2-3 —Llapallan Kamachiq ñoqa Tayta Diosmi abueloykichikkunapa contranpi llumpa-llumpayta piñakurqani chaynaqa ñoqapa imam nisqaytayá paykunaman niy:

“Kutirikamuwaptikichikqa ñoqapas qamkunamanmi kutirikamusaq.

Chaynatam nini Llapallan Kamachiq ñoqa Tayta Dios.

4 Amayá qamkunaqa kaychik abueloykichikkuna hinachu.

Paykunatam ñawpaq tiempomantaraq ñoqamanta willakuqkuna qayaypaq-qayarqaku kaynata nispa:

‘Llapallan Kamachiq Tayta Diosmi kaynata nin:

Qamkunaqa qepanchakuychikñayá mana allin kawsasqaykichiktawan mana allin rurasqaykichiktaqa,

nispa.’

Ichaqa paykunaqa manam uyariqpas tukurqakuchu nitaqmi nisqaytaqa kaqpaqpas hapirqakuchu.

Ñoqa Tayta Diosmi nini chaynata.

5 Ichaqa kunanqa ¿maypimá kachkan abueloykichikkunaqa?

¿Wiñaypaqchum kawsachkanku ñoqamanta willakuqkunaqa?

6 Chaywanpas ñoqamanta willakuq serviqniykunawan willachisqay hinaspa decretachisqay castigom abueloykichikkunaman hayparurqa.

Paykunaqa wanakuspankum kaynata nirqaku:

‘Llapallan Kamachiq Tayta Diosqariki tanteasqanman hinam ño- qanchikwan rurarun,

payqariki imayna kawsasqanchikman hinaspa rurasqanchikman hinam ñoqanchikwan rurarun’ nispa.”

7 Rey Dario iskay watamanña gobiernachkaptinmi chay iskay kaq watapa chunka hukniyoq kaq killanpi (chay killaqa Sebat sutiyoqmi karqa) hinaspa chay killapa iskay chunka tawayoq punchawninpi,

ñoqa Zacariasta Tayta Dios rimapayawarqa,

ñoqaqariki paymanta willakuqmi kani,

abueloypa sutinmi Ido,

taytaypa sutinñataqmi Berequias.

8 Chay tuta Dios revelaykuwaptinmi rikurqani pukaniraq caballopi sillada runata,

chay silladaqa sayachkasqa macha-machakunapa wiñanan qechwapim.

Paypa qepanpiñataqmi sayachkasqa pukaniraq caballokuna,

alazan caballokuna hinaspa yuraq caballokuna.

9 Chaymi ñoqañataq tapurqani:

—Taytay ¿pikunataq wak sillada runakunaqa?

—nispa.

Hinaptinmi chay rimapayawaqniy angel niwarqa:

—Ñoqam qawachisqayki pikunam kasqankuta —nispa.

10 Hinaptinmi chay macha-machakunapa chawpinpi kaq sillada niwarqa:

—Kay silladakunataqa Tayta Diosmi kachamurqa tukuy kay pachapi kayman-wakman purinankupaq —nispa.

11 Hinaptinmi chay silladakunañataq willarqa chay macha-machakunapa chawpinpi sayaq Tayta Diospa angelninman kaynata:

—Ñoqaykuqa kay pachapim kayman-wakman puriramuniku.

Tukuy kay pachaqa mana imapapas pasasqanmi hawkalla kachkan —nispa.

12 Chaymi Tayta Diospa angelninñataq nirqa kaynata:

—Llapallan Kamachiq Tayta Dios,

qamqariki kay qanchis chunka watañam piñasqa kachkanki Jerusalen llaqtapaq chaynataq Juda lawpi llaqtakunapaqpas.

Chaynaqa ¿haykapikamataq manaña paykunamantaqa llakipayarikunkichu?

—nispa.

13 Hinaptinmi Tayta Diosñataq rimapayamurqa ñoqawan parlaq angelta,

payqa rimapayamurqa sumaq consuelakuq palabrakunawanmi.

14 Hinaptinmi chay rimapayawaqniy angelñataq kamachiwarqa kaynata qayakunaypaq:

—Llapallan Kamachiq Tayta Diosmi kaynata nin:

“Ñoqaqa sientinim Sion Moqopi Jerusalen llaqtamanta.

15 Chayraykum aswan piñasqa kachkani chay mana imapas qokuq nacionkunapa contranpi,

paykunaqa tumpallaraq piñasqa kachkaptiymi aswan-aswanraq dañokunata rurarqaku.

16 Chayraykum ñoqa Tayta Dios kaynata nini:

Kunanqariki llakipayarinaypaqmi kutirichkaniña Jerusalen llaqtaman,

chaypim temploy rurasqa kanqa chaynapim Jerusalen llaqtapiqa albañilkunapas huktawan llamkanqaku.

Chaynatam nini Llapallan Kamachiq ñoqa Tayta Dios.”

17 Chay rimapayawaqniy angelqa niwarqataqmi kaynata:

—Llapallan Kamachiq Tayta Diospa imam nisqantayá qayakuytaq kaynata:

“Runaykunapa llaqtankunatam huktawan llimparichisaq allin kaqkunawan.

Kikiy Tayta Diospunim Sion Moqopi yachaqkunataqa huktawan consuelasaq hinaspam kikiypaqña akllakuykusaq Jerusalen llaqtatapas” nispa.

18 Huktawan qawarispaymi revelacionniypi rikururqani tawa waqrakuna rikurimuqta.

19 Hinaptinmi chay ñoqawan rimaq angelta tapurqani:

—¿Imataq kaykunaqa?

—nispa.

Hinaptinmi payñataq niwarqa:

—Kay waqrakunamanmi rikchakun Israelpa castankuna cheqerachiq nacionkunaqa,

paykunam cheqerachirqa Juda nacionpi,

Israel nacionpi hinaspa Jerusalen llaqtapi yachaqkunata —nispa.

20 Tayta Diosqa qawachiwarqataqmi tawa herrerokunatapas.

21 Hinaptinmi ñoqañataq tapurqani:

—¿Imata ruranankupaqtaq wak herrerokunaqa hamuchkan?

—nispa.

Payñataqmi kaynata niwarqa:

—Yachasqaykipi hinapas wak waqrakunaqariki rikchakun Juda nacionniyoq runakunata mana sayariypas atinankukama cheqerachiq nacionkunamanmi,

chaynam wak herrerokunapas hamurqa chay cheqerachiq nacionkunapa atiyninta waqrata qoruchkaq hina qorurunankupaq.

Arí,

chay nacionkunaqariki Juda nacionta waqrapachkaq hinam chaypi yachaqkunata cheqerachirqa —nispa.