Jesus śhalcamuśhanpïtam limapan
15
Canan chalapacü-masïcuna,
allin willacuyta willaśhäcätam yalpalcälichishayqui.
Caytamari ćhasquiculcälanqui.
Cayćhütacmi wancanuy masïsu tacyäśha cayalcanqui.
2 Cay ćhasquiculcäśhayquićhu masïsu tacyayculꞌa salbaycuśhañamari capäcunqui.
Chaynu mana captinꞌa yanꞌalpämi chalapaculcäśhayquipis.
3 Sumänintalämi yaꞌa quiquí ćhasquishäpi puntacta yaćhachipäculac:
isquirbishancunaćhu nishannüpis,
Jesusninchic yaꞌanchicpa juchanchicpi wañuśhantamari.
4 Chaynütac pampäläliptinpis quimsa muyunpïtá śhalcämulam isquirbishancunaćhu nishannüpis.
5 Chaypïtam Pedroman licalïmula chaynütac ćhunca ishcayniyu yaćhapacünincunamanpis.
6 Chaypïta picha paćhac (500) masniyu chalapacü-masinchiccunamanpis licalïmulam.
Lluy paycuna llapan-yupaylämi cawsayalcan,
masqui parti wañuculcaptinpis.
7 Chaypïta Jacobomanpis,
jinamanꞌa llapan puydï yaćhapacünincunamanmi licalïmula.
8 Chaypi ipa-ipallactá yaꞌa mana śhullüśha-yupay cäcämanpis licalïmulam.
9 Ñatac llapa puydï yaćhapacünincunapïpis pasaypinninmi yaꞌa cayá.
Manamá willacünin ninallanpäpis bälïchu,
Diospa chalapacünincunacta jalutacul aticaćhaśhäpïtamari.
10 Ñatac llaquipayninpamá canan caycuśhänuy caycú.
Caynu llaquipaycamäśhanca manamá yanꞌalpächu cala.
Aśhwanpam juc willacünincunapïtapis mastalä lulaycullá.
Manamari allisca caynïwanchu sinuꞌa Tayta Diosninchic llaquipaycamaptinmi.
11 ¿Paycuna ütac yaꞌa allin willacuyta willacuptïpis imam ucamanchic?
Lluypis chay willacuyllactam willacunchic,
chaymanmá amcuna chalapaculcälanqui.
Wañücuna śhalcamunanpïtam tantialpachin
12 Canan má,
Jesus śhalcamuśha caśhanta willayalcaptiꞌa ¿imapïtan-nila waquinniquicuna “Wañücuna manam śhalcamunꞌañachu” niyalcanquiman?
13 Sïchuśh wañücuna mana śhalcamunan cayaptinꞌa,
Jesuspis manaćh śhalcamuśhachu cayan.
14 Chaynu Jesus mana śhalcamuśha cayaptinꞌa cay willacuśhäca yanꞌal pampapäćha cayan.
Chayurá chalapaculcäśhayquipis yanꞌalpätacćhá.
15 Masläćha canpis,
artish willacüläćha cayalcämanpis Tayta Dios wañuycäpi Jesusta śhalcachimuśhanta willacuyalcalꞌa.
Ñatac rasunpa wañücuna mana śhalcamunan cayaptinꞌa Jesusta manaćhari Dios śhalcachimulachu.
16 Rasunpa,
wañücunaca mana śhalcapämunan cayaptinꞌa Jesuspis manaćh śhalcamuśhachu.
17 Sïchuśh Jesus mana śhalcamuśha cayaptinꞌa chalapacuyniqui yanꞌal pampapäćha.
Chayurá jina juchallaćhüläćha cayalcanquipis.
18 Chaynu captinꞌa Jesusman chalapacuyalñá wañücunäpis wiñaypä ñacayćhu chincäśhaćh cayalcan.
19 Sïchuśh cay cawsayllanchicpä Jesusman chalapaculꞌa ¡llapa nunacunapïpis maynu sumänin llaquićh caycunchic!
20 Ñatac aśhwanpam Jesus wañuycäpi rasunpa śhalcämula.
Paymari wamä caycun llapan wañücuna śhalcamunanpä.
