¡mayna sumaqmi sandaliaykikunapi chakikikunaqa!

Alhaja hinaraqmi kachkan qampa piernaykikunaqa.

Alhaja ruraqpa cadenankuna hinaraqmi piernaykikunaqa.

2 Kuyayllapaq puputikipas vino huntayoq ruyru taza hinam.

Kuyayllapaq wiksaykipas montosqa trigo hinam.

Amanqaykunapa chawpinpi montosqa trigo hinam.

3 Ñuñuykikunaqa mellizo uña luwichukuna hinam.

4 Kunkaykipas elefantepa waqonmanta rurasqa torre hinam.

Ñawikikunapas Hesbon llaqtapi iskay estanquekuna hinam,

Bat-rabim zaguanpa ladonpi iskay estanquekuna hinam.

Senqaykipas Damasco llaqtaman qawaq Libano lawpi torre hinam.

5 Carmelo Orqo hinam kachkan umaykiqa.

Grosella qaytu hinam kachkan chukchaykiqa.

Reypa sonqontam suwan qaspa chukchaykiqa.

6 Kuyakusqalláy

¡mayna suma-sumaqmi kanki!

¡Mayna kuyayllapaqmi kanki!

7 Sayaynikiqa palmera sacha hinam.

Ñuñuykikunaqa uvas sarta hinam.

8 Ñoqam nirqani palmera sachaman seqanaypaq

hinaspa ruruyoq kallmanta pallakamunaypaq.

Ñuñuykikunayá uvas sarta hina kachun.

Samaynikiyá manzanakuna hina asnarichun.

9 Simikipas allin vino hinayá kachun.

Simintayá kirunkunapa chawpinta pasaykuchun.

10 Ñoqapam kuyay-yanayqa.

Munallawanmi payqa.

11 Kuyay-yanalláy,

utqaymanyá hakuchik.

Kuyay-yanalláy,

campomanyá lloqsisunchik.

Alheña waytakunapim tuta samasunchik.

12 Tutapaytam uvas huertakunaman risunchik.

Ikllimusqanta otaq mana ikllimusqantam qawamusunchik.

Sisarusqanta otaq mana sisarusqantam qawamusunchik.

Granadakuna waytarusqanta otaq mana waytarusqantam

qawamusunchik.

Chaypi kuyakuyniyta qomuptiymi kuyanakusunchik.

13 Mandragoras plantam miskillataña asnarichkan.

Punkunchikpim tukuy gustoyoq frutakuna kachkan.

Qaynapas-kunanpas pallasqa frutakunam kachkan.

Kuyay-yanalláy chaykunaqa qampaq huñusqam kachkan.