Casädu caycunapïtam limapan
7
Cananmi cartaćhu tapucalcämäśhayquita nipäcuśhayqui.
Allinmi canman juc walaśh mana casaracuptinpis.
2 Ñatac anla juchapacuycunaman mana palpuyänanpä walmiyü-cama capäcuchun,
chaynütac walmicunäpis wayapayü-cama capäcuchun.
3 Ñatac casädu wayapapis walminwan,
walmipis wayapanwan cunsintinaculcänanmi.
4 Walmip aychan manañamari quiquinpachu,
sinuꞌa wayapanpañam.
Chaynütacmi wayapap aychanpis manaña quiquinpañachu sinuꞌa walminpañam.
5 Chaymi Diosta mañaculcänayquipä cuscayquipi limanacul chay cunsintinaculcänayquita ash timpulla dijaycapäcunayqui juc timpullapä tuqui awninacullaltac.
Chaypïta mana awantayta atipaptiqui Satanaśh jucwan mana juchapacayächishunayquipä caśhanmi cunsintinaculcänayqui.
6 Caycunacta limapayllam limapaycälic,
manam lulapäcunayquipä camachicuychu.
7 Yaꞌa munämanmi llapanpis yaꞌanuy capäcunanta.
Ñatac Tayta Diosmi lluyta imanuy cananchicpäpis uycamälanchic:
waquintam caynu cananpä,
waquintañatacmi jucnu cananpä.
8 Ñatac müsu lasac cäcunätawan japanyäśhacunätam “Allinmi japallan manaña casaracul yaꞌanuy tacyaculcalꞌa” ní.
9 Ñatac mana awantayta atipalꞌa casaracuchun.
Mas allinmi casaracuyninꞌa chayllapïña uman muyüśha puliyänantá.
10 Cananꞌa casäducunäta cayta niycälic — manam yaꞌapïtachu,
sinuꞌa Taytanchicpa camachishantam niycälic:
Walmicunaca wayapanpïta ama laquicuchunchu.
11 Sïchuśh wayapanwan laquinacülulꞌa japallan cacuchun,
ütac wayapanwan cuscachuna.
Chaynütac wayapacunäpis walminpi ama laquicuyächunchu.
12 Ñatac juccunätá yaꞌami niycälic,
manam Tayta Dioschu:
chalapacü-masinchicpa mana chalapacü walmin captinpis,
walmica mana caćhaycul allinpa cawsaptinꞌa,
wayapaca ama laquicuyächunchu.
13 Chaynütac chalapacü walmip mana chalapacü wayapan mana caćhaycul allinpa cawsaptinꞌa,
chay walmipis amatac laquicuyächunchu.
14 Ñatac walmica Jesusman chalapacuśhanpam mana chalapacü wayapanpis allincäman puśhaycuśha canꞌa.
Chaynütac mana chalapacü walmipis wayapanpam allincäman puśhaycuśha.
Chaynu mana captinꞌa Diosninchic chuliquicunacta mana allinpäćha licanman cala.
Chaynüchu manamari;
cananꞌa chuliquicuna allinpa licaycuśhañam cayalcan.
15 Tayta Diosninchic jawca cawsayman ayaycayämaptinchicmá mana chalapacü walmica ütac wayapaca laquicacuyta munalꞌa,
laquicunman.
Chalapacüca manamá uyway nunanu ñacayćhu cayänachu.
16 ¿Am walmi maypïtá yaćhanqui wayapayqui salbaśha cananta?
¿Am wayapa maypïtá yaćhanqui walmiqui salbaśha cananta?
Diosninchic ayaycamäśhanchicnülla cawsaśhun
17 Chayurá Dios imacta lulapäcunayquipäpis nipäcuśhuśhayquinümi,
jinaman unanchaycuśhannümi cawsapäcunayqui.
Caytam llapa malcacunäćhu chalapacücunäta yaćhaycachí.
18 Chayurá umri cayninćhu siñaläśha Israel caśhtacta ayaptinꞌa jinalla cacuchun.
Mana siñaläśhacta ayaptinpis jinallatac cacuchun.
19 Manam ima allinpischu siñaläśha caypis ütac mana siñaläśha caypis.
Aśhwanpa Dios nimäśhanchiccäta cäsucuycämi mas allinca.
20 Chaymi ayaśhuptiqui imanuy caśhallayquićhu capäcunayqui.
21 Sïchuśh uyway nuna cayalꞌa,
chaypi ama afanädu cayaychu.
Ñatac uyway nuna manaña canayquipä ćhämuptinꞌa prubichaycunquimanmi.
