Jesus mïnuschaculpis mas altunninmanlämi juluycuśha
2
Canan ¿manachun callpanchapäcuśhunqui Jesusninchicpäña capäcuśhayquica?
¿Manachun cuyacuynin cunsuylaycälishunqui?
¿Manachun Chuya Ispiritun amcunawan cayan?
¿Manachun llaquipaynintawan cuyacuyninta yaćhaycapäculanquiña?
2 Chaynu captinꞌa,
tuquillap cuyacuywan juc nunanülla,
juc śhunꞌulla,
juc pinsaylla cawsaycäliy-ari,
sumä cushishallaña yaꞌapis canäpä.
3 Ñatac läga śhunꞌuyu nïtac nunatucüśha śhunꞌuyu ama imactapis lulapäcuychu.
Aśhwanpa quiquiquipïtapis mas allinpälä lluytapis uywaycunqui.
4 Amatac quiquillayquip allinllayquipá licacuychu sinuꞌa juccunäpactapis licaycäliy.
5 Ñatac Jesusninchicnümi caycälinquiman:
6 Pay masqui quiquin Diosninchic cayalpis,
manam chay cayninman atinïduchu caycula.
7-8 Aśhwanpam Dios caynintapis juc-läduman ćhulaycul,
yaꞌanchicnu aychayu tulluyüman muyula.
Caynu cayalpis,
mastalämi mïnuschacula;
uyway nunamanlämari muyulapis.
Cäsucuyninwanmi wañuycäta quiquinpa awnila;
aśhta mana allin piyurnin nunap wañuchinan curuśhninmanlämi ćhälapis.
9 Chaymi mas altunninmanlä Tayta Dios ćhulaycula;
lluy puydïpïtapis sumä allinninmanlämi numraycula.
10 Chaymi janay pachäćhu,
cay pachäćhu,
allpäpa śhunꞌunchu lluy cäcunäpis Jesusninchicman unꞌulacuycul
11 “Anmá lluy imapïpis mayanpïpis sumä puydïca cayanqui” nil alawapäcunꞌa.
Chaynüpam Tayta Diosninchicta altuman julaycälinꞌa.
Cay pachäćhu chalapacücunaca acchinümi cayanchic
12 Ñatac cuyaśhäcuna,
amcunaćhu cayaptí imaypis cäsupämälanquim.
Canan calućhu cayaptiꞌa maslämi puydinpis.
Chaynütac salbaycuśhaña capäcuśhayquita sumä manchacuywan camalachiyta callpanchaculcanquimanmi.
13 Quiquin Diosñatacmi śhunꞌuyquićhu lulayta pinsaycachil munaśhanmannuy lulachipäcuśhunqui.
14 Lluy lulapäcuśhayquićhu mana jamuyänacullal nï piñanacullal lulaycäliy.
15 Chaynu cawsapäcuptiquićh imapi juchachaycälishunayqui mana canꞌachu.
Ñatac Diospa chulincunanu allin śhunꞌuwan cay tutapä pachäćhu uman muyüśha mana allin nunacunap ćhawpinćhu cawsaycälilmi lusiru-yupaypis acchipäcunqui
16 allin willacuy cawsay uśhanta tantiachishtin.
Chaynu capäcuptiquićh Jesusninchic cutimunan muyuncäćhu lluy wañuy-wañuy lulaynïcuna mana yanꞌalpä caśhanta yaćhal sumä cushicuśhä.
17 Jinamanꞌa chalapacuyniquip callpanchacuynin cabalalpuśha cananpä yawarní jićhäśha captinpis cushisha lulaycul amcunawan cuscam cushicüman.
18 Chayurá amcunapis yaꞌawan cusca cushiculcay-ari.
Timoteoctawan Epafroditoctam caćhan
19 Ñatac Timoteocta watucüniqui caćhamunäpä Jesusninchicmanmi chalapacú.
Jinaptïćha imanuy capäcuśhayquitapis willaycamaptin cushicuśhä.
20 Yaꞌanuy cay Timoteo amcunapïpis llaquicuꞌa manam pipis canmanchu.
21 Juccuná Jesusninchicpa lulaycälinantá,
aśhwanpa quiquillanpämi masta wañuyalcan.
22 Ñatac tuquictam yaćhayalcanqui Timoteo maynu sumä śhaycuycuśhantapis,
yaꞌawan cusca mayćhüpis allin willacuyta apaycälishäćhu chulï-yupay yanapämäśhantapis.
23 Chaymi yaꞌawan ima pasanantapis yaćhälul-pacha amcunaman caćhamuśhä.
24 Licaycüniqui quiquí ñä paćhcamunäpäpis Taytanchicman chalapacuyätacmi.
25 Chaynütacmi ima pishipacuynïcunaćhu licaycamänanpä caćhamuśhayqui lulawshï-masí pilyawshï-masí chalapacü-masinchic Epafroditocta cutichimuná prisïsäśhanta licayá.
26 Amcunapi śhunꞌunpis manañam śhunꞌuchu.
Chaynütacmi cayćhu ishyaśhanta uyalipäcuśhayquita yaćhälul sumä llaquicula.
27 Rasunpa sumätam ishyäla;
ñaćham wañuytapis talïlun.
Jinaptinpis Diosmi llaquipaycula,
manam payllactachu sinuꞌa yaꞌactapis manaña mas llaquićhu cayänäpïta.
28 Chayurá canan-pacham mana-mana caćhaycamú amcuna yapa tincuycul cushiculcänayquipä ñatac yaꞌapis manaña llaquisha cayänäpä.
29 Chayurá Taytanchicpa pudirnintanu-ari sumä cuyacuywan ćhasquiycäliy.
Paycunanu cäcunäta imaypis cuyacuywan altuman julaycäliy.
30 Jesusninchicta sirbiyninwanmi pay wañuytapis ñaćha talïlun.
Cawsaynintapis ñaćha apälun quiquiquicuna mana yanapämäśhayquita yanapämäśhanwanmi.