3
Ñoqa Tayta Diosmi nini kaynata:
Chay punchawkuna chayaramuptinqa,
chay tiempokuna chayaramuptinqa
Juda castakunatam
preso kasqanmanta kutichimusaq,
Jerusalen llaqtapi yachaqkunatam
preso kasqanmanta kutichimusaq.
2 Ñoqaqa llapallan nacionkunapi yachaq runakunatam
huñurusaq.
Paykunataqa aJosafat sutiyoq qechwamanmi
pusarusaq.
Chaypim paykunataqa runaykunarayku juzgasaq.
Israel runaykunaraykum paykunataqa juzgasaq.
Israel runaykunataqariki
tukuy hinastinmanmi cheqerachirqaku.
Paykunaqariki sapakamam
nacionniytapas partinakururqaku.
3 Paykunaqa runaykunapaqmi
suertekunatapas chamqarqaku.
Paykunaqa huk chuchumikapaqmi
qari churinkutapas qoykurqaku.
Paykunaqa vino upyakurunankupaqmi
warmi churinkutapas rantikururqaku.
Nacionkunata Tayta Dios juzgasqanmanta
4 —Chaynaqa Tiro llaqtapi yachaqkuna,
Sidon llaqtapi yachaqkuna hinaspa Filistea runakuna ¿imatataq qamkunaqa ñoqawan munankichik?
¿Imapas merecesqay qoykuwaytachu munachkankichik?
¿Pagoy qoykuwaytachum qamkunaqa munachkankichik?
Chayna kaptinqa merecesqaykichiktam apurawman pagaykapusqaykichik.
5 Qamkunaqariki qori-qollqeytapas suwaruwarqankichikmi,
munayllapaqña sumaq kapuwaqniykunatapas temploykichikmanmi apaykururqankichik.
6 Qamkunaqa Juda nacionpi yachaqkunatapas hinaspa Jerusalen llaqtapi yachaqkunatapas rantikururqankichik Grecia nacionniyoq runakunamanmi,
chaynataqa rurarqankichik nacionninkumanta karunchasqa kanankupaqmi.
7 Ichaqa chay rantikurusqaykichik nacionkunamantam paykunataqa horqomusaq,
chaynapim merecesqaykichiktaqa qamkunamanña pagapusqaykichik.
8 Qari churikichikkunatapas hinaspa warmi churikichikkunatapas rantikurusaq Juda castakunamanñam,
paykunañataqmi rantikurunqa karupi yachaq Saba runakunamanña.
Chaynatam ñoqa Tayta Dios nini.
9 Nacionkunamanyá kaynata willakuychik:
“Ñoqapaqyá guerrata hatarichiychik.
Valeroso soldadokunatayá hoqarichiychik.
Guerrapi llapallan peleaqkunayá asuykamuchunku.
Guerrapi llapallan peleaqkunayá hamuchunku.
10 Rejaykichiktapas espadamanñayá tikraychik.
Rutunaykichiktapas lanzamanñayá tikraychik.
Eqo runakunapas kallpayoqpaqñayá hapikuychik.
11 Hichpaykupi kaq llapallan nacionkuna,
yanapawanaykikupaqyá qamkunaqa hamuychik.
Qamkunaqa chaypiyá huñunakuychik.
Dios Taytalláy,
chaymanyá pusamuy
valeroso soldadoykikunataqa.
12 Rikcharispayá Josafat Qechwaman
richunku llapallan nacionkunaqa.
Chaypi tiyaykuspaymi muyuriqninpi
llapallan nacionkunata juzgasaq ñoqaqa.
13 Chaynaqa rutunaykichikta hapispayá rutuychik.
Rutuy tiempo chayaramusqanraykuyá rutuychik.
Uraykamuychikyá,
uvas sarunaqa
huntallañam kachkan.
Uraykamuychikyá,
vino waqaychanaqa
llimpariqñam kachkan.
Llumpay mana allin kasqankuraykum
chaynaqa kachkan.”
14 Nana-nanaq runakunam kachkan
runakunapa suerten decidina qechwapiqa.
Tayta Diospa castiganan punchawqa hichpaykamuchkanñam
runakunapa suerten decidina qechwapiqa.
15 Tutayarunqañam inti-killapas.
Manañam kanchinqachu lucerokunapas.
16 Tayta Diosqa Sion Moqomantam qaparimunqa.
Tayta Diosqa Jerusalen llaqtamantam qayakamunqa.
Cielokunapas kay pachapiwanmi katkatatanqa.
Tayta Diospim runakunaqa amparakunqaku.
Tayta Diospim Israel castakunaqa kallpanchakunqaku.
Juda nacionqa anchallaña bendecisqa kananmanta
17 Chaynapim qamkunaqa yachankichik ñoqaqa
yupaychasqaykichik Tayta Dios kasqayta.
Chaynapim qamkunaqa yachankichik
sapaqchakusqay Sion Moqopi yachasqayta.
Chaynapim Jerusalen llaqtapas
kanqa ñoqallapaqña sapaqchasqa.
Huklaw llaqtayoq runakunapas
manañam pasanqañachu chaynintaqa.
18 Chay tiempokunapiqa orqokunamantam
vinopas puririnqa.
Chay tiempokunapiqa moqokunamantam
lechepas kallparinqa.
Juda nacionpa llapallan yarqankunapipas
yakukunam sumaqllataña kallparinqa.
Ñoqa Tayta Diospa temploymantapas
toqyaq yakum lloqsinqa.
Sitim sutiyoq qechwata parqonanpaqmi
chaymantaqa yaku lloqsinqa.
19 Egipto nacionqa purmachisqañam rikurirunqa.
Edom nacionqa purmachisqa chunniqñam rikurirunqa.
Juda casta runakunata
ñakarichisqankuraykum chaynaqa kanqaku.
Paykunaqariki Juda nacionpim
mana huchayoqkunata wañuchirqaku.
20 Ichaqa Juda nacionqa wiñaypaqmi
runakunapa yachasqan kanqa.
Jerusalen llaqtaqa wiña-wiñaypaqmi
runakunapa yachasqan kanqa.
21 Manaraq pampachasqay runa wañuchiqkunatam
huchankumanta ñoqaqa pampachasaq.
Ñoqa Tayta Diosqa Sion Moqopim yachakusaq.