
Am-laycumari chalapacü-masinchiccunap śhunꞌuncuna achicalcüśha cayan.
Onesimopämi Pablom mañacun
8-10 Chaymi,
masqui Jesusninchicćhu caynïwan imacta lulanayquipä niycuná cayaptinpis,
chay cuyacuyllawan mañacuycullac.
Yaꞌa awquishña caynïwan,
jinaman Jesusninchic-laycu wićhalayalpis,
chuli-yupay cä Onesimopämi ruygacuc.
Pay wićhaläśhäćhümari Jesusninchicman chalapacuptin taytan-yupay muyulá.
11 Payꞌa unay ampä manam bälilachu.
Cananmi ichá ampäpis yaꞌapäpis allinña.a
12 Chayurá payćhu śhunꞌú caśhancäta cutiyächimuptiꞌa,
quiquïtanuy ćhasquiycuy.
13 Yaꞌapïtá munäman Jesusninchic-laycu cay wićhaläśhäcäćhu pudirniqui yanapämänanpämi cala.
14 Masqui caynu pinsalpis shimiqui-cama mana camachinaculꞌa manamá lulämanchu.
Aśhwanpa quiquiqui śhunꞌuyquiwan lulaycunayquipämi caćhaycuyac.
15 Ñatac Onesimo ichaćh ampi calupäla canan cutimul wiñay simpripäña anwan caycunanpä.
16 Manañamá uywayllayquinüñachu,
sinuꞌa mas allinlämi;
cuyay śhullcayquiñamá.
Yaꞌa sumä cuyaywan licayaptiꞌa,
ampá mas cuyayniquilämi canmanpis nuna-masiqui jinaman Jesusninchicman chalapacü-masiquilä cayaptinꞌa.
17 Chayurá lulawshï-masiquipa licayämalꞌa,
paytapis yaꞌactanuy ćhasquiycuy.
18 Sïchuśh anwan mana allinta luläluptinꞌa ütac imayquitapis chaläluptinꞌa yaꞌacta mañamay.
19 Cayta yaꞌa Pablom quiquí maquïwan isquirbimuc:
“Nishac-yupaypis yaꞌam lluy pägaycuśhayqui” masqui bïdayquitalä dïbiyämaptiquipis chayta mana yalpachillalmá.
20 Chayurá chalapacü-masí caśhanchic-laycu-ari śhunꞌulläta cushiycachillämay cay bälicuylläta awniyniquiwan.
21 Am uyalicü captiquim cayta isquirbiycamuc,
jinaman cay nishäcunäpïtapis mastalä lulaycunayquita yaćhayalmari.
22 Ñatac jinamanꞌa,
cay watucü śhamunäpä Taytanchicta mañaculcäśhayquimanmi chalapacú.
Chayurá jamaycachimänayquipämi allichacuchcanqui.
Camacalpunanpämi limaycun
23 Yaꞌawan cusca Jesusninchic-laycu wićhalä-masí Epafrasmi limaycamuśhunqui.
24 Chaynütacmi lulawshï-masí Marcospis,
Aristarcopis,
Demaspis,
Lucaspis limaycälimuśhunqui.
25 Quiquin Jesusninchicpa llaquipaynin amcunaćhu caycuchun.
Chaynu cachun.