Diosta mañapuwayku
3
Wawqe-panillaykuna,
ñoqaykupaqpas Diostayá mañakuychik chaynapi paypa palabranta mirachiptiyku Diosta alabaspa qamkuna hina chaskinankupaq.
2 Mañakuychiktaqyá daño ruraq mana allin runakunamanta Dios librawanankupaqpas,
manamiki llapallankuchu iñinkuqa.
3 Señorqa confiakunapaqmi,
paymi allinta takyachispa mana allinkunamanta waqaychasunkichik.
4 Señorpim confiakuchkaniku kamachisqaykuta ruranaykichikmantaqa,
chaytaqariki ñam rurachkankichikña.
5 Señoryá yanapachun sonqoykichikta chaynapi Diospa kuyakuynintawan Cristopa paciencianta haypanaykichikpaq.
Llamkanamanta
6 Wawqe-panillaykuna,
kamachimuykikum Señor Jesucristopa sutinpi,
karunchakuychikyá qella wawqe-panikunamanta,
paykunaqa manam yachachisqaykuman hinachu kawsachkanku.
7 Qamkunaqa yachankichikñam ñoqayku hina imaynam kawsaytaqa.
Qamkunawan kaspaykuqa manam qellakurqanikuchu.
8 Manam pipa mikuynintapas mañakurqanikuchu debaldeqa,
aswanqa tuta-punchaw pisipaspam llamkarqaniku mikunaykupaq,
chaynapim pitapas mana gastachirqanikuchu.
9 Debernikichikman hinaqa yanapawankikumanmi karqa,
ichaqa chaytaqa rurarqaniku qamkunapaq ejemplo kanaykupaqmi chaynapi qamkunapas ñoqayku hina ruranaykichikpaq.
10 Qamkunawan kachkaspaykuraqmi nirqaykiku:
—Pipas llamkayta mana munaspaqa ama mikuchunchu —nispa.
11 Uyarinikum,
qamkuna ukupis kachkanraq qellakuna,
mana imapipas llamkaspas runakunapa asuntonman chapukuchkanku.
12 Señorninchik Jesucristoraykum chayna kawsaqkunata kamachispa anyamuniku,
hawkalla llamkaspayá chaywan mikuchunku.
13 Qamkunaqa wawqe-panillaykuna,
allinkuna ruraytaqa amayá amiychikchu.
14 Kay cartawan nimusqaykuta pipas mana kasukuptinqa,
chay runatayá reqsipaykuychik hinaspayá ama hukllawakuychikchu chaynapi penqakunanpaq.
15 Ichaqa amayá enemigota hinachu qawaychik aswanqa Señorpi iñiqmasikichikta hinayá anyaykuychik.
Cartapa tukuyninmanta
16 Hawkayay qokuq Señoryá tukuy tiempo hinaspa tukuy imapipas hawkayayta qosunkichik.
Llapaykichikwanyá Señor kachun.