8
Tayta Diosmi kaynata nin:
—Chay tiempopim sepulturankumanta horqonqaku Juda nacion reykunapa tullunta,
kamachikuqkunapa tullunta,
sacerdotekunapa tullunta,
ñoqamanta willakuqkunapa tullunta chaynataq Jerusalen llaqtapi yachaq runakunapa tulluntapas.
2 Chay tullukunam maqchipasqa kanqa intiman,
killaman chaynataq llapallan lucerokunaman.
Chaykunatam paykunaqa kuyaspallaña servirqaku,
qatirqaku,
tapupayarqaku hinaspa adorarqaku.
Chay tullukunata pampanankupaq manaña pipas huñuptinmi wanu hinaña pampapi kanqa.
3 Llapallan Kamachiq Tayta Diosmi nini:
Kay mana allin casta runakunamanta puchuq runakunata qarqoruptiymi maypi kaspapas munanqaku wañuyllataña.
Huchankurayku castigasqa kanankumanta
4 —Yaw Jeremias,
ñoqa Tayta Diospa parteymantayá paykunaman kaynata nimuy:
“Pipas urmaruspanqa sayarirunpunim.
Pipas karuncharuspanqa kutirinpunim.
5 Chaynaqa Israel casta runakuna
¿imanasqataq ñoqamantaqa karunchakurunkichik?
¿Imanasqataq sapa kutilla karunchakuwankichik?
Engañawaytam mana dejayta munankichikchu.
Kutirikamuwaytam mana munankichikchu.
6 Uyarisqayman hinaqa
manam pipas wanakurqachu.
Mana allin rurasqankumantam
mana wanakurqakuchu.
‘¿Imatataq chaytaqa ruraruni?’
nispallapas manam nirqakuchu.
Llapallankum pantay kawsayman kutirunku.
Guerrapi kallpaq caballo hinaraqmi
pantay kawsayman kallpanku.
7 Alton pawaq cigueñapas yachanmi
haykapim kutimuyta.
Kullkupas,
wayanakuypas,
chiwakupas
yachanmi huklawman astakunanku tiempota.
Runaykunam ichaqa mana yachankuchu
ñoqa Tayta Diospa reglamentoykunata.
8 ¿Imanasqataq niwaqchik:
‘Yachaysapam kaniku’ nispaqa?
Qamkunaqa ¿imanasqataq niwaqchik:
‘Tayta Diospa yachachikuynintam
hatalliniku’ nispaqa?
Qellqaqkunaqa llullakunatam
qellqachkanku.
Llullakuspankum yachachikuyniykunata
qellqachkanku.
9 Yachaysapakunam penqayman
churasqa kanqaku.
Toqllapa hapisqan animal hinam
sonsoyachisqa kanqaku.
Manam kasukurqakuchu palabraytaqa.
¿Maypitaq kachkan yachaysapa kayninkuqa?
10 Chayraykum sapaq runakunamanña
warminkutapas qoykusaq.
Paykunapa chakrantapas
sapaq dueñomanñam qoykusaq.
Apuyayllamanñam qokurunku warmakunapas.
Apuyayllamanñam qokurunku yuyayniyoqkunapas.
Engañakuqllañam rikurirun
ñoqamanta willakuqkunapas.
Engañakuqllañam rikurirun sacerdotekunapas.
11 Runaykunapa heridantam
mana kaqpaq hina hapinku.
Manaña hawkayay kachkaptinpas:
‘Hawkallam kakusunchik’
nispam ninku.
12 Millakusqaykunata rurasqankumantaqa
penqakunanku kachkaptinpas manam penqakunkuchu.
Penqakuytaqa manam yachankuchu.
Chayraykum ñoqa Tayta Dios nini:
Paykunata castigasqay tiempopim wichinqaku.
Wañuchisqakunawan kuskam wañusqa wichinqaku.”
13 Tayta Diosmi nin:
Pasaypaqtam paykunata chinkarachisaq.
Chulla uvaspas manam kallmanpi puchunqachu.
Higospas manam sachanpi puchunqachu.
Rapinkunatapas pasaypaqtam chakirachisaq.
Paykunaman qosqaykunatam qechuchisaq.
14 Runakunam ninqaku:
¿Imapaqtaq kaypiqa yachachkanchik?
Huñunakuruspanchikyá
murallasqa llaqtakunaman pasakusunchik.
Chaypiyá hukllataña wañumusunchik.
Yupaychasqanchik Tayta Diosmi wañuchiwasunchik.
Venenasqa yakutam tomachiwarqanchik.
Contranpi huchallikusqanchikraykum wañuchiwasunchik.
15 Hawka kawsakuytam suyarqanchik
ichaqa mana allinllam hamuwarqanchik.
Sanoyananchikpaq tiempotam suyarqanchik
ichaqa muspaypi hinam rikurirurqanchik.
16 Dan castapa allpan lawmantaraqmi
caballonkupa samatyasqanpas uyarikuchkan.
Potronkupa weqeqeqeyninwanmi
allpakunapas katkatatachkan.
Kay nacion tuñichiqmi hamuchkanku.
Tukuy imanpas chinkachiqmi hamuchkanku.
Llaqtata tuñichiqmi hamuchkanku.
Chaypi yachaqkunata wañuchiqmi hamuchkanku.
17 Tayta Diosmi nin:
Contraykichikpim kachamusaq
venenoyoq culebrata.
Manam pipas atinqachu
chaykuna mansoyachiyta.
Chaykunam kachusunkichik qamkunata.
Llaqtamasinkunarayku Jeremiaspa waqasqanmanta
18 Llakisqa uyayoqmi kachkani.
Ukuypipas hukmanyasqam kachkani.
19 Llaqtamasiykunapa qaparisqanmi uyarikuchkan,
karumantaraqmi waqasqanku uyarikuchkan:
¿Tayta Diosqa manañachum
Sion Moqo llaqtapi kachkan?
¿Reyninchikqa manañachu
chaypi kachkan?
nispa.
Tayta Diosmi contestan:
¿Imanasqataq piñachiwarqankichik
taytachakunata adoraspaykichik?
¿Imanasqataq piñachiwarqankichik huklaw
nacionmanta kaq yanqakunata adoraspaykichik?
20 Cosecha tiempoqa pasarunñam,
ñoqanchikñataqmi manaraq salvasqa kachkanchik.
Usyay tiempoqa pasarunñam
ñoqanchikñataqmi manaraq salvasqa kachkanchik.
21 Llaqtamasiykunapa ñakarisqanwanmi ñakarini.
Llakikuywan hinaspa mancharikuywanmi ñakarini.
22 Galaad lawpiqa ¿manañachum
balsamo hampi kanman?
Hampiqpas chaypiqa
¿manañachum kanman?
Llaqtamasiykunapa heridanqa
¿manachum sanoyachisqa kanman?