22 Uyway nunaca Jesusninchic ayaycüluptinꞌa libriñam payta sirbinanpä.
Chaynütacmi mana uyway nuna cäcäpis Jesusninchic ayaycüluptinꞌa paypa uyway nunanña.
23 Tayta Diosninchicmari payllapä capäcunayquipä sumä-sumä ćhaniyüwan lantiycälishulanqui.
Chaymi nunacunallap uywayninman manaña muyuyalcänayquiñachu.
24 Chalapacü-masïcuna,
maynütam Diosninchic ayaycapäcuśhulanqui,
chaynüllam caycälinayqui.
Casaraculpis mana casaraculpis Diospa munaśhannuy cawsaśhun
25 Canan nipäcuśhayqui japallanlä walaśhpis ütac wamlapis cäcunapïtam.
Manam quiquin Diosninchic yaćhaycachimäśhanchic canchu,
aśhwanpa niycälishayqui Jesuspa llaquipayninpa chalapacuna nuna caśhä-laycum.
26 Chayurá canan caynu sasa-sasa timpucunaćhu cawsaśhanchiccäćhu,
yaꞌapïtá allin canman caśhannülla tacyaculcaptinmi.
27 Sïchuśh masanyacüśhaña cayalꞌa ama-ari laquicacuychu.
Japallayquilä cayalꞌa amañatac masanchacuypi wañupacuyaychu.
28 Ñatac casaraculꞌa manam juchacuyanquichu.
Chaynütac wamlapis cuscälulꞌa manam juchacuyanchu.
Ñatac casaracücunaca cay pachäćhu imaymana sasachacuycunactam pasapäcunꞌa.
Chayta mana munaynïwanmari caycunacta niycälic.
29 Chalapacü-masïcuna,
cay pachäćhu unay mana cawsananchic captinmi cayta niycälic.
Chaymi casäducunäpis japallan cayä-yupay Diosninchicpä cawsanan.
30 Chaymi llaquisha waꞌacunäpis cushisha cayänuy cawsapäcunan.
Cushisha cäcunapis mana cushisha cayänuy.
Ima cänincunacta armacücunäpis mana imactapis armänuy.
31 Chaynütac cay pachäćhu imapapis janallanćhu cawsäcunäpis mana imanpis cäniyü-yupay.
Cay pachaca lluy cänintinmari camacanꞌa.
32 Yaꞌa manam munächu pinsamintucüśha cayalcänayquita.
Japallanlä cacü müsucuná Taytanchicpa cäcunallamanmi llapan śhunꞌunwan lulaycuypi wañupacun,
paypa śhunꞌunpä cawsaśhtin.
33 Ñatac casäducunaca pinsamintucuyan cay pachäćhu cäcunapïtam,
jinamanꞌa walminwan allinpa licachicuyllactam.
34 Chaynütacmi casädu walmipis manaña japallan tacyacücänüchu.
Japallan cacü walmipis Taytanchicpa śhunꞌunpänuy cawsayllapïmi wañupacun.
Chaymi aychanwanpis almanwanpis payllacta sirbiycun.
Ñatac casädu walmicunacá cay pachäćhu cäcunällamanmi pinsamintuculcan jinamanꞌa wayapanwan allinpa licachicuyllactamari.
35 Cayta nipäcuc quiquiquip allinniquipämi,
manam casaraculcänayquipä atajacuynïwanchu.
Aśhwanpa juccunaman mana pinsamintucul Jesusllanchicpa munayllanta sumäpa lulaycunayquipämari.
36 Mayanpis limay-masinwan burlapächicuyal,
jinaman chay wamla cuscananpä timpun pasacuyaptinꞌa,
chaynütac paywan cananpäña aychan aysacuyaptinꞌa,
casaracunanñamari.
Manamá juchacunchu.
37 Ñatac pipis quiquinpa śhunꞌunta sumäta tapucuycul,
mana mayanwanpis limaynin captinꞌa,
jinaman aychantapis sujitacuyta atipal japallan cayta munalꞌa,
japallan tacyacuchun.
Mana casaraculpis paypis allintam lulayan.
38 Chayurá casaracücá allintam lulayan.
Ñatac japallan tacyacücunacá mas allintalämi lulayanpis.
39 Ñatac walmicunaca wayapan cawsaśhancama payllapämi cayalcan.
Wayapan wañucuptinmi ichá libri mayanwanpis yapacunanpä.
Yapaculpis chalapacü-masinwanmi yapacunan.
40 Ñatac yaꞌapïtá japanyäśha walmicunaca mas cushisha canman manaña yapaculmi.
Caynu niycälic yaꞌapis Chuya Ispiritup munayninćhu cayalmari.