21 Maynümi juc nunallap cay pachäman wañuyca yaycamula,
chaynümi juc nunallap śhalcamuycäpis śhamula.
22 Maynümi Adanpi milaynin caśhanchicwan lluypis wañunchic;
Chaynütacmi Jesuswanña lluypis cawsayman cutimuśhun.
23 Lluypis unanchaycuśhanćhü-camam śhalcamunꞌa:
puntallactá quiquin Jesusmi lluypïpis wamäta śhalcämunña.
Cutimuyninćhülämi paypa cäcunacá śhalcapäcunꞌa.
24 Chaypïtalämi cay pachäpa camacaynin śhamunꞌa.
Chayćhümi Jesus cay llapallan munayniyücunäta,
mandacücunäta,
lluy puydïcunäta llallilcul Tayta Diosman gubirnunta ćhulaycunꞌa.
25 Ñatac Jesus gubirnanan cayan Tayta Dios lluy ćhïnïnincunactapis maquinman ćhulaycunancamam.
26-27 Aśhta ćhïnicünin quiquin wañuycätapis aśhwanpalämi camacalpunꞌa,
isquirbishaćhu nishannüpis “Tayta Dios lluy-lluytam maquinman ćhulaycula”a nil.
Cay “lluy-lluyta” niyan manamá quiquin Diospis paypa munayninćhu cananpächu.
Aśhwanpam payꞌa llapa imactapis Jesuspa maquinman lluy ćhulaycüca.
28 Chaynu llapa imapis Jesuspa maquinćhu cayaptinñá,
quiquin chulin Jesuspis Tayta Diospa munayninmanmi ćhulacunꞌa.
Chayurá Tayta Diospa maquinćhümi lluy imapis caycunꞌa.
29 Ñatac wañüśhacuna mana śhalcamunan cayaptinꞌa,
¿imananꞌaćh “wañüśhacunäpa pudirnin” bawtisachicücunaca?
Rasunpa mana śhalcamunan cayaptinꞌa ¿imapätá paypa pudirnin bawtisachiculcan?
30 Mana śhalcamuna cayaptinꞌa ¿imapïtan cawsaynïcunacta wañuycäpa patanćhu cayalcächïmanpis?
31 Chalapacü-masïcuna,
walan-walanmari wañuypa patanćhu cayá;
cay cayan Jesusninchic amcunawan sumä cushichimäśhancänümari.
32 Ñatac wañücuna mana śhalcamunan cayaptinꞌa ¿imactatan julucú Efeso malcaćhu nuna-micü uywanuy cä nunacunäwan pilyapäcuśhäwan?
Aśhwanpaćh “Upyacuśhun,
micucuśhun,
wañuculꞌa chayllactaćh apacuśhun” nil limaycämannüpis cacüman.
33 ¡Ama-ari ingañachicuyalcaychu!
Allintam limaypis niyan:
“Mana allin nunacunäwan cunchawänacuyꞌa allin cayninchictam pampaman muyuchin” nil.
34 Chayurá licaćhaculcayñari;
ama juchacuyalcayñachu.
Ñatac pinꞌayniquipämi Diosta manalä lisipäcuśhayquita waquinniquicuná camalachicuyalcanqui.
Śhalcamücäpa aychan ¿imanuymi canꞌa?
35 Ñatac waquincuna ichaćh:
“¿Imanuypam wañücunaca śhalcamunꞌa?
¿Imanuyćha aychan śhalcamuptin canꞌa?”
nil niyalcanpis.
36 ¡Imacá tullu umap tapucuynincunamá!
¿Manachun talpuptinchic mujuca allpäćhu wañun wiñamunanpä?
37 Ñatac talpunchic trïguctapis ütac jucpactapis mujullantam,
manamá chay wiñamuśhan quiquin lantantachu.
38 Quiquin Tayta Diosmi imanuy cananpäpis imanuy wiñananpäpis lluyta unanchaycun.
39 Ñatac manamá lluypachu aychan chay licchälla:
nunap aychanꞌa jucmi,
uywacunäpa aychanꞌa juctacmi,
pishucunäpapis juctacmi,
challwacunäpapis juctacmi.
