Puchuq presokunapa kutimusqanmanta
23
Tayta Diosmi nin:
—¡Ay imaynaraq kanqa mana allin michiqkuna hina runaykunata cheqerachispa chinkarachiq kamachikuqkunaqa!
—nispa.
2 Chayraykum Israelpa yupaychasqan Tayta Dios runankuna michiqkunata nin:
—Qamkunaqa ovejaykunatam cheqechirqankichik hinaspam mana harkaspa chinkarachirqankichik.
Chay mana allinkuna rurasqaykichikmantam castigasqaykichik.
Ñoqa Tayta Diosmi chaynata nini.
3 Cheqechisqay nacionkunamantam puchuq ovejaykunata kikiypuni huñumusaq.
Mikunanku pastokunaman kutichimuptiymi astawan miranqaku.
4 Ñoqa Tayta Diosmi nini:
Paykunata cuidananpaq michiqniykunata churaptiymi manaña imatapas manchakunqakuchu nitaq hukmanyanqakuchu,
manañam chullapas chinkanqachu.
Ñoqa Tayta Diosmi chaynata nini.
5 Tayta Diosmi nin:
Hamuchkanmi tiempo
Rey Davidpa castantapuni hatarichinaypaq.
Hamuchkanmi tiempo
allinta ikllichichkaq hina paypa castanta hatarichinaypaq.
Paymá rey kaspan ancha yachaywan gobiernanqa.
Allin arreglotam payqa ruranqa.
Allinta ruraspam kay pachapi gobiernanqa.
6 Paypa tiemponpim Juda nacion salvasqa kanqa.
Paypa tiemponpim Israel nacion seguro yachanqa.
Runakunam kaynata sutichanqaku.
“Allinyachiwaqninchik Tayta Dios” nispam ninqaku.
7 Chayraykum Tayta Dios nin:
—Hamuchkanmi tiempo:
“Israelpa mirayninkunata Egipto nacionmanta horqomuq Kawsaq Tayta Diosraykum jurani” nispa manaña juranankupaq.
8 Juranqakuqa:
“Israelpa mirayninkunata norte law Nacionkunamanta chaynataq qarqosqan wakin nacionkunamanta horqomuq Kawsaq Tayta Diosraykum jurani” nispañam.
Paykunaqa allpankupiñamá yachakunqaku.
Diosmanta willakuq tukuqkunata denunciasqanmanta
9 Diosmanta willakuq tukuqkunatam nini:
Sonqoymi pasaypaq hukmanyasqa kachkan.
Enteron cuerpoymi katkatatachkan.
Machasqa runamanraqmi rikchakuchkani.
Vinowan pasaypaq sinkaruqmanmi rikchakuchkani.
Tayta Diosraykum chayna kachkani.
Chuya palabranraykum chayna kachkani.
10 Hukwan-hukwan kakuqkunam
kay nacionpiqa huntallaña kachkan.
Ñakasqa kasqankuraykum
allpapas llakisqallaña kachkan.
Ñakasqa kasqankuraykum
chunniqpi pastokunapas chakisqaña kachkan.
Mana allinllatam kawsachkanku
Diosmanta willakuq tukuqkunapas.
Mana allinta ruranallankupaqmi
atiyniyoq kasqankupas.
11 Ñoqamanta willakuqkunam
manaña ñoqaman sonqoyoq rikurirunku.
Sacerdote runakunapas manaña ñoqaman
sonqoyoqmi rikurirunku.
Temploypipunim mana allinkuna rurachkaqta tarini.
Ñoqa Tayta Diosmi chaynata nini.
12 Chayraykum paykunapa vidanqa
lluchka ñan hinaña kanqa.
Tutayayman wichiykunankupaqmi
paykunaqa tanqasqa kanqa.
Paykunamanmi castigota apamusaq.
Paykunamanmi chayachimusaq.
Castiganay watapim
castigasaq paykunataqa.
Ñoqa Tayta Diosmi chaynata nini.
13 Samaria llaqtapim rikurqani
ñoqamanta willakuq tukuqkunata.
