Corinto llaqtaqa karqa Grecia lawpi kaq hatun llaqtam. Achka nacionkunamanta kaq runakunam chay llaqtapiqa yachaqku. Corinto llaqtaqa karqa chay tiempopi anchallaña reqsisqa llaqtam. Chaywanpas chaypi yachaq runakunam llumpayllataña huchallikurqa, chayraykum chaypi kaq iñiqkunaqa kichkichasqa hina karqaku. Chay Corinto llaqtapipas Apostol Pabloqa iñichirqam Jesucristoman, ichaqa tiempopa risqanman hinam chay iglesiapi rikurirurqa hatun sasachakuykuna, chayraykum iskay kutikama paykunaman cartarqa.

Kay punta kaq cartaqa qanchis parteman rakisqam kanman:

Punta kaq partem willakun rimaykusqanmantawan Diosman gracias qosqanmanta (1:1-9).

Iskay kaq parteñataqmi willakun paykuna ukupi rakinakuykuna kasqanrayku qaqchasqanmanta (1:10–4:21).

Kimsa kaq parteñataqmi willakun madrastallanwan huchallikuq runata wischunankupaq kamachisqanmanta, willakuntaqmi mana iñiq juezkunapi quejanakusqankumantapas chaynataq casarakuspa kawsanankupaq consejokunamantapas (5-7).

Tawa kaq parteñataqmi willakun taytacha-mamachakuna adoraymanta (8:1–11:1).

Pichqa kaq parteñataqmi willakun iñiqkunapa huñunakuyninmanta hinaspa imaynam Santa Cena ruranankumanta (11:2–14:40).

Soqta kaq parteñataqmi willakun Jesucristopa kawsarisqanmanta hinaspa pantaypi hina kaptinku suma-sumaq yachachisqanmanta (1 Co 15).

Qanchis kaq parteñataqmi willakun Judea lawpi iñiqkunapaq ofrenda huñunankumanta, maylawkunamanmi Apostol Pablo rinanmanta hinaspa wawqe-panikunapaq kunasqanmanta (1 Co 16).

Chunka kimsayoq rakipim yachachin iñiqkunapa kuyanakuyninqa imaynam kananmanta, chay rakiqa taki hinam kanman.