Jeremiastam Egiptoman puśhaculcan
43
Chaynu Tayta Diosnin lluy nishanta jinantin malcäman Jeremias willacuyta camacäluptinmi,
2 Osaiaspa chulin Azarias,
Careapa chulin Johanan,
juc nunatucüśhacunäpis Jeremiasta nicuyalcan:
“Nipämäśhayquica yanꞌalmá.
Egiptocta lipäcunäpä Tayta Diosní manamá mićhacalcämanchu.
3 Amta,
Neriaspa chulin Barucmi yaćhachishulanqui Caldeo läducunäpa maquinman palpachipämänayquipä.
Chayćha paycuna wañuchipämanꞌa ütac Babilonia läduman prïsucta puśhapämanꞌa” nil.
4 Chaynu Juda lädullaćhu quïdaculcänanpä Tayta Dios willacachishanta Careapa chulin Johanan,
pilyäcunap puydïnincuna,
jinantin malcäpis manamari cäsuculcälachu.
5 Aśhwanpam Juda lädućhu yaćhapäcunanpä lluy nasyunćhu chiꞌisha cä cutimücunäta Careapa chulin Johanan,
pilyäcunap puydïnincuna pasachiculcan.
6 Chaynu puśhacula wayapacunäta,
walmicunäta,
chulincunacta,
mandacücäpa wamla chulincunacta,
willacü Jeremiasta,
jinaman Neriaspa chulin Baructapis.
Chaynütacmi Ahicampa chulin Safanpa willcan Gedaliaspa maquinman,
pilyäcunap puydïnin Nabuzaradan lluy ćhulaycuśhancunätapis puśhaculcälamá.
7 Chaynu Tayta Diosta mana cäsucuyculmi Egiptoa läduman liculcal Tafnes malcäcama ćhalälin.
8 Chay Tafnesćhu cayalcaptinmi Jeremiasta Tayta Dios limapäla:
9 “Ishcay quimsa jatućha lumicta apaculcul Tafnesćhu Faraoncäpa palasyunpa yaycunanman liy.
Chayćhu ladrillüśha pampamanmi Juda läducunaca licayalcämuptin ñiꞌiwan pampaycülunqui.
10 Jinalculmi ninqui:
‘Israelpa sumä munayniyu Tayta Diosninmi nin:
Babiloniap mandacünin,
sirbïní Nabucodonosortam cayman ayachimuśhä.
Cay Jeremias lumi pampaśhancäćhümi dispächunta śhalcachishä,
tïchunta atachishä.
11 Mandacüca ćhaycamulmari Egiptoćhu lluy cäcunäta duyñuchacuycunanpä allacuycunꞌa:
wañunanpä cäcá wañunꞌam;
prïsu puśhaśha cananpä cayäcá prïsum puśhaśha canꞌa;
gïrraćhu wañunanpä cayäcá gïrraćhümi wañunꞌa.b
12 Egiptoćhu taytachancunap wasinta cañayculmi taytachancunactañatac prïsuctanu apacunꞌa.
Maynümi michïca usancunacta müdananpi tapsin,
chaynümi Egipto nasyunta tapsïlunꞌa.
Jinalculmi chaypi jawcallaña licunꞌa.
13 Chaynütacmi Bet-semes malcaćhu inticta alawapäcunanpä uycunanćhu śhaycachishan lumicunätapis camacaycülunꞌa.
Egipto lädućhu taytachancunap wasincunactapis cañaycülunꞌamá’ ” nil.