3 —Ñoqaqa contraykichikpi kaspaymi miraynikichiktapas amenazachkani.

Fiestaykichikpi ofrecewasqaykichik animalkunapa wanunkunawanpas uyaykichikpim chamqarusqaykichik hinaspam chay wanukunawan kuskatataq wischurusqaykichik.

4 Chaynapim yachankichik qamkunataqa ñoqapuni kamachisqayta chaynapi Leviy castakunawan contrato rurasqayqa takyananpaq.

Chaynatam nini Llapallan Kamachiq ñoqa Tayta Dios.

5 —Paykunawan contrato rurasqayqa karqa hawka kanankupaqwan allin kawsakunankupaqmi,

chaykunataqa qorqani manchakuwanankupaqmi chaymi manchakuwaspanku respetollawanña sutiytapas rimarqaku.

6 Paykunaqa mana llullakuspam cheqap yachachikuyniytapas yachachirqaku.

Allinta hinaspa hawkalla kawsakuspam achkallaña runakunatapas mana allin ruraymanta karuncharqaku.

7 Sacerdotekunaqa allin yachaywanmi rimananku,

runakunaqa ñoqapa yachachikuyniytam paykunamanta chaskinanku,

paykunaqariki Llapallan Kamachiq ñoqa Tayta Diosmanta willakuqkunam.

8 —Llapallan sacerdotekuna,

qamkunaqa karunchakurunkichikmi imaynam kawsaymantaqa,

mana allinta kawsaspam yachachikuynikichikwan achkallataña urmarachinkichik,

chaynapim Leviy castakunawan rurasqayta pasaypaqtaña qepanchakurunkichik.

Chaynatam nini Llapallan Kamachiq ñoqa Tayta Dios.

9 Ñoqapas llapa runakunapa qayllanpim humillasqata hinaspa despreciasqataña ruraruykichik,

chaynataqa ruraruykichik munasqayman hina mana kawsaspa wakinman hukta wakinmanñataq hukta yachachisqaykichikraykum —nispa.

10 Israelpa llapallan castankunaqa ¿manachum huk taytayoqlla kanchik?

Ñoqanchiktaqa ¿manachum huk Dioslla unanchawarqanchik?

hinaptinqa ¿imaynanpimá sapakamaqa traicionanakuchkanchik?

¿Manachum chaynapiqa qepanchakuchkanchik abuelonchikkunapa contrato rurasqanta?

11 Juda castakunaqa Diosta traicionaruspam Israel nacionpipas hinaspa Jerusalen llaqtapipas millakuypaqtaña rurachkanku.

Paykunaqa Tayta Diospa kuyasqan santuariotapas millakuypaqtaña ruraruspam mana reqsisqanku taytacha-mamachakuna adoraq warmikunawanña casarakurunkupas.

12 Yuyayniyoq kachkaspan chayna ruraq runakunataqa Tayta Diosmi qarqorunqa Jacobpa maymi yachananmanta.

Llapallan Kamachiq Tayta Diosmanña ofrendankuta apamuptinpas payqa qarqorunqam.

13 Chaywanpas kachkanraqmi mana allin rurasqaykichikqa:

Qamkunaqa Tayta Diospa altarnintapas weqekichikwanmi llumpa-llumpayta chaqchurunkichik,

manaña ofrendaykichikmanta imapas qokuptinmi hinaspa manaña agradowan chaskiptinmi qamkunaqa qaparillawanña waqankichik.

14 Hinaspam tapukunkichikraq:

—¿Imanasqataq kaykunaqa pasawachkanku?

—nisparaq.

Warmikiwan contrato rurasqayki mana cumplisqaykimantaqa Tayta Diosmi testigo,

chay warmikiwanqariki mozo kasparaqmi casarakurqanki.

Paytaqa vida pasaqmasiki kachkaptinmi traicionarurqanki.

15 Warmitapas qaritapas ¿manachum Diosqa hukllaña kanankupaq unancharqa?

Paykunaqa almantin cuerpontinmi kanku Diosllapaqña.

¿Imapaqmá unancharqa hukllaña kanankupaqqa?

Chaynataqa unancharqa runapa mirayninkuna Diospaqña kanankupaqmi.

Chaynaqa sonqoykipi munaykunamantayá cuidakuy,

amayá traicionaychu mozo kaspa casarakusqayki warmikitaqa.

16 Israelpa yupaychasqan llapallan kamachiq Tayta Diosmi nin kaynata:

—Ñoqaqa cheqninim rakinakuytaqa,

cheqninitaqmi capan qawachikuchkaq hina daño rurasqan qawachikuq runataqa.

Chaynaqa sonqoykipi munaykunamantayá cuidakuy,

amayá warmikitaqa traicionaychu —nispa.

17 Tayta Diostaqa amirachinkichikñam rimasqaykichikwan.

Qamkunam ninkichik:

—¿Imaynatataq ñoqaykuqa amirachiniku?

—nispa.

Qamkunaqariki paytaqa amichichkankichik:

“Mana allin ruraq runapas Diospa qayllanpiqa allinllam” nisparaqmi otaq “¿Maypitaq kachkan allin arreglo ruraq Diosqa?”

nisparaqmi.