Cuyacuycämi mas allincá
13
Ñatac nunacunap juc limaynincunaćhu limaptïpis,
aśhta anjilcunap limaynincunaćhu limaptïpis,
mana cuyacuyniyu cayalꞌa läta chanchanyäcänüllam ütac latillu ćhinćhinyäcänüllam cayá.
2 Chaynütac Diospa shiminta willacuyta atipalpis,
lluy pacaśhancunäta tantialpis,
lluy yaćhaycunäta yaćhalpis,
chaynütac sumä chalapacuynïwan ulucunäta juc-läduman aśhuyächiptïpis,
cuyacuyniyu mana cayalꞌa,
manam imapischu caśhä.
3 Chaynütac llapa cänïcunacta wacchacunäman aypuyalpis,
aśhta nuna-masï-laycu cañaycuśha cayalpis,
cuyacuyniyu mana cayalꞌa chay lulaynïcunawan manam imactapis julucüchu.
4 Aśhwanpam ima ayca captinpis cuyacuyniyücá:
alcaycun,
llaquipaycun,
manam lägacuyanchu.
Manam balaquïrutucunchu nïtac nunatucunpischu.
5 Manatacmi nanä shimichu,
manam quiquillanpächu imapïpis wañupacuyan,
manam imallapïpis piñacuyanchu,
nïtac mana allin lulaśhancunapi śhunꞌunćhu uywayanchu.
6 Rasunpa cuyacuyniyücá manam imaypis mana allincäpïta cushicunmanchu,
aśhwanpam rasuncäpi imaypis cushicun.
7 Cuyäcá cuyaśhancätam ima ayca cacuptinpis imaypis mana caćhaycunchu;
paymanmi imaypis chalapacun;
paypi allincätam imaypis alcaycun;
imaypis ama-pacha nil śhalcuycun.
8 Cuyacuyca mana camacä wiña-wiñaypämi.
Ñatac Diospi willacuy cäcunäpis camacällam;
imaymana limaycunaćhu limaycunäpis chincacüllam;
yaćhaycunäpis manañam canꞌañachu.
9 Canan waquinllantam tantianchicpis,
waquinllantatacmi willacunchicpis.
10 Ñatac sumä-sumä caycunanchic muyunca ćhämuptinmi ichá cay pishïlla caycuśhanchicꞌa camacanꞌa.
11 Yaꞌa uchuyllalä cayal limaläpis,
tantialäpis,
umachaculäpis uchuy walaśhchanüllam.
Wayapälulmi ichá uchuylla caynïta juc-läduman caćhaycülú.
12 Cananꞌa parti-partillactam aspa-aspallacta juc ispïjućhünuy licayanchic.
Juc muyunmi ichá tuquicta licaśhun.
Cananꞌa manalämi sumätachu lisinchic.
Juc muyunmi ichá yaꞌanchicta lisimäśhanchicnuy lisishun.
13 Cananꞌa imaypis mana camacä quimsallam cayan:
chalapacuyca,
mana jucmanyällal alcayca,
cuyacuycäpis.
Ñatac cay quimsanpïta mas allin puydïcá cuyacuycämari.