Warmim nin:
2
Saron lawpi chiwanway wayta hinam ñoqaqa kani.
Qechwakunapi amanqay wayta hinam ñoqaqa kani.
Qarim nin:
2 Kichkakunapa chawpinpi kaq amanqay wayta hinam kuyasqayqa.
Chaynam doncellakunapa chawpinpi kachkan kuyasqayqa.
Warmim nin:
3 Monte sachakunapa chawpinpi
manzana sacha hinam
kuyay-yanayqa.
Chaynam mozokunapa chawpinpi
kachkan kuyay-yanayqa.
¡Mayna sumaqmi chay sachapa llantuyninpi tiyakuyqa!
¡Mayna miskim chay sachapa rurunkuna mikuyqa!
4 Payqariki convido wasimanmi pusawarqa ñoqataqa.
Banderata hina sutillatam qawachiwan kuyakuynintaqa.
5 Kuyakuymanta onqosqa kasqayraykuyá
kallpanchawaychik uvas pasaskunawan.
Kuyakuymanta onqosqa kasqayraykuyá
kallpanchawaychik manzanakunawan.
6 Ichoq brazonyá umaypi kachun.
Alleq brazonwanyá abrazawachun.
Qarim nin:
7 Jerusalen llaqtapi doncellakuna,
campopi luwichukunaraykuyá prometewaychik.
Campopi tarukakunaraykuyá prometewaychik.
Kikinmanta munanankamayá
kuyakuytaqa ama rikchachiychikchu.
Kikinmanta munanankamayá
kuyakuytaqa ama hatarichiychikchu.
Iskay kaq taki
Warmim nin:
8 Kuyay-yanaypa voznintaqa uyarichkaniñam.
Ñoqapa kuyay-yanayqa hamuchkanñam.
Orqokunapa hawantam pawamuchkan.
Moqokunapa hawantam kallpamuchkan.
9 Kuyay-yanayqa luwichu hinam.
Kuyay-yanayqa tarukacha hinam.
Payqa perqapa qepanpiñam kachkan.
Payqa ventanantam qawamuchkan.
Payqa rejillasnintam wateqamuchkan.
10 Kuyay-yanaymi niwarqa:
Kuyasqalláy,
hatariyá.
Sumaqchalláy,
hakuchikyá.
11 Poqoy tiempom pasarunña.
Para tiempom tukurunña.
12 Campopi waytakunam rikuriramunña.
Takinapaq tiempom chayaramunña.
Qoqñukunapa waqasqanpas campopim uyarikuchkanña.
13 Higos sachapa rurunkunam poqosqaña.
Uvaspa sisanmi asnarin miskillataña.
Kuyasqalláy,
hatariyá.
Sumaqchalláy,
hakuchikyá.
14 Orqopa raqrankunapi pakakuq urpichalláy,
qaqapa uchkunkunapi pakakuq urpichalláy,
uyaykitayá rikuykachiway.
Voznikitayá uyariykachiway.
¡Mayna sumaqmi qampa vozniki uyariykuyqa!
¡Mayna sumaqmi qampa uyayki rikuykuyqa!
Iskayninkum nin:
15 Uvas plantakuna dañaq atoqkunata hapimuychik.
Uvaspa sisan dañaq atoqchakunata hapimuychik.
Warmim nin:
16 Kuyay-yanayqa ñoqapam,
paypam kani ñoqaqa.
Amanqay waytakunapa chawpinpim michin payqa.
17 Manaraq inti qespimuchkaptinyá kutikamuy yanalláy.
Manaraq llantuy pasaruchkaptinyá kutikamuy yanalláy.
Qaqakunapi purichkaq luwichu hinayá qamqa kay.
Qaqakunapi purichkaq tarukacha hinayá qamqa kay.