Mana kasukuq runankunapaq Diospa kuyakuyninmanta
11
Israel runakunatam warmallaraq kaptin kuyarqani.
Churiytam Egipto nacionmanta qayamurqani.
2 Aswan-aswan qayaptiymi
aswan-aswanraq karunchakurqaku.
Baal sutiyoq taytachakunapaqraqmi
animalkunata wañuchipurqaku.
Taytacha-mamachakunapaqraqmi
inciensokunata kañarqaku.
3 Ñoqam yachachirqani
Efrain castakuna puriytaqa.
Marqayniypi apachkaptiypas
manam entienderqakuchu paykunaqa.
Manam entienderqakuchu
ñoqapuni waqaychasqaytaqa.
4 Paykunataqa waskawan hinam chutaykurqani.
Paykunataqa kuyakuyllawanñam chutaykurqani.
Paykunataqa toropa yugonta
uraykachichkaq hinam samaykachirqani.
Ñoqaqa kurkuykuspaymi paykunata mikuchirqani.
5 Egipto nacionman mana kutiqñam kanqaku.
Asiria nacionpa reyninmi kanqa reyninku.
Mana wanakusqankuraykum chaynaqa kanqaku.
6 Yachananku llaqtakunapas
guerrapa tukusqanmi kanqa.
Chay llaqtakunapa punkunpas
pakipasqam kanqa.
Kikinkupuni tanteasqankuraykum
kanqaku puchukachisqaqa.
7 Hinallaraqmi ñoqamanta
karunchakuchkanku runaykunaqa.
Alto-altopi kaq Diosta qayakuwaptinkupas
manam hoqarisaqchu ñoqaqa.
8 Efrainpa castankunataqa
¿imaynataq saqeruykichikman?
Israelpa castankunataqa
¿imaynataq qoykuykichikman?
Adma llaqtata hinaqa
¿imaynataq qoykuykichikman?
Zeboim llaqtata hinaqa
¿imaynataq ruraykiman?
Piensaylla-piensaptiypas sonqollaymi tukukun.
Tanteaylla-tanteaptiypas ukullaymi llakirikun.
9 Manam llumpay piñakuyniyman hinachu
rurasaq ñoqaqa.
Manañam puchukachisqaykichikchu
Efrainpa castankunataqa.
Ñoqaqa manam runachu kani aswanqa Diosmi.
Ñoqaqa kani chawpikichikpi kaq Chuya Diosmi.
Manam piñakuywanchu hamusaq qamkunamanqa.
10 Qamkunaqa ñoqa Tayta Diostam qatiwankichik.
Leon hina ñawrawyaptiymi qatiwankichik.
Chaynata qapariptiymi qamkunapa miraynikichikqa
katkatatastin intipa qespimunan lawmanta hamunqa.
11 Alton pawaqkuna hinam katkatatastin
Egiptomanta pawamunqaku.
Palomakuna hinam katkatatastin
Asiria nacionmanta hamunqaku.
Yanapaptiymi wasinkupi huktawan yachanqaku.
Ñoqa Tayta Diosmi nini chaynata.
Israel castakunapa huchallikusqanmanta
12 Efrainpa castankunaqa llullallata
rimaspam intuypaq-inturuwan.
Israelpa castankunaqa engañollata
rimaspam muyuypaq-muyuruwan.
Judapa castankunaqa ñoqa
Diosninkumantam karunchakurunku.
Confiakunapaq kachkaptiypas
ñoqa Chuya Diosmantam karunchakurunku.