4
Qawarispaymi kay pachapi tukuy ñakariyta rikurqani:
Ñakariqkunam waqanku
ichaqa manam pipas consuelaqnin kanchu.
Atiyniyoqkunam ñakarichinku
ichaqa manam pipas consuelaqnin kanchu.
2 Kawsaqkunamantapas aswan allinqa
wañuqkunam.
Kunankama kawsaqkunamantapas allinqa
wañukuqkunam.
3 Kay pachapi mana allinkunata
manaraq rikusqankuraykum,
wañuqkunamantapas aswan allinqa
manaraq nacemuqkuna.
Kay pachapi mana allinkunata
manaraq rikusqankuraykum,
kawsaqkunamantapas aswan allinqa
manaraq nacemuqkuna.
4 Rikurqanitaqmi tukuy llamkayqa hinaspa tukuy imapa allin qespisqanqa runakuna envidiachisqanta.
Chaypas chinkaruq waspiy hinallam,
wayrata hapirunapaq qatikachay hinallam.
5 Sonso runaqa makinkunatam chupqakuykun.
Chaynapim wakchayayman wichikuykun.
6 Ñakariywan llamkaspa iskaynin makinpi
imayoqpas runamantaqa
otaq wayrata hapirunanpaq
qatikachaq runamantaqa
hawkayaypi kawsakuspa huknin makillanpi
kapuqniyoq runam
kanman aswan allinqa.
7 Yapatawan qawarispaymi kay pachapi rikurqani huk chinkaruq waspiy hinalla kaqta:
8 Kanmi runa mana piyniyoq,
mana churiyoq,
mana wawqeyoq.
Ichaqa mana samaykuspanmi llamkachkan.
Apuyasqanwan mana contentakuspanmi llamkachkan.
Manam tapukunchu:
“¿Pipaqtaq ñoqaqa
ñakariywan llamkani?”
nispa.
“¿Imanasqataq vidaypiqa mana kusikunichu?”
nispa.
Chaypas chinkaruq waspi hinallam
chaynataq sasa llamkayllam.
Huklla kaspaqa atisunmi
9 Chulla runalla kanamantaqa
iskay runam aswan allinqa.
Iskayninkum llamkasqankumanta chaskinqaku.
Aswan mastam pagonkuta chaskinqaku.
10 Iskayninkumanta huknin wichiykuptinqa
hukninmi wichiqta hatarichinqa.
Ichaqa ¡imaynaraq kallanman
sapallan wichiykuq runaqa!
Wichiykuptinqa manam pipas,
hatarichinqachu paytaqa.
11 Qonichinakunkum iskay puñuqkunaqa.
¿Piwantaq qonichinakunman sapallan puñuqqa?
12 Vencerachikunmanmi chullalla runaqa
ichaqa defiendekunmankum iskay runaqa.
Manam facillataqa tipirunmankuchu kimsa pata qaytutaqa.
Yachayniyoq kayqa manam yuyaq runakunallapaqchu
13 Allin consejokunata mana chaskiq machuyasqa sonso reymanta aswan allinqa yachayniyoq wakcha mozom.
14 Chayna mozoqa carcelmanta lloqsiruspanpas otaq nacionpi wakcha nacespanpas gobiernanmanmi.
15 Kay pachapi kawsaspa puriqkunatam rikurqani reypa rantinpi kaq mozopa favorninpi kasqankuta.
16 Manaña yupay atina yanapaqnin runakuna kaptinpas qepa wiñaykunaqa manam paymanta contentochu karqaku.
Chaypas chinkaruq waspiy hinallam.
Wayrata hapirunapaq qatikachay hinallam.