2 —Tayta Diosmi kaynata nin:

“Kay llaqtapi yachaqkunam guerrawan,

yarqaywan hinaspa peste onqoywan wañunqaku.

Caldea runakunaman hukllawakuqmi ichaqa wañuymanta librakuspan kawsayllapas-kawsanqaraq.

3 Ñoqa Tayta Diosmi nini kaynata:

Cheqaptapunipas kay llaqtataqa Babilonia nacion reypa tropankunaman entregaykuptiymi vencerunqaku,

nispa.”

4 Paymanmi chay kamachikuqkuna nirqaku:

—Kay runaqa chayna palabrakunata rimaspanmi kay llaqtapi puchuq soldadokunatawan llapallan runakunata hukmanyachichkan,

chaynaqa wañunanpunim.

Kay runaqa manam runakunapa hawka kaynintachu munachkan aswanqa mana allinninkutam —nispa.

5 Chaymi Rey Sedequiasñataq nirqa:

—Chay runaqa makikichikpim kachkan.

Ñoqaqa manam ima ruraytapas atiymanchu contraykichikpiqa —nispa.

6 Chaymi kamachikuqkunaqa Jeremiasta hapiruspanku reypa churin Malquiaspa pozonman waskakunawan uraykachirqaku.

Chay pozoqa kachkarqa carcelpa pationpim mana yakuyoq.

Chayman Jeremiasta kachaykuptinkum mituman seqaykurqa mitullaña kasqanrayku.

7 Ichaqa reypa palacionpi servikuq Cus nacionniyoq Ebed-melec runam uyarirurqa Jeremiasta pozoman kachaykusqankuta.

Reyñataqmi chay ratopi kachkarqa Benjamin sutiyoq zaguanpi huñunakuqkunawan rimaspa.

8 Palaciomanta Ebed-melec pasaspanmá reyman willarqa:

9 —Reynilláy,

Diosmanta willakuq Jeremiasta pozoman kachaykachiq runakunaqa runata wañuchichkaq hinam mana allinta rurarunku.

Chaypiqa yarqaymantam wañurunqa,

kay llaqtapiqariki tantapas manam kanñachu —nispa.

10 Hinaptinmi reyñataq chay Cus nacionniyoq Ebed-melecta kamachirqa:

—Kimsa chunka runakunata kaymanta pusaspaykiyá Diosmanta willakuq Jeremiasta horqomuychik chay pozomanta manaraq wañuruchkaptin —nispa.

11 Runakunata pusarikuspamá Ebed-melecqa kutirirqa palaciopi tarikuq qori-qollqe waqaychana cuartopa urayninpi kaq cuartoman.

Chaymanta mawka latapakunata aparikuspanmi waskapi watasqata kachaykurqa pozopi tarikuq Jeremiasman.

12 Hinaspam nirqa:

—Chay latapakunata wallwaykipi waskawan hapirachiy —nispa.

Chaynatamá Jeremias rurarqa.

13 Jeremiasta waskakunawan pozomanta horqoruptinkum carcelpa pationpiña yacharqa.

14 Rey Sedequiasmi Jeremiasta pusarachimurqa templopa kimsa kaq pationman.

Chaypim Jeremiasta nirqa:

—Kunanmi tapuptiy imam kaqllata niwanki —nispa.

15 Chaymi Jeremiasñataq nirqa:

—Imam kaqllata niptiyqa wañurachiwankim,

consejaptiypas manam kasuwankichu —nispa.

16 Chaymi Rey Sedequiasqa pakasqallapi juraspan Jeremiasta nirqa:

—Kawsachiwaqninchik Tayta Diosraykum jurani:

Manam wañuchisqaykichu nitaqmi wañuchiy munasuqniki runakunamanpas qosqaykichu —nispa.

17 Hinaptinmi Jeremiasñataq nirqa:

—Israelpa yupaychasqan Llapallan Kamachiq Tayta Diosmi nin:

“Babilonia nacion reyta yanapaq kamachikuqkunaman cheqaptapunipas entregakuspaykiqa kawsankim,

kawsanqataqmi aylluykikunapas.

Kay llaqtatapas manataqmi kañanqakuchu.

18 Sichu paykunaman mana entregakuptikiqa Caldea runakunam kay llaqtata venceruspa kañaykunqaku hinaptinqa qampas manam paykunamantaqa lluptinkichu” nispa.

19 Hinaptinmi Rey Sedequiasñataq nirqa:

—Caldea runakunaman entregakuq Juda casta runakunatam manchakuni.

Paykunaman Caldea runakuna qoykuwaptinqa ñakarichiwanmankum —nispa.

20 Chaymi Jeremiasñataq nirqa:

—Juda castakunamanqa manam qosunkichu.

Willasqayman hina Tayta Diospa nisqanta kasukuspaqa allinmi kanki chaynataqmi vidaykitapas libranki.

21 Mana entregakuptikiqa Tayta Diospa qawachiwasqanpi hinapas

22 Juda nacion wasikipi puchuq llapallan warmikunam Babilonia nacionpa reyninta yanapaq kamachikuqkunaman qosqa kanqaku.

Hinaptinmi chay warmikuna nisunki:

23 —Chaynaqa llapallan warmikikunatawan churikikunatam Caldea runakunaman qoykunqaku.

Qamqa manam lluptinkichu paykunamantaqa.

Babilonia nacionpa reynin presocharususpaykim kay llaqtatapas kañaykunqa —nispa.

24 Chaymi Rey Sedequias nirqa:

—Kay niwasqaykikunataqa amam pimanpas willankichu,

mana chayqa wañuruwaqmi.

25 Qanwan parlasqanchikta kamachikuqkuna yacharuspankuqa hamurunqakum tapusuqniki.

Ichapas paykunaqa nisunkiman:

“Ama pakaspayá willaykuwayku reywan parlamusqaykita.

¿Imatataq reymanqa nimurqanki otaq imatataq payqa nisurqanki?

Willawaptikikuqa manam wañuchisqaykikuchu” nispa.

26 Hinaptinqa paykunatam ninki:

“Ñoqaqa reytam ruegakamurqani Jonatanpa wasinman amaña kutichiwananpaq chaypi mana wañurunaypaq” nispa.

27 Reypa nisqanpi hinamá llapallan kamachikuqkuna Jeremiaspata rispanku tapurqaku.

Chaymi Jeremiasqa reypa kamachisqanta hinalla lliwta willakurqa.

Reywan parlasqanta pipas mana uyarisqanraykum upallalla karqaku.

28 Chaynapimá Jeremiasqa carcelpa patiollanpiña yacharqa Jerusalen llaqta vencesqa kanankama.