13
—Chay tiempopiqa huk pukyullamanta yaku lloqsiptinmi chay yakupi Davidpa castankuna huchankumanta chaynataq millakuypaq kayninkumanta mayllakunqaku.
2 Chay punchawkunapiqa Llapallan Kamachiq ñoqa Tayta Diosmi Israel nacionmanta chinkarachisaq taytacha-mamachakunapa sutinta chaynapi amaña yuyariyllapas-yuyarinaykichikpaq.
Nacionmantaqa chinkarachisaqtaqmi ñoqamanta willakuq tukuqkunatapas chaynataq millakuypaq rurachiq espiritukunatapas.
Chaynatam nini ñoqa Tayta Dios.
3 —Chayna willakuqkunamanta pipas willakuytaraq munaptinqa kikinpa tayta-mamallanmi kaynata ninqa:
“Qamqa Tayta Diospa sutinpi llullakuna rimasqaykiraykum wañunkipuni” nispa.
Chaynapim kikinpa tayta-mamallan willakuchkaptin paytaqa tuksiruspa wañurachinqa.
4 Chay tiempopiqa ñoqamanta willakuq tukuqkunapas penqakurunqakuñam revelacioninku willakusqankumantapas,
runakunata engañanankupaqqa manañam churakunqakuñachu willakuqkunapa qachqa capanwanqa.
5 Paykunaqa sapakamam ninqaku:
“Ñoqaqa manam Diosmanta willakuqchu kani aswanqa chakrapi llamkaqllam.
Ñoqaqa warma kayniymantam hina chakrallapi llamkaq kani” nispa.
6 Hinaptinmi wakin runakunañataq tapunqaku:
“Hinaptinqa ¿imataq cuerpoykipi kaq heridakunaqa?”
nispa.
Chaymi payñataq ninqa:
“Wasinkupim amistadniykuna kaynataqa ruraramuwanku” nispa.
Ovejakunapa michiqnin heridasqa kasqanmanta
7 Llapallan Kamachiq Diosmi nin kaynata:
Yaw espada,
qamqa rikcharispayá hatariy.
Yaw espada,
michiqniypa contranpiyá hatariy.
Yaw espada,
kuyaqmasiypa contranpiyá hatariy.
Ovejakunapa michiqnintayá wañurachiy,
chaynapim cheqerunqa ovejakunapas.
Sayarirusaqmi uñachankunapa contranpipas.
8 Ñoqa Tayta Diosmi nini kaynata:
Tukuy kay Israel nacionpiqa
llapallan runakunamanta
kimsa kaq partenpa iskay partenmi
wañuruspa chinkarunqaku.
Ichaqa llapallan runakunamanta
kimsa kaq partenpa huknin parteqa
hinallam puchurunqaku.
9 Chay kimsa kaq parte puchuruqkunataqa
rupachkaq ninantam pasachisaq.
Qollqeta chulluchichkaq hinam chuyanchasaq.
Qorita pruebachkaq hinam pruebasaq.
Hinaptinmi paykunañataq mañakuwanqaku ñoqata.
Ñoqañataqmi uyariykuspay nisaq kaynata:
“Kay runakunaqa ñoqapa runaykunam” nispa.
Chaymi paykunañataq ninqaku kaynata:
“Tayta Diosllam Diosninchikqa” nispa.