JOELPA QELLQASQAN LIBRO
Cosechakunata Aqarway urukuna tukusqanmanta
1
Petuelpa churin Joelwanmi Tayta Dios kaynata nichirqa:
2 ¡Kaytayá uyariychik ancianokuna!
¡Atiendeychikyá nacionpi llapallan yachaqkuna!
¿Kaynaqa pasarqachu tiempoykichikpi
otaq abueloykichikkunapa tiemponpi?
3 Qamkunaqa willaychikyá churikichikkunaman.
Paykunañataqyá willachunku churinkunaman.
Paykunapas willachunkutaqyá hamuq miraykunaman.
4 Puyu hinaña aqarwaypa
puchusqantam mikururqa
mana raprayoq aqarwaykuna.
Mana raprayoq aqarwaykunapa
puchusqantam mikururqa chikrikuna.
Chikrikunapa puchusqantañataqmi
mikururqa wakin aqarwaykuna.
5 Sinkakuna,
rikchaspayá waqaychik.
Vino upyaqkuna lliwyá qapariychik.
Manaña upyanaykichikpaq kaptinyá qapariychik.
6 Mana yupay atina tropakuna hinam
aqarwaykuna nacionniyta atacaramun.
Leonpa kirunwan kachuruchkaq hinam
plantaykunata mikuramun.
China leon waqonwan kachuruchkaq hinam
plantaykunata tukuramun.
7 Paykunaqa uvas plantallaytapas
pasaypaqtam purmarachinku.
Paykunaqa higos sachallaykunatapas
pasaypaqmi pakiparunku.
Kallmankunatapas qalaturuspam
pampamanraq wischuykunkupas.
Yuraqllatañam rikurirachinku
kallmachankunatapas.
8 Wañukuq qosanmanta waqachkaq
hinayá qaparkachaychik.
Sipasllaraq viuda lutokuchkaq
hinayá qaparkachaychik.
9 Tayta Diospa templonpiqa
manam kanñachu kawsaykunamanta ofrendakunapas.
Tayta Diospa templonpiqa
manam kanñachu ofrecenapaq vinopas.
Waqayllapiñam kachkanku
Tayta Diospa serviqnin sacerdotekunapas.
10 Chakrakunapas purmasqañam kallachkanku.
Allpakunapas lutoyoq hinañam kallachkanku.
Chaynaqa kachkanku kawsaykunapas
purmachisqa kasqanraykum.
Chaynaqa kachkanku vinopas
chakirusqanraykum.
Chaynaqa kachkanku aceitepas
pisirusqanraykum.
11 Chakrapi llamkaqkuna,
qamkunaqa muspaypi hinañayá rikuriruychik.
Uvas plantawan llamkaqkuna,
qamkunaqa waqapakuypaqyá-waqapakuychik.
Trigomanta cebadamantayá
waqayllapiña kaychik.
Chinkaruq cosechamantayá
chaynataqa waqaychik.
12 Uvas plantapas
aceitunas sachapiwanmi chakirunña.
Granada sachapas
palmera sachapiwanmi qawirunña.
Manzana sachapas
chakrakunapi lliw sachapiwanmi chakirunña.
Chaynatam llapallan runakunapa kusikuyninpas
chinkarunña.
13 Sacerdotekuna,
qamkunaqa luto pachawanyá churakuychik.
Qamkunaqa qapariyllawanñayá waqaychik.
Altarpi servikuqkuna,
qamkunaqa llakikuymantayá qaparkachaychik.
Diosniypa serviqninkuna,
qamkunaqa hamuspayá luto pachantin puñuychik.
Diosnikichikpa templonpiqa
manam kanñachu kawsay ofrendakunapas.
Diosnikichikpa templonpiqa
manam kanñachu vino ofrendakunapas.
14 Qamkunaqa ayunotayá ruraychik.
Qamkunaqa runakunatayá huñuychik.
Yupaychasqanchik Tayta Diospa templonmanyá
huñumuychik ancianokunata.
Yupaychasqanchik Tayta Diospa templonmanyá
huñumuychik kay nacionpi llapallan yachaqkunata.
Qamkunaqa Tayta Diostayá qayakuychik allinneqta.
15 ¡Achachalláw imaraq pasakunqa
chay punchawpiqa!
Chayaykamuchkanñam
Tayta Diospa castiganan punchawqa.
Chayaykamuchkanñam
Tukuy Atiyniyoq Diospa puchukachiyninqa.
16 Qawachkaptinchikmi mikusqanchiktapas
qechuruwarqanchik.
Diosninchikpa templonpi kusikuypas
pasaypaqñam chinkarapuwanchik.
17 Muhukunapas kurpa ukupim
mana valeqña kachkan.
Kawsay waqaychana wasikunapas
tuñichisqañam kachkan.
Taqekunapas lliki-llikiñam kachkan.
Muhukunapas mana valeqña kasqanraykum
chaynaqa kachkan.
18 Mikunankupaq mana kaptinmi
animalkunapas waqachkanku.
Bueyeskunapas muspaypi hinañam
purillachkanku.
Ovejakunapas yarqaymantam
ñakarillachkanku.
19 Dios Taytalláy,
qamllatam qayakamullayki.
Chunniqpi pastokunatapas
nina ruparusqanraykum
qamtaqa qayakamullayki.
Chakrakunapi sachakunatapas
lenguachkaq nina ruparusqanraykum
qamtaqa qayakamullayki.
20 Chakrakunapi animalkunapas qaparkachaspam
qamta qayakusunki.
Wayqokunapi yakukunapas chakirusqanraykum
animalkunaqa qayakamusunki.
Chunniqpi pastokunatapas nina ruparusqanraykum
animalkunaqa qayakamusunki.