Samaria llaqtapim rikurqani
mana tupaqninpi rimaqkunata.
Paykunaqa Baal taytachapa sutinpim willakurqaku.
Paykunaqa Israel runaykunatam pantarachirqaku.
14 Jerusalen llaqtapim rikurqani
ñoqamanta willakuq tukuqkunata.
Jerusalen llaqtapim rikurqani
millakuypaq kaqkuna rurasqankuta.
Chaypim hukwan-hukwan kakuchkanku.
Runamasinku engañayllapim purichkanku.
Mana allin runakunatam kallpanchachkanku.
Huchankumanta mana wanakunankupaqmi kallpanchachkanku.
Paykunaqa llapallanpas rikchakapuwan
Sodoma llaqtapi kaqkunamanraqmi.
Chaypi yachaqkunaqa rikchakapuwan
Gomorra llaqtayoq runakunamanraqmi.
15 Llapallan Kamachiq ñoqa Tayta Diosmi nini:
Ñoqamanta willakuq tukuqkunamanmi
ajenjota mikuchisaq.
Ñoqamanta willakuq tukukuqkunamanmi
qatqe yakuta tomachisaq.
Jerusalenpi willakuq tukuqkunamantam
millakuypaq kaqkuna lloqsirun.
Millakuypaq kaqkunam
enteron nacionpi mirarun.
16 Llapallan Kamachiq Tayta Diosmi nin:
Israel castakuna,
amayá kasuychikchu
willakuq tukuqkunataqa.
Amayá kasuychikchu
qamkunaman willasusqaykichiktaqa.
Llullallatam paykunaqa willasuchkankichik.
Piensasqallankutam paykunaqa rimapayasuchkankichik.
Mana nisqaykunatam paykunaqa rimapayasuchkankichik.
17 Qepanchakuwaqniy runakunamanmi nichkanku:
“Hawkallam kankichik” nispa.
Rumi sonqo runakunamanmi nichkanku:
“Desgraciaqa manam chayamusunkichikchu” nispa.
Jeremiaspa rimarisqankunamanta
18 Paykunamantaqa ¿mayqannintaq
Tayta Diospa tanteasqanpi sayarqa?
Paykunamantaqa ¿mayqannintaq
payta rikuspa palabranta uyarirqa?
Paykunamantaqa ¿mayqannintaq
palabranta atiendespa kasukurqa?
19 Sinchi wayra hinaraqmi
Tayta Diospa piñakuyninqa lloqsinqa.
Muyuq wayra hinaraqmi
mana allin ruraqkunapa hawanpi rikurirunqa.
20 Tayta Diospa piñakuyninqa manam taninqachu
imam rurananta ruranankama.
Tayta Diospa piñakuyninqa manam taninqachu
imam piensasqanta cumplinankama.
Hamuq punchawkunapim kaykunata entiendenkichik.
Chay tiempopim imam kaqta entiendenkichik.
Willakuq tukuqkunapa contranpi willakuymanta
21 Chay willakuqkunataqa manam kacharqanichu
ichaqa chayllam kallparqaku.
Chay willakuqkunataqa manam rimapayarqanichu
ichaqa ñoqamantaraqmi willakurqaku.
22 Ñoqapa tanteasqaypi sayaspankuqa
runaykunamanchá willanmanku karqa.
Mana allin kawsasqankumanta
wanakunankupaqchá willanmanku karqa.
Mana allin rurasqankumanta
wanakunankupaqchá willanmanku karqa.
23 Ñoqa Tayta Diosmi nini:
Ñoqaqa hichpaykichikpi kaq Diosmi kani.
Ñoqaqa manam karupi kaq Dioschu kani.
24 Ñoqa Tayta Diosmi nini:
Pakakuna sitiopi pipas pakakuptinqa
¿manachum rikuchkani ñoqaqa?
¿Manachum hanaq pachata huntariq kani?
¿Manachum kay pachata huntariq kani?
Ñoqa Tayta Diosmi nini chaynata.
