—Rurakaramuy yugotawan coyundata hinaspayá matankaykiman watakaramuy.

3 Chaymantam willachimunki Edom nacionpa reyninman,

Moab nacionpa reyninman,

Amonpa mirayninkunapa reyninman,

Tiro llaqtapa reyninman hinaspa Sidon llaqtapa reyninman.

Juda nacionpa reynin Sedequiasta watukunankupaq Jerusalen llaqtaman hamuq runakunawanmi chay reykunamanqa willachimunki.

4 Israelpa yupaychasqan Llapallan Kamachiq ñoqa Tayta Diospa nisqaytam chay runakunaman kamachinki reyninkuman kaynata willamunankupaq:

5 “Hatu-hatun atiyniywanmi rurarqani kay pachatawan chaypi kaq runakunatapas chaynataq animalkunatapas.

Chaykunataqa munasqayman hinam pimanpas qoni.

6 Kunanqa llapallan chay nacionkunatam qoni Babilonia nacionpa reynin serviqniy Nabucodonosorman.

Qonitaqmi purun animalkunatapas payta servinankupaq.

7 Llapallan nacionkunam servinqaku payta,

churinta chaynataq willkantapas.

Chaynaqa kanqa Babilonia nacionpi yachaqkunata achka nacionkunawan munayniyoq reykuna munaychakunan tiempokamallam.

8 Sichu mayqan nacionpas otaq mayqan gobiernopas Babilonia nacionpa reynin Nabucodonosorta mana serviyta munaptinqa chaynataq payman mana sujetakuyta munaptinqa chay naciontam guerrawan,

yarqaywan hinaspa peste onqoywan castigasaq.

Chay naciontaqa tukunaykamam castigasaq Rey Nabucodonosorwan.

Ñoqa Tayta Diosmi chaynata nini.”

9 “Amayá kasuychikchu ñoqamanta willakuqkunataqa,

musyaqkunataqa,

mosqoykunapa imam ninan willakuqkunataqa,

suerte choqaqkunataqa nitaq brujokunatapas.

Paykunaqa consejasuchkankichik Babilonia nacionpa reyninta manaña servinaykichikpaqmi.

10 Paykunaqa allpaykichikmanta karuncharusunaykichikpaqmi chayna llullakunata willasuchkankichik chaynapi ñoqapas karu nacionman qarqoruptiy chinkarunaykichikpaq.

11 Babilonia nacion reypa llasaq yugonman sujetakuqkunatam ichaqa hina allpallanpi saqerusaq hinaptinmi chakrankutapas llamkaspa hinapi yachanqaku.

Ñoqa Tayta Diosmi chaynata nini.”

12 Ñoqa Jeremiasmi Juda nacionpa reynin Zedequiasman willaspay kaynata nirqani:

—Babilonia nacionpa reyninmanyá runankunamanwan yugoman hina sujetakuychik.

Chaynata ruraspaqa kawsankichikmi.

13 Qampas chaynataq runaykikunapas ¿yanqapaqchum guerrawan,

yarqaywan chaynataq peste onqoywan wañuwaqchik?

Tayta Diospa nisqanpi hinapas Babilonia nacionpa reyninta mana serviy munaq nacionkunatam chaykunaqa sucedenqa.

14 Ñoqamanta willakuqkunam llullakuspa consejasunkichik Babilonia nacionpa reyninta mana servinaykichikpaq.

Amayá paykunataqa kasuychikchu.

15 Paykunataqa manapunim kachamurqanichu.

Paykunaqa ñoqapa sutiypim llullallata rimachkanku qamkunata cheqerachisunaykichikpaq.

Chaynaqa qamkunapas chaynataq ñoqamanta llullakuspa willasuqnikichikkunapas chinkachisqam kanqa —nispa.

16 Sacerdotekunamanpas chaynataq llapallan runakunamanpas Tayta Diospa nisqantam kaynata nirqani:

—Willakuq tukuqkunam nichkanku:

“Templopa servicionkunataqa Babilonia llaqtamantam prontolla kutichimunqaku” nispa.

Chay nisqankuqa llullam.

17 Chaynaqa paykunata ama kasuspayá Babilonia nacionpa reyninta serviychik,

chaynata ruraspaqa kawsankichikmi.

¿Imanasqataq kay llaqtaqa purmachisqa kanman?

18 Sichu ñoqamanta cheqap willakuqkuna kaspankuqa chaynataq palabraypas paykunapi kaptinqa Llapallan Kamachiq ñoqa Tayta Diostayá ruegakuwachunku chaynapi temploypi puchuq serviciokunatapas chaynataq Juda nacionpi reypa wasinpi hinaspa Jerusalenpi puchuq serviciokunatapas Babilonia llaqtaman ama apanankupaq.

19-22 “Ñoqa Tayta Diosmi nini:

‘Joacimpa churinta otaq Juda nacionpa reynin Jeconiasta Rey Nabucodonosor Jerusalen llaqtamanta Babilonia llaqtanman presochasqata pusachispanqa chaynataq Jeconiaswan kuskata Juda nacionpi chaynataq Jerusalen llaqtapi llapallan kamachikuqkunata pusachispanqa,

Rey Nabucodonosorqa manam aparqachu templopa pilarninkunataqa,

broncemanta hatun estanquetaqa,

lavatoriokunapa broncemanta carretankunataqa nitaq llaqtapi wakin serviciokunatapas.

Templopi serviciokunamantawan Juda nacionpi,

reypa wasinpi chaynataq Jerusalen llaqtapi puchuq serviciokunamantam ñoqa Tayta Dios nini:

Chaykunataqa Babilonia llaqtamanmi apanqaku.

Chaypim kamunqa ñoqa munaptiy kay sitioman kutichimunankukama’ nispa.”