40 Chaynümi cay pachäćhu aychacunapis cayan;
chaynütacmi janay pachäćhu aychacunapis cayantac.
Chay janay pacha aychäpa sumä caynin juc licchämi cay pachällaćhu aychapïtá.
41 Maynümi intïpa acchiyninpis juc licchä quillapa acchiyninpïta;
uyllurcunäpa acchiyninpis juc licchätacmá.
Chaynütacmi quiquin-pula uyllurcunallaćhüpis juc licchä-cama acchiynin cayalcan.
42 Chaynümi wañücuna śhalcamunancäwanpis canꞌa:
camacä aychallacta pampaptinchic mana camacäñatacmi śhalcamunꞌa.
43 Cay-nilä aychallacta pampaptinchic sumä-sumä tuquiñatacmi śhalcamunꞌa.
Pishi callpayüllacta pampaptinchic sumä munayniyüñatacmi śhalcamunꞌa.
44 Cay pachällapä cä aychacta pampaptinchic janay pachäpä cä aychañatacmi śhalcamunꞌapis.
Ñatac cay pachällapä cä aycha cayaptinꞌa,
janay pachäpä cä aychanchicpis cayanmá.
45 Chaynu cananpä Diospa shiminćhüpis niyanmi:
“Chay wamä nuna Adanta cawsaytam uycula”b nil.
Ñatac ipa śhamü nuna Jesusñatacmi cawsayta uycü quiquin Ispiritulä cayan.
46 Licay,
manam janay pachäpä cä aychachu puntactá śhamula.
Aśhwanpa puntacta cay pachäpä cä aychallam śhamula;
chaypïlämi janay pachäpä cä aychaca.
47 Adanꞌa allpallapïtam cala.
Chay ipanta śhamücämi ichá janay pachäpïlä canpis.
48 Chayurá allpällapïta śhamücänümi cay pachäćhu cayanchic.
Janay pachäćhüñatacmi ichá janay pachäpi śhamücänu caśhun.
49 Maynümi cay pachäpi camaśha Adan-yupaylla canan cayanchic;
chaynütacmi janay pachäćhüpis Jesuspa aychan-yupaylla caśhun.
50 Canan niycälishayqui chalapacü-masïcuna:
Cay tulluyu aychayu nunacá Diospa gubirnunman manam yaycunmanchu.
Chaynütacmi chincacücälla wiñay simpripä cäcunäta mana ćhasquiycunmanchu.
51 Canan sumäta uyaliycäliy cay pacalä willacuyta:
Manam lluychu wañuśhun.
Ñatac lluytacmi jucman muyuchisha caśhun.
52 Curnitilla tucayta camacalpamuptinmi juc ñawi imchiycuyllaćhu,
wañuśhacunaca śhalcamunꞌa mana imaypis camacananpä;
chayllaćhümi yaꞌanchicpis muyuchisha caśhun.
53 Ñatac cay chincacü aychanchic,
wiña-wiñaycäwanmi müdacunꞌa,
chaynütac camacäca mana camacäcäwanmi.
54 Caynu chincacülla,
wañucülla aychanchic mana imaypis camacäman muyüluptinmi isquirbishanćhu nishanca lulacacunꞌa:
“¡Wañuyca pampaman muyuchishañam;
llalliyca cabalñam!”c
55 “Wañuy,
¿mayćhümi llallicuyniqui cayan?
¿Mayćhümi waćhicuyqui cayan?”
nil.
56 Chay wañuycäpa waćhicun juchamari,
ñatac cay juchap munaynin camachicuypïmi śhamun.
57 ¡Ñatac sulpá cachun Diosninchicta,
Duyñunchic Jesusninchicwan llalliycuyta uycamäśhanchicpïta!
58 Chaymi cuyaśhá chalapacü-masïcuna,
masïsu mana jucmanyällal chalapaculcänayqui.
Chaynütac Jesusninchicpä lulayniquićhu imaypis llüllay-llüllay caycäliy.
Yaćhapäcuśhayquinüpis Jesusninchicpa lulaśhanchiccunaca manamá yanꞌalpächu.