Jerusalen camacaycüśha cananpämi willacun
21
Chayćhümi mandacü Sedequias caćhäla Malquiaspa chulin Pasurta,
jinaman Maasiaspa chulin sasirdüti Sofoniastawan Jeremiasta caynu ninanpä:
2 “Jeremias,
ama chaynu callaychu,
yaꞌacunapïta Tayta Diosta tapuycullay.
Babiloniap mandacünin Nabucodonosormi yaꞌacunap janänïćhüña cacuyällan.a
Ichapis Tayta Dios milagru lulaycuśhannu lulaycullanman paycuna liculcänanpä” nil.
3 Nipäcuptinmi Jeremias nin:
“Sedequiasman cayta willaycälimuy:
4 ‘Israelpa Tayta Diosninmi caynu nin:
Babiloniap mandacüninpa cuntran pilyapäcuśhayqui armacunätam quiquiquip cuntrayqui cananpä muyüchishä.
Murällayquip muyülïnin waśha lädućhu cunćhalä Caldeo läducunätañatacmi cay malcap ćhawpinman ćhulaycämuśhä.
5 Yaꞌa quiquïmari amcunaman maquïta ćhulaycamuśhä.
Sumä munaynïwan jinaman ninanu lupayä piñacuynïwanmi pilyaśhä.b
6 Cay malcaćhu lluy cäcunätamari camacaycüśhä;
nunacunapis uywacunapis sumä ishyaywanmá wañupäcunꞌa.
7 Chaypïta Juda lädup mandacünin Sedequiasta,
puydïnincunacta,
jinaman ishyaypi,
ispädapi,
micuy wanaypi cawsayniyu quïdäcunätapis Babiloniap mandacünin Nabucodonosorpa maquinmanmi ćhulaycüśhä;
wañuchiyta ashïcunäpä maquinmanmari ćhulaycüśhä.
Chaymi Nabucodonosor mana llaquipaycul,
mana pampachaycul ispadäwan wañülächiśhunqui.
Yaꞌa Tayta Diosmari niyá’ nil.
8 “Jinantin malcactañatac niycamuy:
Tayta Dios caynümi nin:
‘Má,
aclaycäliyꞌari cawsayman lï caminucta ütac wañuyman lï caminuctapis.
9 Cay malcaćhu quïdacücá ispädawan,
ishyaywan,
micuy wanaywanmi wañunꞌa.
Ñatac muyülïniquićhu cunćhalä Caldeo läducunäman yalulcul maquinman ćhulaculcaptiquipis cawsayniyülämari quïdaycälinqui yaꞌaman chalapacamäśhayquipi.c
10 Yaꞌa Tayta Diosmi ní:
Cay malcacta manañamá licaycuśhäñachu,
aśhwanpa camacaycünäpäñam niyá.
Chaymi Babiloniap mandacüninpa maquinman ćhulaycüśhä lluy cañaycünanpä’ nil.d
Juda lädup mandacünincunap cuntranmi willacun
11 “Juda lädu mandacücäpa milaynincunamanpis niycunquim:
“ ‘Tayta Dios nishanta uyalipäcuy:
12 Davidpa milaynincuna,
Tayta Diosmari nin:
Walan-walan tincüllanman-cama cäraycäliy.
Usuchisha cäcunäta usuchïcunäpa maquinpïta julaycäliy.
Chay mana allinniquipïta yanꞌalätac
piñacuyní ninanu walälü imanman.
Chayćha wañuchiyta mana atipana cälunman.
13 “ ‘Patacćhu yaćhä,
pampaćhu sumä sigüru cä Jerusalen
ampa cuntrayquimá cayá.
Amcunam nipäcunqui:
“¿Mayantá cuntranchic śhalcülunman?
¿Mayantá sumä pacacunanchicpä cäcunäman yaycämunman?”
nil.
14 Yaꞌa quiquïmi mana allin lulayniquiman tincüta mućhuycachishayqui.
Muntiquicunactapis lupächishämá;
lluy-lluytamá ninaca camacaycülunꞌa.
Yaꞌa Tayta Diosmari niyá’ ” nil.