Tayta Diosta qepanchakuqkuna castigasqa kanankumanta
5
Llapallan sacerdotekuna,
kay rimasqaykunatayá uyariychik.
Israelpa castankuna,
kay rimasqaykunatayá uyariychik.
Reypa castankuna,
kay rimasqaykunatayá uyariychik.
Mizpa lawpi toqlla hina kasqaykichikraykum
qamkunaqa juzgasqa kankichik.
Tabor Moqopi malla hina kasqaykichikraykum
qamkunaqa juzgasqa kankichik.
2 Sitim Qechwapim uchkuta toqorqankichik.
Chayraykum llapallaykichikta corregisqaykichik.
3 Efrainpa castankuna,
reqsikichikmi qamkunataqa.
Manam pakasqachu Israelpa castankunaqa.
Efrainpa castankunaqa
huchapakuyllapim kachkankichik.
Israelpa castankunaqa
huchallikuyllapim kachkankichik.
4 Mana allin rurasqaykichikmi mana saqesunkichikchu,
Diosnikichikman kutirikuwanaykichikpaq.
Hukwan-hukwan kakusqaykichikmi mana saqesunkichikchu
ñoqa Tayta Diosta reqsiwanaykichikpaq.
5 Israelpa castankuna,
qamkunapa contraykichikpim
sayarirun hatun tukuq kasqaykichik.
Israelpa castankunaqa otaq Efrainpa castankunaqa,
mana allin rurasqaykichikpim wichiykunkichik.
Judapa castankunawan kuskam wichiykunkichik.
6 Ovejaykichikwan vacaykichikwanmi
ñoqa Tayta Diosta maskawankichik.
Qamkunamanta karunchakuruptiymi
mana tariyta maskawankichik.
7 Qamkunaqa wachapakuq hinam
ñoqa Tayta Diosta traicionaruwankichik,
Chayraykum chakraykichikpiwan
kuska mosoq killa fiestapi tukusqa kankichik.
Israel nacionpiwan Juda nacion castigasqa kananmanta
8 Gabaa llaqtapiyá
guerrapaq cornetata tocaychik.
Rama llaqtapiyá
guerrapaq cornetillata tocaychik.
Bet-aven llaqtapiyá guerrapaq qapariychik.
Benjaminpa castankunaqa guerramanyá puntaychik.
9 Israelpa ayllunkunamanmi willakuni
cheqaptapuni imam pasananmanta.
Castigasqay punchawqa tukuparusaqmi
Efrainpa castankunata.
10 Chakrakunapi linderokunata miraykachikuq hinam
kanku Juda nacionpi kamachikuqkunaqa.
Ichaqa piñakuyniytam lloqllata hinaraq
kachaykusaq paykunamanqa.
11 Efrainpa castankunaqa ñakarichisqam kachkanku.
Paykunaqa juiciopi sarupasqañam kachkanku.
Paykunaqa yanqakunata qatiyllapim kachkanku.
12 Efrainpa castankunataqa
pacha mikuq puyu hinam tukurusaq.
Judapa castankunataqa
ismuypaqmi-ismurachisaq.
13 Efrain castakuna onqosqanta qawakuykuptinmi,
Juda castakuna heridanta qawakuykuptinmi
Efrainpa castankuna Asiria nacionta rinqaku.
Yanapachikunankupaqmi hatun reyman kachanqaku.
Yaw Efrain castakuna,
chay reyqa
manam sanoyachiyta atisunkichikchu.
Yaw Efrain castakuna,
chay reyqa
manam heridaykichiktaqa hampisunkichikchu.
14 Efrainpa castankunataqa
leon hinam llikiparusaq.
Judapa castankunataqa
malta leon hinam llikiparusaq.
Paykunata aparikuspaymi pasakusaq ñoqaqa.
Manam pipas librayta atinqachu paykunataqa.
15 Huchankuta reqsikunankukamam
maymi kasqayman kutikusaq.
Maskaqniy hamunankukamam
maymi kasqayman kutikusaq.
Ñakaristin maskawanankukamam
ñoqaqa kutikusaq.