3
Chayurá Diosninchic Jesusninchicwan cuscacta śhalcayächimaptinchicꞌa umanchicpis śhunꞌunchicpis cachun janay pachällaćhu,
Jesusninchic unrapä Diospa lädunćhu gubirnaśhancäman.
2 Chaycunaćhu śhunꞌunchic cachun ama cay pachäćhu lluy chincacücunällamanꞌa.
3 Jesuswan wañupäculanquiñamari;
chayurá śhamü cawsayniqui Jesuswanmi cayan,
Diosninchicćhu pacäśha.
4 Juc muyunćha ichá quiquin cawsayniqui cä Jesus camalächicunꞌa,
chaynütacćha amcunactapis.
Chay altuman juluycuśha cayninćhüćha paywan cusca capäcunquipis.
Unay cawsaycäwan allin muśhü cawsaycätam tincuchin
5 Chayurá aychayquip unay munaynin cawsäcäta wañuchinayquim prisïsan:
anla juchacuycunacta,
mana allin munaycunacta,
imapïpis wañuyaycunacta.
Cayꞌá taytachacta cuyayäśhanchicnümi cayan.
6 Cay lulaycunapïtamari Diospa piñacuynin mana uyalicücunäman ćhanꞌa.
7 Amcunapis unay caynücunactam lulapäculanqui.
8 Manaña chaynu cayalcalꞌa canan rabyacuycuna,
mana awantana piñacuycuna,
juccunacta ćhïnicuycuna amcunaćhu manatacmi canmanñachu.
Chaynütacmi palaycunawan imaymana mana allin limaycunapis shimiquipi imaypis manaña yalunmanchu.
9 Amatac artipänacuyalcaypischu chay aychayquip mana allin cawsayninpïta anla lataśh müdanactanüña mana allin unay lulaynincunactawan wicapayalcalñá.
10 Jinalcul muśhü cawsaywanmi müdacälälisha cayalcanqui.
Jinaman chay cawsayniquita Diosninchic imaypis muyulpayächishunqui quiquinmannümi,
payta sumäta lluy lisilpälinayquicama.
11 Ñatac cay muśhü cawsayćhu canapä manam ucunchu Israel mana-Israel caypis,
nï siñalachicuśha mana siñalachicüśha caypis,
nï uyway nuna ütac libri caypis,
nïtac juc caśhta cay imapis ucunpischu.
Aśhwanpa cawsä Jesusllam puydin lluypïpis masninca jinaman lluyćhüpis.
12 Ñatac cuyay malcan capäcunayquipäña Dios aclaycuyalcäśhuptiquiꞌa,
cawsayniquicunaćhu caycunman juccunacta llampu śhunꞌuwan licaycuy,
allincällacta lulaycuy,
quiquiquipïtapis mastalä juccunacta licaycuy,
allin maquiwan lulaycuy,
chaynütac imapïpis pasinsiacuy.
13 Ñatac juccunäwan piñanacuyta ama ashiyalcayñachu,
imapis ninacaycälinayqui captinꞌa aśhwanpa pampachanacaycäliy.
Maynümi Jesusninchic pampachaycälishulanqui,
chaynu-ari amcunapis pampachanacaycäliy.
14 Mastá cuyacuyta camalaycachipäcuy;
cay cuyacuymari llapa imactapis tuquicta tincuycachin.
15 Ñatac jawca cawsayta Jesusninchic umäśhanchicca śhunꞌunchicćhu caycuchun.
Paymi lluyta ayamälanchic cay jawca cawsayćhu juc cuirpullap aychan-yupay cawsanapä.
Jinamanꞌa imaypis sulpäta ucuśhun.
16 Ñatac Jesusninchicpa willacuynin śhunꞌunchicćhu imaypis tacyaycuchun llapa sumä cänintin.
Chaynütac lluy yaćhaywan jucninchic jucninchic imaćhüpis caminanacuycuśhun,
anyapänacuycuśhun.
Diosta sumä anradisicüśha śhunꞌuwantac,
taquishun imaymana taquicunawan,
imnucunawan,
Chuya Ispiritu taquicunacta śhunꞌunchicpi yalachimuśhancunäwanpis.
17 Caynu lluy lulalpis,
limalpis Jesusninchicpa pudirninnu lulaycuśhun,
pay yaꞌanchic-laycu lulaśhanpi Tayta Diosta sulpäta ucuśhtin.
Juccunawan imanuypa cawsaycunapäpis
18 Ñatac walmicuna,
sujitaculcay wayapayquicunaman;
caytam lulaycälinayqui Jesusninchicman chalapaculcäśhayquipa.
19 Wayapacuna,
tuqui cuyacuywan walmiquicunacta licaycäliy;
ama usuchipäcuychu.
20 Chulicuna,
taytayquicunacta imaćhüpis cäsuculcay;
caymari Diospa śhunꞌunpä cayan.
21 Taytacuna,
chuliquicunacta ama cutipalcul cutipalcul rabyapayächiychu,
jinapayalꞌa wällïshacta cayächiychu.
22 Chaynütac uyway nunacuna,
cay pachäćhu duyñuyquicunacta imaćhüpis cäsuculcay.
Amatac paycunap ñawillanćhuꞌa,
“allinpa licaycamänanpä” nil lulayalcaychu,
sinuꞌa allin śhunꞌuwan Diosninchicta manchacuywan.
23 Lluy imapis lulapäcuśhayquicunacta lulaycäliy llapan śhunꞌuyquiwan Jesusninchicta sirbiycuyänu,
ama nunacunällactachu.
24 Yaćhapäcunquiñamari Duyñunchic Jesus sirbipäcuśhayquica allin unanchaycuśhancäman tincüta upäcuśhunayquita.
25 Mana allincäta luläcäñatacmi ichá,
mana allincäman tincüta ćhasquiycunꞌa.
Ñatac Diosninchic mana śhalcullalmi mayanmanpis cäraycun.