Puydï chalapacücunämi Pablocta ćhasquin
2
Chaypi ćhunca tawayu watapïlätacmi Bernabëwan Jerusalenta yapa ishpipäculá Titoctapis puśhaculcul.
2 Chayman lilá quiquin Diosninchic linäpä tantiachimaptinmi.
Chayćhu puydïcunallap limanacuyninćhümi lluy willapälá mana-Israelcunäman allin willacuyta ćhaycachishäta “cay lulayní pampapä mana cananpä” nil.
3 Chayćhu liwshimäní Titocta masqui mana-Israel cayaptinpis,
manamá mayanpis “aychayquićhu siñalachicuy” nipäculachu.
4 Ñatac caycunapïta manam limayachwanñachu cala,
juc ishcay chalapacütuculcul mana iwiyaptinꞌa.
Paycunam Jesusninchicćhu libriña caśhanchicta awaytaycaćhapämun Moisespa camachicuyninćhu ćhänalächimänanchicpä.
5 Ñatac allin willacuy śhunꞌuyquicunaćhu masïsu tacyaycunanpä,
chay iwïcunäta manam uchucllapis uyaliycäliläpischu.
6 Ñatac puydï chalapacücunäpa licaśhacunaca - masqui caynu jatućhä puydï capäcuśhanpïta manam imapis ucamanchu;
Diosꞌa chay cuscactam lluyta licaycamanchic - cay puydï chalapacücunaca willacuśhäcäman manam imallactapis mastá niycälimulachu.
7 Aśhwanpa tantiaycälila maynümi Dios caćhala Pedroctapis Israelcunäman allincäta willaycunanpä,
chaynümi mana-Israelcunäman caćhamäśhantapis.
8 Ñatac Pedrocta Israelcunäćhu lulaycachï quiquin Diosllam yaꞌactañatac mana-Israelcunäćhu lulaycachimäla.
9 Ñatac chalapacücunäpa puydïnin Jacobopis,
Pedropis,
Juanpis “Tantiaycälïmi quiquin Dios nunanpä ćhulaycuśhuśhayquita.
Willacü-masí capäcunqui” nil yaꞌactawan Bernabëta allinpa ćhasquiycälimäla.
Chaypïmi tücachinaculcälá paycuna Israelcunäćhu willaculcänanpä,
yaꞌacunañatac mana-Israelcunäćhu willacunäpä.
10 Ñatac “amam unꞌapäcunquichu yaꞌacunaćhu mana cäniyücunapïta” nipämäla jinallam.
Chaycunactá manchacuywanmi lulaycuyá.
Antioquiaćhümi Pablo anyan Pedrocta
11 Ñatac Antioquia malcaman Pedro ćhämuptinmi lluypa ñawpäninćhu anyälú,
chay lulaśhan mana allin captin.
12 Caynümi cala:
mana-Israel caśhta chalapacücunäwanmi puntallactá micapäcula.
Jacobop lisinaculcäśhan ćhämuptinñatacmi “imanimanꞌaćh” nil japächaculcul manaña micawshilañachu.
13 Chaynümi chayćhu juc Israel caśhta chalapacücunäpis aśhta Bernabëpis,
Pedronu ishcay cära cayninwan aysachicälälil japächacälälila.
14 Chaynu lulaynincuna allin willacuywan mana tincuptinmi,
llapa chalapacücunäpa puntanćhu Pedrocta nilá:
“Am Israel caśhta cayal custumrinchiccunactapis juc-läduman wicapaycul mana-Israel caśhtanu cawsayalꞌa,
¿imapïtan-nila cay japächäśhayquiwan paycunacta Israel caśhtactanuy cawsachiyta munanqui?”
nil.
Israel mana-Israelpis chalapacuyllanpam salbaśha
15 Ñatac yaꞌacuna awquillücunapïtam Israel caśhta capäcú;
manamá chay “jucha-sapapa licaśha” mana Moisespa camachicuyniyu caśhtacunänüchu.
16 Camachicuypa nï mayanpis mana juchayu licaśha cananta,
tuquictam yaćhapäcú,
sinuꞌa Jesusman chalapaculcäśhallanpamá.
Chaymi yaꞌacunapis Salbacü Jesusman chalapaculcäśhalläpa allinpa licaycuśha capäcú,
manam Moisespa camachicuyninpachu.
Ñatac Moisespa camachicuyninwan manam imaypis nï mayanpapis juchan pampachaycuśha canmanchu.
17 Jesusman chalapacul Dioswan allinpa licaycuśha caśhanchicćhüña juccunanu jucha-sapa caśhanchicta licälul ¿imanishuntan?
¿“Jesuspa jananmi juchayu cayá” nishunchun?
¡Manamá!
18 Pampaman Moisespa camachicuyninta muyuchishäta yapa śhalcachilꞌa,
juchayüñam cayá.
19 Moisespa camachicuyninćhu nishanta mana atipaculculmi chayćhu wañuśha-yupayña licaśha calá,
Diosnillanchicpa cawsanäpä.
20 Jesusninchicpa curuśhninćhümi wañuśha-yupay cayal punta cawsayní wañuśhaña.
Manañam yaꞌa cawsächu;
aśhwanpa quiquin Jesusñam yaꞌaćhu cawsayan.
Paymi cuyamal yaꞌa-laycu wañuycäman lila.
Chaymi Tayta Diospa Chulinman chalapaculña cawsá.
21 Diospa llaquipayninta manam yanꞌal pampapächu licá.
Sïchuśh Moisespa camachicuyninwan juchanchicta Dios rasunpa pampachamaptinchicꞌa Jesus yanꞌalćha allu wañuyta wañula.