Muyuriqninpi nacionkuna castigasqa kananmanta
9
Hadrac nacionpa contranpim Tayta Dios willachiwarqa.
Damasco llaqtapa contranpim Tayta Dios willachiwarqa:
Ñoqa Tayta Diosqa qawachkanim llapallan runakunataqa.
Qawachkanitaqmi Israelpa llapallan ayllunkunataqa.
2 Hamat nacionpi yachaqkunatapas ñoqapunim qawachkani.
Damasco llaqtawan hichpalla kasqanraykum qawachkani.
Yachaysapa Tirotawan Sidon llaqtatam qawachkani.
3 Tiro llaqtayoqkunaqa murallatam hatarirachinku.
Qollqetapas ñutu allpata hinañam huñukurunku.
Qoritapas ñanpi mituta hinañam montokurunku.
4 Ichaqa ñoqa Tayta Diosmi paykunataqa wakchayarachisaq.
Lamar qochapi munaychakuyninkutapas ñoqam chinkarachisaq.
Chay llaqtataqa ñoqapunim ninawan ruparachisaq.
5 Ascalon llaqtapi yachaqkunapas
chayta qawaykuspam mancharikunqaku.
Gaza llaqtapi yachaqkunapas
wachakuq hinaraqmi qewiykachanqaku.
Ecron llaqtapi yachaqkunapas
manaña ima rurakuy atiqmi rikurirunqaku.
Gaza llaqtaqa mana reyniyoqñam rikurirunqa.
Ascalon llaqtaqa mana pipa yachasqanñam rikurirunqa.
6 Asdod llaqtapiqa yachanqaku forasterokunañam.
Filistea runakunapa hatunchakuynintaqa tukurusaqñam.
7 Paykunamantaqa yawarniyoq
aycha mikusqankutapas qechurusaqmi.
Paykunamantaqa millakuypaq kaqkuna
mikusqankutapas qechurusaqmi.
Ichaqa paykunamantapas puchuqkunam
Israel nacionpa Diosninpaqña kanqaku.
Chaynapim chay puchuqkunaqa
Juda nacionpi kamachikuq hinaraq kanqaku.
Ecron llaqtayoqkunañataqmi
Jebus runakuna hinaraq kanqaku.
8 Ñoqaqa runaykunapa muyuriqninpi sayaykuspaymi waqaychasaq.
Salteaqkuna kayman-wakman purinanmantam waqaychasaq.
Ñakarichiqkunaqa manañam pasanqachu chaynintaqa.
Kunanqariki kikiypuniñam waqaychasaq paykunataqa.
Israel nacionpa hamuq reyninmanta
9 ¡Sion llaqtapi yachaqkuna,
qamkunaqa llumpayllatañayá kusikuychik!
¡Jerusalen llaqtapi yachaqkuna,
qamkunaqa kusikuymantayá qapariychik!
Reynikichikqa qamkunamanmi hamuchkan.
Allin ruraq kaspam hamuchkan.
Payqa vencesqanmantam hamuchkan.
Asnopi silladam humildella hamuchkan.
Carga asnopa wawanpim hamuchkan.
10 Ñoqaqa chinkarachisaqñam
Efrain castakunapa guerrapaq carretankutapas.
Ñoqaqa chinkarachisaqñam
Jerusalen llaqtapa guerrapaq caballonkutapas.
Ñoqaqa chinkarachisaqñam
paykunapa guerrapaq flechana arconkutapas.
Nacionkuna hawkaña kananpaqmi
qamkunapa reynikichik paykunata rimapayanqa.
Chaynapim lamar qochamanta qallaykuspan
huknin lamar qochakama gobiernanqa.
Eufrates mayumanta qallaykuspam
kay pachapa cantonkama gobiernanqa.
Israel nacionta Tayta Dios salvaykusqanmanta
11 Yawarwanmi rurarqanchik contratota,
chayraykum qamkunamanta kaq presokunata
libraykusaq mana yakupa kanan pozomanta.
12 Librasqa kanaykichikpaqmi confianzawan
lliw presokunaqa suyachkankichik,
chaynaqa murallasqa llaqtaykichikmanyá kutikuychik.
Kunanmi qamkunaman willachkaykichik,
ñoqaqa ñawpaqmantapas iskay
kuti mastaraqmi kutichipusqaykichik.
13 Juda casta runakuna,
guerrapaq flechanayta hinam preparachkaykichik.
Efrain casta runakuna,
guerrapaq flechaykunata hinam preparachkaykichik.
Sion llaqtapi yachaqkuna,
qamkunaqa valeroso runapa espadan hinam kankichik.
Grecia nacionpi yachaqkuna,
paykunata hatarirachispam vencerachisqaykichik.
14 Tayta Diosqa runankunapa hawanpiñam rikurirunqa.
Paypaqa flechanpas llipyay hinaraqmi lloqsirunqa.
Señor Diosqa cornetata tocachkaq hinam qayarikunqa.
Señor Diosqa wayra-para hinam surlawmanta hamunqa.
15 Llapallan Kamachiq Tayta Diosmi
paykunataqa waqaychanqa.
Chaymi paykunaqa enemigonkunata venceruspa
convidota ruranqa.
Enemigonkupa warakasqan rumikunatam
paykunaqa saruparunqaku.
Vinotapas tomaruspam sinkakuna
hinaraq qayaykachakunqaku.
Medianopi yawar hunta hinaraqmi
paykunaqa huntasqa kanqaku.
Altarpa waqrachankunaman chaqchunanku mediano hinaraqmi kanqaku.
16 Yupaychasqanchik Tayta Diosmi
runankunata salvaykuwasun.
Chay tiempopiqa ovejakunata hinam
runankunata salvaykuwasun.
Chaynapim runankunaqa Diospa
allpanpiña kancharisunchik.
Coronapi alhaja rumikuna
hinam kancharisunchik.
17 ¡Mayna allinraq kanqa chay allpaqa!
¡Mayna sumaqraq kanqa chay allpaqa!
Trigopas manaña pisiptinmi mozokunapas
poqosqallaña kanqaku.
Vinopas mana pisiptinmi doncellakunapas
poqosqallaña kanqaku.