11
Chayurá Jesusninchicta yaꞌa atichishänuy,
amcunapis atichipämay.
Mañacuyćhu śhucupaculcäśhanpïtam limapan
2 Chalapacü-masïcuna,
amcunapïta sumä cushisham cayá imaypis yalpapämäśhayquipïta,
chaynütac yaćhachipäcuśhänülla imactapis lulaycälishayquipïta.
3 Ñatac sumäta cayta uyalipäcuy:
Jesusmi llapa wayapap uman;
wayapacunäñatacmi walminpa uman.
Diosninchicꞌa Jesuspa umanmari.
4 Chaymi juc wayapa umanta śhucupacüśha Dioswan limal ütac willacuyninta willalꞌa puydï umantam pinꞌayta lulayan.
5 Ñatac walmica mana śhucupacüśha Dioswan limal ütac willacuyninta willaculꞌa umantam pinꞌayta lulayan.
Siplay-siplay ächan lutüśha-yupayñamari cayan.
6 Walmica mana śhucupaculꞌa ächantapis lutuchicuchun-ari.
Ñatac chaynu siplay-siplay lutuchicüśha cayta pinꞌaculꞌa śhucupacuchun-ari.
7 Wayapam ichá umanta mana śhucupacunmanchu Diosninchicnülla camaśha cayal,
jinaman allin caśhanta camalachïca cayalmá.
Ñatac walmicunacá wayapanta allin caśhanta camalachïmi.
8 Rasunpa,
wayapaca manamá walmïpïtachu camaśha cala,
sinuꞌa walmim wayapäpïta.
9 Manatacmi walmï-laycuchu wayapaca camaśha cala.
Sinuꞌa wayapäpämi walmica camaśha cala.
10 Chaymi walmica śhucupacunman wayapanta manchacuywan licaycuśhanta Diospa caćha anjilnincunacta tantiachinanpä.
11 Ñatac chalapacücunaćhuꞌa wayapapis walmipis manam japallan cawsayta atipanmanchu.
12 Maynümi walmica wayapäpïta śhamun,
chaynümi wayapäpis walmipïta näsimun.
Ñatac ishcayninpis lluy imapis Tayta Diospa lulaśhallanmi.
13 Má,
imanipäcunquim:
walmicuna mana śhucupacüśha Dioswan limaśhan ¿tincunchun icha manachun?
14 ¿Manachun yaćhanchic wayapaca ächanta wiñachicuptin pinꞌay caśhanta?
15 Walmipam ichá ächa-sapa caśhan allinpa licaśha.
Paycunactam ichá śhucupacun-yupay cananpä ächanta uycula.
16 Chaymi mayanpis caycunapi tapunacuyta munalꞌa,
yaćhachun chaynu mana custumrinchic caśhanta,
nïtac Diosman lluy chalapacücunäćhüpischu.
Jesuspa wañuyninta yalpay sinaypïtam limapan
17 Ñatac canan cayta nil manam alawaycälicmanchu.
Amcunap juntunaculcäśhayqui allincäta wayuycuśhannuꞌa mana allincällactam masta wayuycun.
18 Puntactá má,
caynümi nipäman alawapäcunayquipä juntunaculcäśhayquićhu iwinacuycunalla caśhanta.
Chay nipämäśhanman chalapacutyayämá.
19 ¿Chayurá “Cay iwinacuycunapmi Tayta Diosninchic mayanninchictapis mas mas allinpa licaycamanchic” nil niyalcanquichun imatá?
20 Rasunpa,
chay juntunaculcäśhayquićhu “Jesuspa wañuyninta yalpay sinayta micuyanchic” nillaptiquipis manañamá chaynüchu.
21 Chayćhümi mana alcaycanacul micuyniquita-cama micacälälinqui.
Waquinniquicunam micanäśha cayalcanqui;
waquinniquicunañatacmi pasaypi shincäśhaña cayalcanqui.
22 Amcuna ¿micapäcunayquipä upyapäcunayquipä mana wasiyüchun capäcunqui?
¿Icha Tayta Diospa nunancunactachun jalutacuyta munayanqui,
imatá?
¿Icha mana cäniyücunäta pinꞌayman ćhulaypïchun wañupacuyalcanqui?
¿Caynu lulapäcuśhayquipi alawaycälishayquilächun canpis?
¡Manamá!
23 Ñatac Jesus nimäśhallantam yaćhachipäculac:
Jesusninchic wañuchisha cananpä chalaycachinan tuta tantacta apticulcul,
Diosta sulpäta ucula.
24 Jinalculmi tantäta partila cay nishtin:
“Cay tantämi aychá.
Amcuna-laycum cay aychäta wañuyman uycú.
Caypi puntaman lulaśhäta yalpayniquiwan micapäcuy” nil.
25 Chaynütacmi micuyta camacalcul bïnuyu cüpacta apticulcul nila:
“Cay cüpá muśhü limalicuy yawarnïwan tacyalpachishäcämi.
Caypi puntaman lulaśhäta yalpayniquiwan upyapäcuy” nil.
26 Chayurá cay tantacta imaypis micapäcuśhayquiwan bïnucta upyapäcuśhayquiwan Jesusninchicpa wañuśhantam cutimunancama willacuyalcanqui.
27 Chayurá mayanpis mana manchacuyninwan tantäta micul,
bïnüta upyalꞌa Jesus wañuycäman aychanta ćhulaśhantawan,
yawar jićhaśhanta jalutacuśhanpam juchachäśhaña cayan.
28 Chaymi tantäta bïnüta manalä upyaśhancama śhunꞌun imanuy caśhantapis sumäta tapucuycunan.
29 Ñatac Jesuspa aychan imaninantapis mana sumäta tantial micücá upyäcá quiquinpa lawćhayninpämi micunpis upyanpis.
30 Chaymari amcunaćhu cayalcan achca ishyäcunapis,
tanli-tanlicunapis,
aśhta wañuycunamanpis ćhayalcan.
31 Ñatac quiquinchicta sumäta licacuycuptinchicꞌa manam imapi cäraycamänanchic canmanchu.
32 Taytanchic sumäta licaycayämaptinchicꞌa caminaycayämanchic cay pachäćhu nunacunänuy cäraycuśha mana cananchicpämi.
33 Chayurá chalapacü-masïcuna,
Jesus wañuśhanta yalpapäcuśhayquiwan juntunaculcalꞌa alcaycanacuy.
34 Mayanpis micanäśhacá wasinćhu micapämuchun,
juntunacuyniquicuna cäraycuśha mana cayänanpä.
Ñatac juccunapi limananchiccätá śhamulñam limapaycälishayqui.