Lluywan yanapänaculcay
6
Ñatac chalapacü-masïcuna,
mayanniquipis juchaman palpüläliptinꞌa,
Diospa Ispiritunta cäsucünincuna limapaycul yanapaycälinquimanmi allichacunanpä.
Lulalꞌa lulaycäliy “Yaꞌapis imamanpis palpülümanćha” nil llampu śhunꞌuyülla.
2 Ima sasachacuycunaćhu yanapänacaycälishayquiwanćha Jesusninchic niycamäśhanchicta lulaycälinqui.
3 Ñatac mayanpis nunatucüśha “Chayllapá anchap puydïmi cá” nïcá manam imapischu;
quiquinmi ingañacuyan.
4 Aśhwanpa cawsayninchicta quiquinchicmi sumäpa licacuycuna.
Allin captinꞌa juccunawan ama tincuchicuyächunchu.
5 Caypi quiquinchicmi licacuycunanchic.
6 Ñatac Diospa yaćhachicuyninta ćhasquïcá ima allin cänincunactapis camachinacuchun yaćhachïninwan.
7 Amatac ingañacuyalcaychu:
Dios manam burlaśhachu canman.
Talpuśhanchiccätamá cusichanchic.
8 Mayanpis aychanpa munayninta talpücá,
chaypïtacćha wañuyta ćhasquinꞌa.
Ñatac Diospa Ispiritunta talpücá,
paypïtacćha wiñay simpri cawsayta ćhasquinꞌa.
9 Chayurá mana pishipällal allincäta lulaycuśhun.
Chaynu mana jucmanyällal lulayculꞌa timpullanćhümi ćhasquiycuśhunpis.
10 Chaymi lulaypa captinꞌa allincäta llapanwan lulaycunanchic,
ñatac mastá chalapacü-masinchiccunacta ayllunchic caśhan-laycu.
Anyapaywan limapaycuy
11 Canan licaycäliy maynu jatun litrawan quiquí maquïwan isquirbiycamuśhäta:
12 Cay yaćhachicücunaca “siñalachicuśhun” nil wañupacuyalcan nunacunäwan allinpa licachicuyllanwan,
ñatac curuśhćhu Jesus wañuśhanpi willaptin mana aticaćhaśha capäcunallanpämi.
13 Masqui paycuna siñalachicüśha cayalcalpis Moisespa camachicuyninta manam cumpliyta atipapäcunchu.
Paycuna siñalachiculcänayquita munapäcun nunatucüśha:
“paycuna atïnïcunam” nil nipäcunanpämi.
14 Yaꞌami ichá imapi alawacuytapis mana munächu,
aśhwanpa Jesusninchic curuśhcäćhu wañuśhallanpïtam.
Aw,
pay-laycum,
yaꞌa wañüśha-yupayña,
cay pachäćhu cäcunaca mana imapis ucamanñachu.
Ñatac yaꞌapis cay pachäpa manam imapis ucüchu.
15 Manamá imapäpis bälinchu siñalachicüśha mana siñalachicüśha caśhanchicpis;
aśhwanpa muśhü nunamanña muyuśha caśhanchicmi bälin.
16 Caynu yaćhachicuyćhu cawsäcunätawan paypa rasun nunancunacta Diosninchic llaquipaycul jawca cawsayta uycuchun.
17 Cananpi puntaman mayanpis ama uyalichimächunñachu cay cüsacunapi;
yaꞌap aychäćhümi ichá silalla cayan Jesusninchic-laycu ñacachipämäśhanpi.
18 Cuyaśhá chalapacü-masïcuna,
Duyñunchic Jesus llaquipaycul yanapaycälishunqui.
Chaynu cachun.