Mosoq templopa sumaqllaña kayninmanta
2
Chay watapa qanchis kaq killanpim hinaspa chay killapa iskay chunka hukniyoq punchawninpim Tayta Dios rimapayarqa paymanta willakuq Hageoman kaynata nispa:
2 —Yaw Hageo,
Salatielpa churin Zorobabelmanyá willamuy.
Zorobabelqariki Juda lawpi gobiernaqmi.
Willamuytaqyá Josadacpa churin Josueymanpas.
Josueyqariki sacerdotekunapa jefenmi.
Willamuytaqyá llapallan puchuq runakunamanpas kaynata:
3 “Qamkuna ukupiqa ¿yaqaraqchum pipas kachkan ñawpa tiempopi kay templopa sumaqllaña kayninta qawaq?
¿Imaynatataq qawachkankichik kay templotaqa?
¿Manachum kay qawasqaykichikqa yanqa-yanqallaman rikchakapusunkichik?
4 Chaynaqa kallpanchakuyá Zorobabel,
ñoqa Tayta Diosmi chaynataqa nichkayki.
Qampas kallpanchakuyá Josadacpa churin Josuey,
qamqariki kanki sacerdotekunapa jefenmi.
Kay allpapi llapallan runakuna,
qamkunapas kallpanchakuychikyá ñoqa Tayta Diosmi chaynataqa nichkaykichik.
Qamkunaqa llamkaychikyá,
ñoqaqariki yanapachkaykichikmi,
chaynataqa nichkaykichik Llapallan Kamachiq ñoqa Tayta Diosmi.
5 Egipto nacionmanta abueloykichikkuna lloqsimuptin paykunawan contrato rurasqayman hinam ñoqapa Espirituyqa qamkunata yanapasuchkankichik,
chaynaqa amayá manchakuychikchu.
6 Llapallan Kamachiq ñoqa Tayta Diosmi kaynata nikichik:
Manapas unaymantam katkatatachisaq cielokunata,
kay pachata,
lamar qochata chaynataq chaki allpatapas.
7 Katkatatachisaqtaqmi llapallan nacionkunatapas,
chaynapim qori-qollqenkutapas apamunqaku hinaptinmi temployqa llumpay kancharichkaqña kanqa.
Chaynatam nini Llapallan Kamachiq ñoqa Tayta Dios.
8 Ñoqapam qollqepas chaynataq qoripas.
Chaynatam nini Llapallan Kamachiq ñoqa Tayta Dios.
9 Kay temploqa punta kaq templopa sumaqllaña kayninmantapas aswan sumaqraqmi kanqa.
Chaynatam nini Llapallan Kamachiq ñoqa Tayta Dios.
Hawkayaytañam qosqaykichik ñoqa Tayta Diosqa.”
Mana kasukuq kasqankumantam qaqchachikunku.
10-11 Iskay watamanña Rey Dario gobiernachkaptinmi isqon kaq killapi hinaspa chay killapa iskay chunka tawayoq punchawninpi Llapallan Kamachiq Tayta Dios rimapayarqa paymanta willakuq Hageoman chaynapi yachachikuyninkunamanta sacerdotekunata tapunanpaq:
12 —Sichum huk kaqnin millqayninpi apachkanman Tayta Diospaq sapaqchasqan aychata ichaqa qonqaytañataq chay pachanpa puntan tupaykunman tantaman otaq imapas yanuyman otaq vinoman otaq aceiteman otaq ima mikuymanpas hinaptinqa ¿chay mikuyqa Diospaq sapaqchasqañachum rikurirunqa?
—nispa.
Sacerdotekunañataqmi nirqaku:
—Manam —nispa.
13 Chaymi Hageoñataq tapurqa:
—Wañusqapa cuerponta huk kaqnin llapcharuspanqa millakuypaqñam kachkan.
Chaynaqi millakuypaqña kaq runapas chay huk kaqnin mikuyta tupaykuptinqa ¿chay tupaykusqan mikuyqa karunqa millakuypaqñachum?
—nispa.
Hinaptinmi sacerdotekunañataq nirqaku:
—Arí,
millakuypaqñam rikurirunqa —nispa.
14 Chaymi Hageoñataq nirqa:
—Tayta Diosmi kaynata nisunkichik:
“Chaynapunim qayllaypiqa kay nacionpi runakunapas kachkankichik.
Qamkunapa imapas rurasqaykichikqa chaynataq kaypi imapas ofrecewasqaykichikqa millakuyllapaqñam.
15 Chaynaqa kunan punchawmanta ñawpaqmanqa yuyaymanaychikyá ñoqa Tayta Diospa temployta manaraq perqachkaptikichikqa.
16 ¿Imataq pasasurqankichik?
Pipas iskay chunka kullu montonman asuykuqmi tariruq chunka kullullataña.
Pipas pichqa chunka puyñu vinota horqonanpaq asuykuqmi waqaychananku sitiopiqa iskay chunka puyñullataña tariruq.
17 Ñoqaqa llamkasqaykichiktapas rupachkaq wayrawan kañaruspaymi qoqararachirqani,
tukuchirqanitaqmi runtu parawanpas ichaqa chaywanpas manam ñoqamanqa kutirikamuwarqankichikchu.
Chaynatam nini ñoqa Tayta Dios.
18 Kunan punchawqa isqon kaq killapa iskay chunka tawayoq punchawninmi,
kunan punchawpunim temploypa cimientonkuna churasqa kanqa.
Chaynaqa kunan punchawmanta ñawpaqmanqa yuyaymanaychikyá.
19 Taqekunapi muhukuna manaña kaptinpas uvas plantawan higos sacha manaña ruruptinpas chaynataq granada sachawan aceitunas sacha manaña ruruptinpas kunanmantaqa ñoqam qamkunata bendecisqaykichik” nispa.
Zorobabelman Tayta Dios prometekusqanmanta
20 Hina chay chunka tawayoq punchawllapitaqmi Hageoman Tayta Dios huktawan rimapayarqa kaynata:
21 —Yaw Hageo,
qamqa Juda lawpi gobiernaq Zorobabeltayá rimapayay kaynata:
“Ñoqaqa katkatatachisaqmi cielokunatapas hinaspa kay pachatapas.
22 Ñoqaqa nacionkunapi gobiernokunatapas atiynintawanmi mana kaqmanña churarusaq.
Urmarachisaqtaqmi guerrapaq carretakunatawan manejaqninkunatapas.
Kikillankupura espadawan tuksinakuruptinkum wikapakurunqa caballokunapas sillakuqninkunapiwan.
23 Llapallan Kamachiq ñoqa Tayta Diosmi kaynata nini:
Salatielpa churin serviqniy Zorobabel,
chay punchawpiqa sello churana anillota hinachichkaq hinam rantiypiña gobiernanaykipaq churasqayki.
Qamtaqariki ñoqam akllakurqayki.
Chaynatam nini Llapallan Kamachiq ñoqa Tayta Dios.”