Yachayniyoq runamantawan sonso runamanta
7
Miski asnaq olormantapas
aswan allinqa honorniyoq kaymi.
Runapa nacesqan punchawmantapas
aswan allinqa wañukusqan punchawmi.
2 Convido wasiman riymantaqa
wañuchikuqpa wasinman riymi aswan allinqa.
Wañuywanmi llapa runa tukurunku.
Kawsaq runakunapas chaymantam piensarinanku.
3 Runapa asikusqanmantaqa
llakisqa kasqanmi aswan allinqa.
Llakiqa runapa uyantam hukmanyachin
ichaqa paypa sonqontam allinyachin.
4 Yachayniyoq runakunaqa wañuymantam piensarinku.
Sonso runakunam ichaqa kusikuyllamanta piensanku.
5 Sonso runakunapa takisqan uyariymantaqa
yachayniyoqkunapa qaqchakusqan uyariymi
aswan allinqa.
6 Sonsopa asikusqanqa
tullpapi kichkapa toqyasqan hinallam.
Chaypas chinkaruq waspiy hinallam.
7 Yachayniyoq runa pitapas ñakarichispaqa
sonso runa hinam rurachkan.
Yanqamanta regalota chaskikuq runaqa
sonqontam mana allinman tikrachkan.
8 Ima asuntopapas qallariyninmantaqa
chay asuntopa tukupayninmi aswan allinqa
Pay tukuq runamantaqa
anaq piñakuq runam aswan allinqa.
9 Ama chaylla piñakuruq kaychu.
Chayna kaspaqa manam kanki yachayniyoqchu.
10 Ama haykapipas niychu:
¿Imanasqataq ñawpaq tiempokunaqa
kunan tiempomantapas
aswan allin karqa?
nispaykiqa.
Manam yachayniyoq hinachu
tapukuchkanki chaynataqa.
11 Herenciayoq hinaspa yachayniyoq runaqa
favorecenmanmi kay pachapi runakunataqa.
12 Yachayniyoq runataqa yachayninmi defienden.
Chaynataqmi kapuqniyoqtapas qollqen defienden.
Chaywanpas yachayniyoq kaymi aswan allinqa.
Yachayninmi allinta kawsachin chay runataqa.
13 Qawaykuy Diospa rurasqanta.
¿Pitaq derechanman paypa qewisqanta?
14 Allin punchawkuna tupasuptikiqa
chayraykuyá kusikuy.
Sasachakuykuna hamusuptikiñataq
kaynata piensariy.
Chaykunataqa iskaynintapas
Diosmi rurarun.
Hamuq punchawkunamanta
runa mana yachananpaqmi
chaynataqa rurarun.
15 Chinkaruq waspiy hinalla kawsakusqaypim tukuy kaykunata rikurqani:
Allin ruraq runapas wañunmi
allinta rurachkaspanpas.
Mana allin ruraqpas
unaytam kawsakun
mana allinta rurachkaspanpas.
16 Amayá alli-allin runaqa kaychu.
amataqyá llumpay yachaysapapas kaychu.
¿Imanasqataq kikillayki tukuypaq-tukunki?
17 Amayá llumpay mana allin ruraqqa kaychu.
Amataqyá llumpay sonsoqa kaychu.
¿Imanasqataq manaraq tiempoykipiqa wañuyta munanki?
18 Allinmi huknin hapiynikipas
chaynataq huknin mana dejaynikipas.
Dios respetaq runaqa iskayninmantam lloqsinqa.
19 Llaqtapi gobiernaq chunka runakunamantapas mastaqa
yachayninmi kallpanchan yachayniyoq runataqa.
20 Kay pachapiqa manam hukllapas kanchu
allin ruraq runaqa.
Manam kanchu allinllata ruraspa
mana huchallikuq runaqa.
21 Ama creeychu llapa rimasqankuta,
chaynapim mana uyarinkichu serviqnikipa
rimakususqaykita.
22 Qampas allintam yachanki.
Achka kutitam runamasikimanta rimakurqanki.
Yachayniyoq karuy munaymanta
23 Yachayniywanmi tukuy chaykunata pruebarqani.
Yachayniyoq kanaypaqmi munarqani
ichaqa mana haypay atina kasqantam
cuentata qokuruni.
24 Yachayqa imamantapas aswan karupiraqmi kasqa.
Mana pipapas entiendey atinan sasa-sasam kasqa.
25 Chaymi yachayniyoq hinaspa entiendeq
kanaypaq estudiarqani.
Yuyayniyoq hinaspa razonniyoq
kanaypaqmi maskarqani
chaynapi sonso kayqa mana allin
kasqanta yachanaypaq,
chaynapi sonso kayqa loco hina
kasqanta yachanaypaq.
26 Chaymi tarirurqani
aswan llaki apamuqqa
mana allin warmi kasqanta.
Paypa sonqonqa toqlla hinam
makinkunapas chaqnaq cadena hinam.
Diospa agradonpaq kawsaqllam
chay warmimantaqa lluptinqa.
Huchallikuq runam ichaqa
chay warmiwan presocharachikunqa.
27 Ñoqa yachachiqmi sapa asuntopa imam kasqanta entienderuspay tariruni kayta:
28 ¡Manaraqmi tariniraqchu maskasqayta!
Waranqa qarikunamantam tariruni
Diospa agradonpaq kaqqa huk qarilla kasqanta,
chulla qarilla confiakunapaq kasqanta.
Ichaqa chulla warmitapas manam tarinichu
llapallan warmikunamanta.
29 Aswanqa kayllatam tariruni:
Runataqa Diosmi unancharqa munasqanman hina ruraqta,
ichaqa mana allin piensaymanmi qokurunku pasaypaqta.