25 —“Mosqorunim,
mosqorunim” nispa sutiypiraq willakuq tukuqkunapa willakusqantam uyarirqani.
26 ¿Haykapikamataq chay llulla willakuqkunaqa engaño sonqoyoqlla kanqaku?
Paykunaqa sonqonkumanta horqoykuspallam willakunku.
27 Mosqosqankuta willanakuspankum munachkanku runaykuna qonqaruwananta.
Chaynam abuelonkupas Baal sutiyoq taytachata adoraspa qonqaruwarqaku.
28 Ñoqa Tayta Diosmi nini:
Pipas mosqoruspaqa chay mosqorusqantayá willakuchun.
Pipas rimasqayta uyarispaqa imam kaqtayá willakuchun.
Trigotawan pajataqa manam chapunachu.
29 Ñoqa Tayta Diosmi nini:
Rimasqayqa nina hinam.
Rimasqayqa qaqa rumipas ñutuq martillo hinam.
30 —Ñoqa Tayta Diosmi nini:
Chayraykum ñoqaqa chay willakuqkunapa contranpi kachkani,
paykunaqa ñoqapa nisqaykunatam suwakuypaq-suwakuchkanku willakuqmasinkumanta.
31 Ñoqa Tayta Diosmi nini:
Ñoqaqa chay willakuqkunapa contranpim kachkani,
paykunaqa yanqalla rimaspam ninku:
“Kaynatam Tayta Dios nin” nispa.
32 Ñoqa Tayta Diosmi nini:
Yanqakunata mosqoruspa runaykunata pantarachiq willakuqkunapa contranpim kachkani.
Paykunaqa runaykunatam pantachin llulla willasqankuwan chaynataq rimaylla-rimasqankuwan.
Ñoqa Tayta Diosmi nini:
Paykunataqa manam kachamurqanichu nitaqmi kamachimurqanichu.
Paykunaqa manam yanapayta atinchu runaykunataqa.
Tayta Diospa rimasqankunata imaynam willakunankumanta
33 —Yaw Jeremias,
sichu kay runakunapas otaq ñoqamanta willakuq tukuqpas otaq sacerdotepas tapusunkiman:
“¿Imatataq Tayta Diosqa willasurqanki?”
nispa hinaptinqa paykunatam ninki:
“Tayta Diospa nisqanman hinaqa paypaqsi kankichik llasaq qepi hina chaysi wischurusunkichik” nispa.
34 Sichu ñoqamanta willakuq tukuqpas otaq sacerdotepas otaq hukkaqnin runapas ninman:
“Tayta Diospa willakusqanmi kayqa” nispa hinaptinqa chay runatam ayllunkunatawan castigasaq.
35 Runamasikichikwanqa hinaspa aylluykichikwanqa:
“¿Imanispataq Tayta Diosqa contestarqa otaq imatataq payqa nirqa?”
nispam ninakunkichik.
36 Amañam ninkichikchu:
“¿Imatataq Tayta Diosqa willakurqa?”
nispaqa.
Sapakamapa willakusqanqariki kikinpa rimasqallanmi.
Qamkunaqa yupaychasqanchik Llapallan Kamachiq Tayta Diospa nisqantam otaq sapallan kawsaq Diospa nisqantam tikrarunkichik.
37 —Yaw Jeremias,
ñoqamanta willakuq tukuqkunatayá tapuy kaynata:
“¿Imanispataq Tayta Diosqa contestarqa otaq imatataq payqa nirqa” nispa.
38 Sichu:
“Tayta Diospa willakusqanmi kayqa” nispa nisuptikiqa ñoqa Tayta Diospa nisqaytam kaynata ninki:
“Amañam rimankichikchu chaynataqa nichkaptiypas hinallaraq rimasqaykichikraykum
39 qamkunataqa qepita hina hoqariruspa wischurusqaykichik,
wischurusaqtaqmi qamkunamanwan abueloykichikkunaman qosqay llaqtatapas.
40 Qamkunataqa wiñaypaqmi penqayman churasqaykichik,
mana qonqaypas atinapaqmi humillachisqaykichik.”